Գագիկ Ծառուկյանը ոչինչ չի խնայում՝ հսկա արենաներում Հայաստանի դրոշը ծածանելու նպատակով

Էլլա Հովհաննիսյանը ֆեյսբուքյան իր էջում գրում է.

Վերջին մի քանի ամիսների լարված քաղաքական իրավիճակի և հախուռն իրադարձությունների ֆոնին երևի թե առաջին անգամ հասարակությունը իրեն թույլ տվեց մի պահ կտրվել մեդիաիրականության հոսանքից: Առիթը ավելի քան նշանակալից էր՝ մեր ծանրամարտիկները աշխարհի առաջնությունում նվաճել էին ոսկե և արծաթե մեդալներ՝ Հայաստանի դրոշը ավելի վեր ծածանելով զուտ աշխարհագրորեն մեզանից մի քանի տասնյակ անգամ մեծ պետությունների դրոշներից: Յուրաքանչյուր հայ տվյալ պահին դա համարում է սեփական հաղթանակը, և, ես վստահ եմ, հենց իրենք՝ մարզիկները, այդ հաղթանակի համար պայքարում են հանուն յուրաքանչյուր հայի:

Հաղթանակի բերկրանքը վայելելուց հետո, ակամա մտաբերում ես այն տարիները, երբ աշխարհի առաջնություններին հետևում էինք մի տեսակ թերահավատորեն: Իսկ հիմա այնքան վստահ ենք մեր դյուցազունների ուժերին, նրանք այնքան են մեզ սովորեցրել ոսկե մեդալի փայլին, որ նույնիսկ բրոնզե մեդալից ենք ինչ-որ տեղ դժգոհում: Ըմբշամարտի, ծանրամարտի, բոքսի և բազում այլ սպորտաձևերի առաջնությունների և Օլիմպիական խաղերում այդ մարզաձևերում մեր մարզիկներին հետևում ենք արդեն <Մուրադի հպարտությամբ>: Ամեն անգամ աննկարագրելի է այն պահը, երբ փոքրիկ Հայաստանի մարզիկը տվյալ մարզաձևում գերտերություն համարվող որևէ պետության մարզիկի պատվո պատվանդանին թողնում է իրենից մեկ աստիճան ներքև:

Տվյալ պահերին անսահման է երախտագիտությունը այն կառույցների հանդեպ, ովքեր ջանք չեն խնայել մարզիկների համար պատշաճ պայմաններ ստեղծելիս, որպեսզի նրանց կոնցենտրացիայի միակ աղբյուրը լինի հենց սպորտաձևը և հաղթանակը: Այս պլանում անգնահատելի է ՀԱՕԿ նախագահ Գագիկ Ծառուկյանի և Օլիմպիական կոմիտեի աշխատանքը, ովքեր 15 տարվա ընդմիջումից հետո մեզ պարգևեցին առաջին Օլիմպիական չեմպիոնին, ովքեր Հայաստանը դասեցին Օլիպոսի բարձունքում գտնվող պետությունների շարքին, և ովքեր ջանք չեն խնայում սպորտը հեռավոր մարզեր ևս տեղափոխելուն՝ տեղական մարզադպրոցների կառուցման միջոցով:

Վստահաբար, ՀԱՕԿ-ը և հայրենական սպորտի համար պատասխանատու այլ կառույցները կշարունակեն իրենց այս ազգանվեր երախտապարտ գործունեությունը՝ ոչինչ չխնայելով փոքրիկ երկրի դրոշը հսկա արենաներում ծածանելու ուղղությամբ: