Ո՞ւմ դեմ է «Վեոլիա ջրի» ակցիան

«Վեոլիա ջուր» ընկերությունը գրանցվող շոգ եղանակի կապակցությամբ մայրաքաղաքում ու մարզերում «յուրօրինակ» ակցիա է իրականացնում: Ընկերությունը որոշել է չափել մարդկանց համբերությունը: Վթարի կամ պլանային անջատումների հիմնավորմամբ, քաղաքացիները ժամեր շարունակ զրկվում են ջրից: Իսկ եթե ընկերությունը որոշում է վերականգնել ջրամատակարարումը, ջրի ճնշումն այնքան ցածր է, որ այն «չեղածի հաշիվ» է: Oragir.info-ն դեռ հուլիսի 2–ին էր ահազանգ ստացել մասնավորապես Էրեբունի վարչական շրջանում ջրամատակարարման խայտառակ իրավիճակի մասին: Նշված վարչական շրջանի մասով արդեն երկրորդ անգամն է ջրամատակարարման պատճառ նշվում «Արարատյան պոմպակայանում» տեղի ունեցած վթարը:

Ընկերությունից փորձել էինք նախ հասկանալ` հնարավո՞ր չէ այնպես վերականգնել և այնպես շտկել վթարից առաջացած հետևանքը, որ 2 օր հետո նորից նույն խնդրի առաջ չկանգնեն: Պատասխանելով հարցին` «Վեոլիա Ջուր» ՓԲԸ հանրային կապերի ծառայության «հարյուր տարվա» պետ Մուրադ Սարգսյանը մեզ հետ զրույցում նշեց. «Չեմ տիրապետում տեղեկատվությանը, Հայաստանը մեծ է, ես մենակ եմ»:

Նա փոխանցեց ընկերության էլեկտրոնային հասցեն` խորհուրդ տալով գրավոր հարցում ուղարկել:

«Խոստանում եմ մինչև օրվա վերջ ձեր բոլոր հարցերին պատասխանել: Պետք է ստուգման ուղարկենք, ստանանք տեղեկատվությունը և նոր ներկայացնենք պարզաբանումը»,–ասաց նա:

Այնուհետև Մուրադ Սարգսյանի հետ զրույցում բարձրացրեցինք իրազեկման խնդիրը:

Ասաց` զանգերի կենտրոնն իր իրավասության տակ չէ, ինքը միայն ֆեյսբուքյան պաշտոնական էջի առումով կարող է պարզաբանում տալ: Թեժ գծի մշտապես «զբաղված» օպերատորների հարցն էլ խնդրեց գրավոր հարցման մեջ ներառել:

Նկատառմանը, թե կարո՞ղ եք մեկ–մեկ ուշադրություն դարձնել մարդկանց բողոքներին, մեկնաբանություններին, գոնե կապ ապահովել սպառողների հետ, նա արձագանքեց. «Շնորհակալություն, ընդունեցի ձեր ասածը, միանգամայն իրավացի եք»:

Իսկ հարցին, թե ինչո՞ւ են ջրամատակարարումը դադարեցնելուց հետո միայն հայտարարում դադարեցման մասին, իմաստը ո՞րն է, պատասխանեց. «Դա էլ գրեք հարցման մեջ: Բայց որ շուտ ուղարկեն, շուտ կտանք: Բայց վթարի դեպքում եթե նախօրոք իմանայինք, «հենա դեմը կառնեինք»: Այսինքն` դա պլանային աշխատանք չէ, դա վթար է, վթար: Միգուցե ճնշմանը չդիմանալով` պայթել է, մետաղն է մաշված եղել: Հազար պատճառ կարող է լինել: Ինչպե՞ս նախօրոք իմանանք, թե որտեղ կլինի: Իսկ եթե ջրամատակարարման դադարեցումը պլանային աշխատանքով է պայմանավորված` երեք օր առաջ կարող ենք հայտարարություն անել»:Իսկ հարցին, թե ինչպե՞ս կբացատրեք այն, որ երբեմն ջուրն անջատվում է նաև այն փողոցներում, որոնք հայտարարությունների մեջ ներառված չեն, խոսնակը խնդրեց այդ հարցը ևս գրավոր հարցման մեջ ներառել:

Այնուամենայնիվ, սպասելիք ունեինք, որ խոստացվածի համաձայն` հարցման պատասխանը կստանանք նշված ժամանակահատվածում: Թվարկված խնդիրների վերջում «ե՞րբ եք վերանայելու ձեր գործելաոճը» հարցադրումն էր:

Պատասխաններ այդպես էլ չստացանք: Ընկերությունը խոստումը չկատարեց և շարունակում է լռել: Հայտարարություն չի տարածում անգամ արդեն առկա բողոքի մեծ ալիքի ֆոնին, քանի որ ողջ Երևանում ջրանջատումները զանգվածային են: Սոցիալական ցանցերում «Բողոք Վեոլիա ջրի դեմ» ակցիա է սկսվել: Մարդիկ ինքնակազմակերպվում են, ակտիվ տարածում իրենց բնակության հասցեներն ու նշում, թե քանի ժամ, քանի օր ջուր չեն ունեցել:

Բացի այդ, քաղաքացիները սոցցանցերում ընկերության անգործության մեջ դիտավորություն են տեսնում: Այս համատեքստում հատկանշական է, որ ավելի քան մեկ շաբաթ առաջ վարչապետ Նիկոլ Փաշինյանն ընդունել էր «Վեոլիա» ընկերության Կենտրոնական և Արևել յան Եվրոպայի երկրների գծով գործադիր փոխնախագահ Մալիկա Գենդուրիին: Ըստ պաշտոնական հաղորդագրության` «վարչապետը կարևորել է «Վեոլիա» ընկերության գործունեությունը մեր երկրում և հույս հայտնել, որ ՀՀ կառավարության և ընկերության միջև կձևավորվի սերտ համագործակցություն՝ ջրային արդյունավետ քաղաքականություն իրականացնելու ուղղությամբ»: Ընկերության ներկայացուցիչը անգամ նոր իրավիճակի վերաբերյալ է «ակնարկել»: Մալիկա Գենդուրին վստահություն է հայտնել է, որ «Հայաստանում տեղի ունեցած փոփոխություններից հետո նոր կառավարության հետ կծավալվի փոխշահավետ համագործակցություն, ինչը կնպաստի ընկերության կողմից մատուցվող ծառայությունների մակարդակի բարձրացմանը, ստանձնած պարտավորությունների կյանքի կոչմանը»:

Իսկ Նիկոլ Փաշինյանը վստահեցրել է` «մեր կառավարության գործունեության ընթացքում չեք բախվի վարչապետի շահերին, այլ կբախվեք միայն քաղաքացիների շահերի պաշտպանությանը»: Եվ որ ամենակարևորն է` վարչապետն առաջարկել է ձևավորել համատեղ աշխատանքային խումբ, որը կքննարկի բոլոր խնդիրներն ու կներկայացնի դրանց լուծման հստակ առաջարկություներ: Սակայն «Վեոլիա»–ի համար իրավիճակ չի փոխվել: Ստացվում է` «Վեոլիա Ջուր»–ը պայմանավորվածություններին հակառակ գործելաոճ է որդեգրել: Մնում է հասկանալ, թե վերոնշյալ ակցիան կոնկրետ ում դեմ է:

Հ.Գ

Հոդվածն արդեն պատրաստել էինք, երբ տեղեկացանք, որ «Վեոլիա ջուր» փակ բաժնետիրական ընկերության գլխավոր տնօրեն Կրիստիան Լըֆեն հայտարարել է, թե սաստիկ տապի պատճառով բնակիչները նորմայից 2 խորանարդ մետր ավելի են ջուր սպառում: Նա բնակիչներին հորդորել է խնայողաբար օգտագործել ջուրը և այն չմսխել ամենուրեք: Ընկերության գործառնական տնօրեն Գոռ Գրիգորյանն էլ հայտարարել է Երևանի ջրամատակարարման դադարեցումները կարգավորվելու են մինչ շաբաթվա վերջ: Համարենք` հավատացինք. 20 տարի սպասել ենք` մինչև շաբաթվա վերջ էլ կսպասենք:

Աննա Բադալյան