Հայաստանի տնտեսության մեջ արտաքին ներդրումներ բերելը շարունակում է մնալ առաջնահերթություն

Սմբատ Ավագյանը ֆեյսբուքյան իր էջում գրում է.

ԲՀԿ նախագահ Գագիկ Ծառուկյանը երեկ հանդիպել է Հնդկաստանի դեսպան Յոգեշվար Սանգվանի հետ, որի ժամանակ քննարկվել են Հայաստանի և Հնդկաստանի միջև երկկողմանի տնտեսական հարաբերությունների առավել խորացման և ընդլայման խնդիրները:

Հնդկաստանը այսօր աշխարհի ամենադինամիկ զարգացող երկրներից է: Ինչպես նշեց Գագիկ Ծառուկյանը, Հնդկաստանի տնտեսությունում կան ոլորտներ, որոնք կարող են փոխկապակցվել Հայաստանի համապատասխան ոլորտների հետ: Խոսքը մասնավորապես գնում է ադամանդագործության և ոսկերչության մասին, որոնք բավականին զարգացած են նաև Հայաստանում, արագ զարգացող ոլորտ է նաև դեղագործությունը, որը նույնպես կարող է լավագույնս դրսևորվել նաև Հայաստանում:

Սակայն Գագիկ Ծառուկյանը, կարևորելով տնտեսական ավանդական ճյուղերի կողքին նաև նորարական, ինովացիոն ոլորտների առկայությունը, գործնական քայլեր է անում նաև այդ ուղղությամբ: Մոտ օրերս Գագիկ Ծառուկյանը հյուրընկալելու է Հնդկաստանի թվով 140 գործարարների, որոնք պատրաստ են ներդրումներ անել Հայաստանում, մասնավորապես, կրիպտոարժույթների արտադրության ոլորտում, որի՝ աշխարհում ամենամեծ ֆերման Գագիկ Ծառուկյանի շնորհիվ շուտով գործելու է Հայաստանում:

Կարելի է ասել, որ 140 գործարարների՝ Հայաստան ժամանելու և ներդրումներ անելու պատրաստակամությունը գրեթե պետական մասշտաբի միջոցառում է, քանի որ խոսքը գնում է մեծաքանակ գործարարների մասին, որոնք հետաքրքրված են Հայաստանում ներդրումներ անելու հեռանկարով:

Այսպիսով կարող ենք փաստել, որ Գագիկ Ծառուկյանը հավատարիմ է մնում Հայաստան դրսից ներդրումներ գրավելու իր գործելաոճին, և 140 հնդիկ գործարարների՝ Հայաստան ժամանելը և Գագիկ Ծառուկյանի հետ ներդրումների մասին քննարկումներ անցկացնելը վկայում է այն մասին, որ դա նույնպես պայմանավորված է վերջինիս անձնական բարձր հեղինակությամբ: Հայաստանի տնտեսության մեջ արտաքին ներդրումներ բերելը շարունակում է մնալ առաջնահերթություն Գագիկ Ծառուկյանի համար, ինչի արդյունքում զարգանում են նոր ոլորտներ, ստեղծվում են բազմաթիվ նոր աշխատատեղեր: