Մեր առաջնահերթ խնդիրների մեջ է մտնում ոչ թե ծառ տնկելը, այլ քաղաքը ոռոգման համակարգով ապահովելը. Զարուհի Փոստանջյան

«Երկիր Ծիրանի» կուսակցության նախընտրական քարոզարշավն այսօր մեկնարկեց Հրազդան մարզադաշտի հարակից տարածքից: Կուսակցության քաղաքապետի թեկնածու Զարուհի Փոստանջյանը նշեց, որ այդտեղից նկատելի է, թե ինչպես են Երևանի նախկին կանաչ այգիները չորացել:

«Մեր առաջնահերթ խնդիրների մեջ է մտնում ոչ թե ծառ տնկելը, այլ քաղաքն ապահովելը ոռոգման համակարգով, որից հետո անցնել ծառատունկին և կանաչ տարածքների վերականգնմանը»,-ընտրողների հետ հանդիպմանն ասաց նա և նշեց, որ Երևանի 170 մլն դոլարի բյուջեն հնարավոր է այնպես ծախսել, որ Երևանի թոքերը բուժվեն:

Ըստ նրա՝ քաղաքապետարանն ամեն տարի հսկայական գումարներ է տրամադրում ծառերի գնման համար, մինչդեռ ամեն տարի տնկված ծառերը չորանում են, և հետո կրկին շարունակում են գնումները: Փոստանջյանը վստահ է, որ այդ ձևով գումարներ են գրպանում:

Այնուհետև նա անդրադարձավ աղբահանության խնդրին, նշեց, որ հատկապես խնդիրը մտահոգիչ է Էրեբունի համայնքում, որտեղից ինքը քարոզարշավը սկսել է: Այսօր «Երկիր Ծիրանի» կուսակցությունը կլինի նաև Մալաթիա Սեբաստիա համայնքում: Իսկ թե ինչ առաջնահերթ խնդիրներ ունի համայնքը, Զարուհի Փոստանջյանը նշեց, որ այնտեղ շատ են բազմաբնակարան շենքերը, որոնք հնացել են և կարիք ունեն վերանորոգման: Նա նշեց, որ այնտեղ նրանց նոր վերելակներ են անհրաժեշտ, նաև տանիքների արդիականացման խնդիր կա: «Մենք նոր վերելակների համար նախատեսել ենք գործարան շահագործել, իհարկե որոշ մասեր կբերենք և կհավաքենք այստեղ՝ վերալակային գործարանում»,-ասաց նա: