Նորաբաց կուսակցությունն ընտրել է պոպուլյար դառնալու հեշտ, սակայն անպատվաբեր ճանապարհը

Մանե Առաքելյանը ֆեյսբուքյան իր էջում  գրում է.

«Ազգային առաջընթաց» կուսակցություն: Լսե՞լ եք նման կուսակցության մասին: Վստահաբար՝ ոչ: Պատճառը պարզ է՝ նորաբաց կուսակցություն է, ստեղծվել է բոլորովին վերջերս և որոշել են մասնակցել արտահերթ խորհրդարանական ընտրություններին: Ինչպես ասում են՝ որոշել են բախտները փորձել: Կուսակցության համամասնական ցուցակը կին է գլխավորում, ինչը հայաստանյան իրականության պայմաններում գովելի է, քանզի կանանց մասնակցությունը քաղաքական կյանքին բավական պասիվ է:
Թվում է, թե նորաբաց կուսակցությունը, որը, բառացի մեջբերեմ կուսակցության ղեկավարի՝ Լուսինե Հարոյանի բառերը «Մինչև հիմա քաղաքական գործընթացներին, ընտրություններին մասնակցելն անիմաստ են համարել», պետք է նոր իրականության խաղի կանոններն անգիր արած մտնեին քաղաքական դաշտ: Սակայն, ցավոք, նրանք ընտրել են արագ պոպուլյար դառնալու հեշտ, սակայն ոչ հեռանկարային և անպատվաբեր ճանապարհը: Վերցնում են հայկական քաղաքական դաշտի ամենահայտնի և կայացած գործչի կերպարն ու իրենց «բարձունքից» սկսում գնահատականներ ու քննադատություներ շռայլել:
Առավել ցավալի է, երբ դա անում է հենց կինը: Որովհետև հանրության շրջանում դրական կերպար ձևավորելու համար մեր երկրում պարտավոր ես հաշվի նստել և հարգել հասարակության մեջ առկա կնոջ արխետիպային կերպարը:
Մասնավորապես այս դեպքում տիկինը փորձել է ինքնահաստատվել Գագիկ Ծառուկյանի կերպարի քննադատությամբ: Մի մարդ, ով նոր-նոր է ուզում առաջին քայլերն անել, քննադատում է պատկառելի քաղաքական կենսագրությամբ գործչին: Սա ոչ մի տեղ տանող ճանապարհ է: Փաստարկների սակավության պատճառով նա դիմում է ամենաթույլ օղակին՝ պնդելով, թե ընտրություններից առաջ Ծառուկյանը կրթաթոշակ է բաժանում ուսանողներին, որը կաշառք է որակում: Այս մերկապարանոց հայտարարությունը տիկնոջը շատ թանկ են արժենալու, քանզի լոկ այս մեկ արտահայտությամբ տիկինը դսևորում է իր քաղաքական կատարյալ բոբիկությունը, անտեղյակությունը: Այդ կրթաթոշակները, որոնք ուսանողներին օդի ու ջրի պես հարկավոր են, քանզի պետությունը չի կարողանում անվճար կրթություն ապահովել իր քաղաքացիներին, «Գագիկ Ծառուկյան» հիմնադրամը ամեն տարի է հատկացնում լավագույն ուսանողներին:
Իներցիայի կանոններով նա օլիգարխիկ նկրտումների մեջ է մեղադրում նաև ԲՀԿ-ին: «Նրանք երկրորդ ուժն էին ԱԺ-ում, դա նշանակում է, որ ԱԺ-ում օրինագծերն ընդունելիս առաջնորդվում են կուսակցական, կլանային շահերով»: Այս խոսքերը կարդալիս ակամա հիշեցի նախորդ ձմռանը ԲՀԿ-ի անզիջում պայքարը ԱԺ-ում՝ հարկային օրենսգրքի փոփոխությունների հետևանքով տուժող առևտրականների շահերը պաշտպանելու համար: Այն ժամանակ ևս նրանց մեղադրում էին առևտրականների կոնկրետ խմբի շահերից հանդես գալու համար, սակայն հիմա, երբ սթափ են նայում իրավիճակին, և հունվարից մաքսատուրքը բարձրանալու է, արդեն ընդունում են, որ ԲՀԿ-ի պայքարը ազնիվ էր և բոլորի շահերի համար էր: Դուք այստեղ օլիգարխիկ դրսևորում տեսնու՞մ եք: Բնականաբար՝ ոչ:
Ազնի՛վ մտեք քաղաքական դաշտ: Ժողովուրդը դա կգնահատի:
Վերջիվերջո, քաղաքականությունը դառնում է անբարոյականություն, երբ դրանով սկսում են զբաղվել անբարոյականները: