«Մենք դեռ որևէ մեկս «չէ» բառը չենք լսել պարոն Ծառուկյանից». «Փաստ»

«Փաստ» օրաթերթը գրում է.

Երևանի ավագանու արտահերթ ընտրությունների նախնական արդյունքները հրապարակված են և, ինչպես ասում են, ընտրություն կոչվող այս մի ստուգատեսն էլ է ավարտված: Եվ, ինչպես ընտրարշավի ժամանակ ԲՀԿ առաջնորդ Գագիկ Ծառուկյանն էր նշում, որ առաջիններից է լինելու, ով արդար պայմաններում հաղթած ուժին անձամբ է շնորհավորելու, նույնպես իրականություն դարձավ: Արձանագրենք նաև, որ վերջին շրջանում տեղի ունեցած քաղաքական նոր մշակույթի ձեռքբերումներից է միմյանց հանդեպ նման հանդուրժողական վերաբերմունք ցուցաբերելու երևույթը, երբ քաղաքական կուսակցությունները երկիրը ապակայունացման ճանապարհով տանելու փոխարեն փորձում են ոչ միայն միմյանց շնորհավորել, այլև նոր, լուսավոր ու պայծառ գործով կանգնել հայրենիքի ու ժողովրդի կողքին:

Ընդ որում, անկախ նախընտրական փուլում հնչած հայտարարություններից: Ի վերջո, քարոզարշավը մնում է քարոզարշավ՝ իր բոլոր դրսևորումներով: Սակայն, ընտրությանը հաջորդում է բնականոն կյանքի նոր փուլը:

ԲՀԿ առաջնորդն էլ քարոզարշավին մասնակցելու ժամանակ նշում էր նաև, որ ընտրության հենց հաջորդ օրվանից, առանց ժամանակ կորցնելու, շարունակելու է աշխատել ու շենացնել Հայաստանը:

Նրա խոսքն այս անգամ էլ կրկին չտարբերվեց գործից, քանի որ երեկ պարզ դարձավ, որ Գագիկ Ծառուկյանը հանձնարարել է Երևանի Արարատ կոնյակի, գինու, օղու կոմբինատի գործընկեր խաղողագործներից խաղողի բերքը մթերել ամենաբարձր սակագնով:

Սա, իրոք, կարևոր քայլ էր մի քանի առումներով. նախ՝ վերջին շրջանում խաղողագոները բարձրաձայնում էին այս խնդրի մասին, միջպետական ճանապարհներ փակում և անգամ սպառնում վերացնել խաղողի այգիները: Պետական մակարդակով հարցին լուծում այդպես էլ չտրվեց, բայց Ծառուկյանը ընտրության հենց հաջորդ օրն իսկ մեկնելով Արմավիրի մարզ՝ կրկին իր այս քայլով ցույց տվեց, որ սեփական ժողովրդի կողքին կանգնելու և նրա խնդիրները լուծելու առաջնահերթությունը և անհրաժեշտությունը իր համար ամեն ինչից վեր է

Արմավիրի ու Արարատի մարզերի հազարավոր խաղողագործներ 150 դրամով կկարողանան իրենց խաղողը գործարանին հանձնել: Ուշագրավն այն է, սակայն, որ ԲՀԿ առաջնորդն այս հարցին կարող էր լուծում տալ դեռ մեկ ամիս առաջ, այսինքն, դեռ այն ժամանակ, երբ մարդիկ միջպետական ճանապարհներ էին փակում, սակայն հաշվի առնելով ընտրական իրողությունը, նա զերծ մնաց որևէ քայլ իրականացնելուց, որպեսզի իր կուսակցության ընդդիմախոսները որևէ առիթ չունենան իրականության հետ որևէ աղերս չունեցող՝ ընտրակաշառքի փորձի հետ կապել:

Կարևոր է շեշտել, որ թեպետ մթերման գինը բարձրացվում է, սակայն կոնյակի վաճառքի գինը, այդ թվում՝ արտահանվող, չի փոխվում: Այսինքն, Ծառուկյանն այս քայլը կատարում է, թեպետ ակնհայտ է, որ վնասներ է կրելու:

Հանդիպման ժամանակ շենավանցի մի բնակիչ հարց բարձրացրեց, որ իրենց գյուղում գազ են քաշել միայն նրանց տները, ովքեր Հանրապետական կուսակցության ներկայացուցիչ են, իսկ մյուսները մնացել են առանց գազի: Ծառուկյանը խոստացավ այդ հարցը նույնպես ուսումնասիրել և եթե, իրոք, պարզվի, որ ժողովրդի նկատմամբ խտրական վերաբերմունք է եղել, ապա ինքն իր միջոցների հաշվին կշտկի այդ սխալը:

Արմավիրցիների հետ հանդիպումը տեղացիները բավականին արդյունավետ էին գնահատել ու նշում էին, որ ԲՀԿ առաջնորդը մշտապես էլ եղել է ու կլինի իրենց կողքին, որի համար նրանք երախտապարտ են նրան:

«Բոլորը ստացան իրենց հարցերի պատասխանները: Բացի այդ, խաղողի մթերման գինը Գագիկ Ծառուկյանը բարձրացրեց 150 դրամ, և պետք է ասեմ, որ ինչ բնագավառում ինքը մասնակից է եղել, ոչ միայն դրական լիցքեր է հաղորդել մարդկանց, այլ ամեն կերպ աջակցել է բոլորին: Եթե անկեղծ լինեմ, մենք դեռ որևէ մեկս «չէ» բառը չենք լսել պարոն Ծառուկյանից: Լավ կլիներ, որ բոլոր մթերող կազմակերպություններն օրինակ վերցնեին: Եթե պարոն Ծառուկյանը չլիներ, մեր մարզի խաղողի կեսը կմնար գետնին»,– ասում էին արմավիրցիները:

Մանրամասները՝ «Փաստ» օրաթերթի այսօրվա համարում