Մշտապես արվող բարեգործությունն ընտրակաշառքի հետ նույնացնելը մանկամտություն է

Վարդգես Սահակյանը ֆեյսբուքյան իր էջում գրում է.

Զարմանալ կարելի է այն մարդկանց վրա, ովքեր անդրադառնալով մեծ աղմուկ հանած՝ Բարեգործության մասին օրենքում փոփոխություններ կատարելու Կառավարության նախագծին, որը հունիսի 19-ին մտնելու է ԱԺ, հայտնում են, որ որևէ քաղաքական ուժ չի կարող բարեգործության անվան տակ ընտրակաշառք բաժանել։

Միանգամից հակադարձելով` նշենք, որ մշտապես արվող բարեգործությունը չի կարող որակվել որպես ընտրակաշառք, որքան էլ ջանան որոշ շրջանակներ դա այդպես ներկայացնել։ Ավելին, դա ուղղակի մանկամտություն է, քանի որ մի կողմից մատնում են օրենքի նախագծի նեղ քաղաքական շարժառիթները՝ այն դարձնելով մահակ Ծառուկյանի դեմ, մյուս կողմից ցույց են տալիս, որ հայտարարության հեղինակները, մեղմ ասած, չեն տիրապետում իրավիճակին կամ խոսում են առանց ոլորտին քիչ թե շատ ծանոթ լինելու։
Բանը նրանում է, որ Ծառուկյանը բարեգործությամբ է զբաղվել տարիներ շարունակ, անկախ քաղաքական իրավիճակից, ընտրություններից, անկախ ամեն ինչից։ Նրա անունը ուղղակիորեն ասոցացվում է բարեգործության հետ, քանի որ յուրաքանչյուր ոք գիտի, որ Ծառուկյանը բարեգործություն է արել միշտ, ամենօրյա ռեժիմով։ Եվ հակառակը, բոլոր նրանք, ովքեր զբաղվել են «բարեգործությամբ» միայն նախընտրական շրջանում՝ որոշակի քվեների ակնկալիքով, նրանց երբեք չեն դիտարկել ու չեն էլ դիտարկում որպես բարեգործների։ Ինքներդ կարող եք հիշել նման «նախընտրական բարեգործների» և համոզվել ասվածի ճշմարտության մեջ։

Գագիկ Ծառուկյանը, օրինակ, 20 տարի շարունակ ուսանողներին օգնել է կրթաթոշակների հարցում։ 20 տարի անընդմեջ, անկախ քաղաքական իրավիճակից և ընտրական փուլից։ Տասնամյակներ շարունակ մարզերի ուսանողներին ապահովել է անվճար ավտոբուսներով՝ բուհ գնալու և տուն վերադառնալու համար։ Սա անգամ մեծ ցանկության դեպքում հնարավոր չէ կապել ընտրությունների և առավել ևս ընտրակաշառքի հետ, քանի որ 2013 թվականին որևէ ուսանողի օգնելով, անգամ հեռավոր ակնկալիք չես կարող ունենալ, որ, օրինակ, 2017 թվականին նա կարող է քվեարկել իրեն օգնած անձի օգտին։ Գուցե անգամ մոռացած լինի այդ մասին, կամ արտագաղթած երկրից։ Մի խոսքով անընդմեջ բարեգործության տակ անգամ մանրադիտակով դիտելու դեպքում չես կարող ընտրակաշառքի հետքեր գտնել։

Ի դեպ, ինչ վերաբերում է ընտրակաշառքին, բոլորը գիտեն, որ այդ հարցը կարգավորվում է ՀՀ Ընտրական օրենսգրքով, որը տալիս է դրա դեմ պայքարելու բավական միջոցներ։ Թերևս միայն նորաթուխների մտքով կանցներ Բարեգործության մասին օրենքը ծառայեցնել ընտրակաշառքի դեմ պայքարին, այն դեպքում, երբ դա բոլորովին այլ օրենքի տիրությում է։ Սրանով հենց իրենք անհարկի քաղաքականացնում են օրենքը կամ մատնում դրա ամբողջ ենթատեքստը։

Որպես այդ հայտարարության հիմնազուրկ լինելու ապացույց նշենք, որ «Գագիկ Ծառուկյան» բարեգործական հիմանդրամը, օրինակ, ակտիվորեն միջոցառումներ է իրականացրել մարտ և ապրիլ ամիսներին, երբ ՀՀ որևէ քաղաքացու մտքով անգամ չէր կարող անցնել, որ Հայաստանում շուտով իրավիճակ է փոխվելու, գործող իշխանությունները հրաժարական են տալու և առաջանալու է արտահերք ընտրությունների օրակարգ։ Այդ դեպքում ինչպես կարելի է բացատրել մարտ և ապրիլ ամիսներին բարեգործական միջոցառումները, եթե, ըստ որոշ ներկայացուցիչների, դրանք ունեն ընտրակաշառքի բնույթ։ Այդ տրամաբանությամբ Գագիկ Ծառուկյանի կողմից բարեգործական միջոցառումները պետք է դադարեցվեին 2017-ի համապետական ընտրություններից անմիջապես հետո, և վերսկսեին միայն 2022 թվականի հերթական ընտրությունների նախաշեմին։

Այնինչ բավական է մտնել «Գագիկ Ծառուկյան» բարեգործական հիմադրամի կայքէջ և դիտել 2017 թվականից ի վեր առայսօր իրականացվող բազմաթիվ մշակութային, մարզական, գիտական, սոցիալական բարեգործական ծրագրերի մասին։ Օրինակ ապրիլի 4-ին, երբ Հայաստանում հայտնի իրադարձությունների մասին անգամ պայծառատեսը չէր կարող գուշակել, հիմանդրամը միջոցառում է իրականացրել՝ բազմաթիվ անապահով ընտանիքներին դրամական օգնություն տրամադրելով, երբ արտահերթ ընտրության մասին որևէ կարծիք կարող էր ուղղակի ծիծաղ առաջացնել և հաջորդ ընտրությունները սպասվում էին միայն 4 տարի հետո։ Կամ այդ դեպքում ինչպե՞ս կարելի է բացատրել այն փաստը, որ Գագիկ Ծառուկյանը բարեգործությամբ է զբաղվել նաև այն ժամանակ, երբ ընդհանրապես հեռացել էր քաղաքականությունից և որևէ ընտրական պրոցեսից։

Մի խոսքով, ծիծաղելի են, պարոնայք, նմանատիպ մեկնաբանությունները։ Դրանք մատնում են միայն անտեղյակություն, քաղաքական կարճատեսություն և նոր օրենքի նախագիծը մահակ դարձնելու միտումի մասին։