«Վերջին 2 տարում ոչ մի լուրջ խախտում էլ չի գտնի». Հրազդանի քաղաքապետարանում կրկին ստուգումներ են

Հուլիսի 6-ից Հրազդանի համայնքապետարանում Կոտայքի մազպետի՝ ՀՀ Տարածքային կառավարման եւ զարգացման նախարարություն ուղարկված միջնորդության բավարարմամբ իրականացված վարչական վերահսկողությունն ավարտվել է:

Իրականացված հսկողության արդյունքում արձանագրվել են մի շարք թերություններ եւ իրավախախտումներ, որոնց վերաբերյալ 2018թ.-ի օգոստոսի 13-ին Կոտայքի մարզպետ Ռոմանոս Պետրոսյանը Կոտայքի մարզի դատախազին հաղորդում է ուղարկել նշված իրավախախտումները քննության առարկա դարձնելու եւ օրինական կարգով ընթացքը լուծելու համար:

Թե ինչ իրավախախտումներ եւ թերություններ են արձանագրվել վարչական վերահսկողության արդյունքում, NEWS.am-ը փորձեց պարզել Կոտայքի մարզպետ Ռոմանոս Պետրոսյանից. «Վաղ եմ համարում դրա մասին խոսել, սպասենք դատախազության հաղորդագրությանը: Մարզպետարանը օրենքով սահմանված 2 տարվա գործունեություն կարող է ստուգել, իսկ վերջին 2 տարում ոչ մի լուրջ խախտում էլ չի գտնի, թերություններ եւ իրավախախտումներ է գտել»,-նշեց Ռոմանոս Պետրոսյանը:

NEWS.am-ին հայտնի դարձավ, որ դրանից հետո Հրազդանի համայնքապետարանում կրկին ստուգումներ են սկսվել: Թե ինչ ստուգումների մասին է խոսքը, զրուցեցինք Հրազդանի համայնքապետարանի մամուլի քարտուղար Մայիս Պողոսյանի հետ. «Այո, քաղաքապետարանում հիմա նոր ստուգումներ են իրականացվում՝ արտաքին աուդիտ է, մասնավոր կազմակերպությունն է իրականացնում: Սա նորմալ երեւույթ է, մենք չենք փնտրում որեւէ սխալ, անձնավորված որեւէ բան չկա: Վերջնական արդյունքները կհրապարակենք աուդիտը ավարտելուց հետո»,-նշեց Մայիս Պողոսյանը:

Ի դեպ, ստուգումներն արդեն սկսվել են, բայց թե ինչքան ժամանակ կտեւի, դեռ պարզ չէ:

Նշենք, որ Հրազդանի քաղաքապետի պաշտոնակատար է նշանակվել Լիլիթ Ստեփանյանը: Քաղաքապետի ընտրությունները նշանակված են հոկտեմբերի 21-ին: