Մինչ փողոցային առևտուրն արգելելը, նախ պետք է գոնե թոշակները բարձրացնեին․ Լուսինե Հարոյան

«Ազգային առաջընթաց» կուսակցության նախագահ Լուսինե Հարոյանն իր ֆեյսբուքյան էջում գրել է․

«Հունվարի 1-ից արգելվելու է փողոցային առևտուրը: Իշխանությունները գնում են շատ վտանգավոր ճանապարհով` թվում է, թե վատ բան չեն անում, սակայն մինչ դա անելը նախ պետք է գոնե թոշակները բարձրացնեին, ի դեպ, բարձրացնել չի նշանակում 17 000-ը դարձնել 25 000...
Հետաքրքիր է, նախարարներն ու մարզպետերը կարո՞ղ են 25 000 դրամով ապրել: Մեկ էլ էդ անիմաստ պատգամավորների թիվն ու աշխատավարձը կրճատեին, ո՞ւմ համար է գաղտնիք, որ այնտեղ առնվազն 80%-ը ընդամենը կոճակ սեղմողներ են:

Կարծում եմ՝ բոլորս լավ տեղյակ ենք, թե քանի ընտանիք իր գոյությունն է պաշտպանում հենց փողոցային առևտրի միջոցով, այնինչ իրենց իսկ ձևակերպմամբ միլիոններ թալանած գողերը շարունակում են վայելել իրենց գողոնը.... Չեք կարծու՞մ, որ եթե մինչև վերջին կոպեկը հետ վերադարձվեր, ինչպես և ի լուր ողջ աշխարհի հայտարարվում էր ամենատարբեր ամբիոններից, այս հրաշք տատին կստանար ոչ թե 25 000 ու կկանգներ անլուծելի խնդրի առջև, այլ 125000 ու այլևս ոչ ոք չէր դժգոհի, մի բան Էլ ավել, շնորհակալ կլինեին, որովհետև մարդիկ, հաստատ, փողոցային առևտրից հաճույք չեն ստանում այդ ցրտին ու այլ դժվարին պայմաններում:

Ի դեպ, այդ արգելքը վերաբերո՞ւմ է օլիգարխների առևտրի կետերին, օրինակ, Գնունու շինանյութի շուկային, որը գրավել է բոլոր հարակից մայթերը, թե՞ միայն այս խեղճուկրակ անհատներին:
Ասեմ, որ հետամուտ եմ լինելու այս խնդրին:

Հ.Գ Երեկ մանր և միջին ձեռնարկատերերի հետ հանդիպումից հետո տուն գնալիս տեսա ցրտից կուչ եկած մի պապիկի, որ փողոցում սիգ էր վաճառում: Մոտեցա, հարցրեցի. «Հայրիկ ջան, ախր սիգի որսը արգելված է, ինչո՞ւ եք անում»:
Պատասխանեց. «Բալիկ ջան, ախր ոնց տուն պահեմ, իմ թոռնիկներն էլ են ուզում Նոր տարի անեն»: :
Ու ես` օրենքի գերակայության մեծ ջատագովս, գլխիկոր հեռացա, որովհետև պատասխան ու լուծում չունեի»: