Փողով հեռուստացույց դիտելու սարքերը հեռացվել են, կամ՝ «Արաբկիր» բկ–ի «ամնեզիան». «Փաստ»

«Փաստ» օրաթերթը գրում է.

Երկար տարիներ «Արաբկիր» բժշկական կենտրոնում հեռուստացույց դիտելու համար հիվանդասենյակներում բուժում ստացող քաղաքացիներն ու իրենց հարազատները ստիպված էին վճարել: Կար մի սարք, որի մեջ գցում էիր մետաղադրամ, որ հեռուստացույց դիտես: «Գնացուցակը» տարբեր էր` կախված էր նրանից, թե որքան կտևի դիտումը, մի խոսքով՝ ժամավճար էր: Երեկ տեղեկություններ ստացանք, որ սարքերն այլևս չկան: Ավելին, նշում էին, որ դա առողջապահության նախարարության պարտադրանքն է եղել: Երբ բժշկական կենտրոնից փորձեցինք պարզել, թե ե՞րբ և ինչո՞ւ են որոշել հեռացնել սարքերը, սկզբում ասացին, թե իրենց մոտ նման սարք չկա ու չի էլ եղել:

Դիտարկմանը, թե գիտենք, որ նման սարք եղել է, տեսել ենք ժամանակին, ուղղակի հարցնում ենք, թե երբ են հեռացրել և ի՞նչ պատճառաբանությամբ, տնօրենի ընդունարանի աշխատակցուհին ասաց. «Ինչի՞ համար եք այս հարցերը տալիս»:

Երբ ամենայն մանրամասնությամբ բացատրեցինք, որ լրագրողը հարցը տալիս է պատասխան ստանալու և դրանք հրապարակելու համար, ասաց. «Մենք այդ հարցերին չենք պատասխանում, նման հարցերին պատասխաններ տալու իրավունք չունենք»:

Դիտարկմանը, թե պարզ հարց ենք տալիս`այլևս չի գործո՞ւմ, ասաց. «Չէ, չի գործում»:

Շարունակությունը՝ «Փաստ» օրաթերթի այսօրվա համարում