Գեներալ Արշալույս Փայտյան. «Ես պետությանը երբևիցե ընդդիմություն չեմ լինի, Սեյրան Օհանյանի կողքին չեմ». «Փաստ»

«Փաստ» օրաթերթը գրում է.

«Փաստին» հասած տեղեկություններով՝ գեներալ–լեյտենանտ Արշալույս Փայտյանը, ով 2012–ին ազատվեց ՀՀ զինված ուժերի գլխավոր շտաբի պետի տեղակալի պաշտոնից, միացել է ՊՆ նախկին նախարար, այժմ ընդդիմություն դարձած Սեյրան Օհանյանին: «Փաստի» հետ զրույցում գեներալ Փայտյանը հերքում է տեղեկությունը՝ հայտարարելով, որ ինքը չի կարող ընդդիմադիր լինել ու կանգնել Օհանյանի կողքին:

Հիշեցնենք, որ Արշալույս Փայտյանը լքեց պաշտոնը այն բանից հետո, երբ քրգործ հարուցվեց բանակին տավարի մսի փոխարեն գոմեշի միս մատակարարելու առթիվ:

Ներկայացնում ենք «Փաստի» հարցազրույցը գեներալ Փայտյանի հետ:

– Պարոն Փայտյան, տեղեկություն կա, որ Դուք Սեյրան Օհանյանին եք միացել և այժմ նրա կողքին եք:

– Ոչ, ես հայրենիքի զինվոր եմ ու իմ զինվորի կողքին եմ: Ինչպես եղել եմ, այդպես էլ կամ:

– Սեյրան Օհանյանն էլ է ասում, որ ինքը զինվորի, հայրենիքի, ժողովրդի կողքին է, էնպես չի, որ հեռացել է:

– Դե, շատ ցանկալի է, որ բոլորը, հայ ժողովուրդը գտնվեն հայ զինվորի կողքին, ուրախալի է: Ես եղել եմ անկախական, անկախության բանակի հրամանատարներից, ծառայել եմ իմ հայրենիքին ինչքան իմ առողջությունը թույլ է տվել և էսօր էլ, եթե պետք լինի, պարտավոր եմ ծառայել իմ հայրենիքին: Ես Սեյրան Օհանյանին տարիներ առաջ եմ հանդիպել: Նշեցի՝ ես հայ զինվորի կողքին եմ, մեր պետության կողքին եմ:

– Սակայն այս պահին Դուք Պաշտպանության նախարարությանը կարծես պետք չեք՝ հատկապես գոմեշի մսի պատմությունից հետո:

– Ոչ, էդպիսի բա չկա, ես տարիքի և առողջության պատճառով զորացրվել եմ բանակից: Գոմեշի միսը ամբողջ աշխարհն ա ուտում, այդ թվում՝ նաև Հայաստանը, դա մատի փաթաթան չդարձնենք:

– Իսկ ինչպե՞ս եք վերաբերվում Սեյրան Օհանյանի քաղաքական գործունեությանը՝ հատկապես ընդդիմադիր դաշտում:

– Յուրաքանչյուր անձ, անհատականություն ունի իր մոտեցումները հայրենիքի զարգացման գործում: Նրանք, ովքեր ձգտում են հայրենիքին ծառայել իրենց ծրագրերով, իրենց մոտեցումներով, կարծում եմ, քննադատության ենթակա չպետք է լինեն, եթե իրենց նպատակները իրականում բարի են, հայրենիքի զարգացմանն են նախանշվում: Չեմ կարծում, որ պետք է քննադատել: Լավագույն ծրագրեր եթե կան հանուն մեր երկրի, ողջունելի են:

– Իսկ ո՞ւմ, ո՞ր քաղաքական ուժի մոտ եք լավագույն ծրագրեր տեսել:

– Բոլորի մոտ, մնում է էդ ծրագրերն իրականություն դարձնել: Կանգնել իրար կողքի, քիչ քննադատել մեկը մյուսին, չիջնել կենցաղային մակարդակի, հասկանալ, որ երկրի համար գոյություն ունի մի կարևորագույն խնդիր. ամեն ինչ անել, որ վաղվա չնախատեսված պատերազմում հաղթող դուրս գանք:

– Պարոն Փայտյան, Սեյրան Օհանյանն ասում է, որ մեր երկրում անարդարություն կա, արմատական փոփոխություններ են պետք, բավական է այս ամեն ինչը հանդուրժենք: Համաձայն չե՞ք, Դուք նման անհրաժեշտություն չե՞ք տեսնում:

– Ես քաղաքականությամբ չեմ զբաղվում: Իմ տեսլականը հետևյալն է. հավատալ բոլոր լավը ցանկացող ուժերին, ունենալ լավագույն տեսլական: Իմ հնարավորությունների սահմանում կկանգնեմ այն ուժերի կողքին, որոնք մեր երկիրը տանելու են զարգացման ճանապարհով: Ես անկախության բանակի հրամանատարներից եմ եղել և Հանրապետական կուսակցությունն էլ հիմնվել է անկախության բանակի հիմքով, ու չեմ կարող այդ ուղենիշը մոռանալ: Բնական է, որ ես սատարում եմ հանրապետականի գաղափարախոսությանը: Ես կուսակցական չեմ, բայց գաղափարախոսությունն ինձ համար հարազատ է:

– Ուզում եք ասել՝ չե՞ք կարող Սեյրան Օհանյանի պես ընդդիմություն դառնալ:

– Ես պետությանը ու երկրին, իմ ժողովրդին երբևիցե ընդդիմություն չեմ եղել ու չեմ էլ լինի:

– Ասել է թե՝ միշտ իշխանամետ եք լինելու՝ անկախ ինչ վիճակ է երկրում:

– Եթե մարդն ասում է, որ ինքը հայրենիքի զինվոր է և կանգնելու է զինվորի կողքին, նշանակում է ես իշխանամե՞տ եմ: Իշխանամետը դուք եք, ես ի՞նչ իշխանամետ լինեմ: Ես ասացի՝ որտեղ եմ:

Շարունակությունը` «Փաստ» օրաթերթի այսօրվա համարում: