Անժելա Խաչատրյան. «Երբ կվերանա ռեյտինգային համակարգը, այդ ժամանակ կլինեն լիիրավ արդար ու ազատ ընտրություններ և կլինի ժողովրդի կամարտահայտություն». «Փաստ»

«Փաստ» օրաթերթը գրում է.

«Ազատ դեմոկրատներ» կուսակցության փոխնախագահ Անժելա Խաչատրյանի խոսքով, կուսակցությունը շարժման օրերին ղեկավար կազմի մակարդակով եղել է հրապարակում, անգամ այն ժամանակ, երբ դեռ ոչ ոք չէր միացել:

Նրա խոսքով, ապրիլի 14–ից իրենք գնացել են, ողջունել ցուցարարներին ու ժողովրդին, ասել, որ սա երկար գործընթաց է, պետք է համբերություն ունենալ, աջակցել ժողովրդին, որպեսզի նա կարողանա իր ձայնը բարձրացնել և իշխանությունն իր ձեռքը վերցնել:

«Ուրախ ենք, որ գործընթացներն այսպիսի զարգացում ստացան, մեր հասարակությունը չհիասթափվեց և ի վերջո եկավ այն կարևոր հանգրվանին, որ հասկացավ, թե իր ձայնը որոշիչ է և ինքն իր քայլերով իրականում կարող է դառնալ իշխանություն: Այնտեղ ենք եղել, մեր համակիրները, մեր կուսակցության անդամները միշտ էլ եղել են ժողովրդի կողքին կանգնած»,– նշեց նա «Փաստ»–ի հետ զրույցում:

Հարցին, թե Նիկոլ Փաշինյանի կողմից միասին աշխատելու առաջարկ լինելու դեպքում պատրաստ են համագործակցել, Անժելա Խաչատրյանը պատասխանեց, որ «Ազատ դեմոկրատներ» կուսակցությունն ունի իր հստակ մոտեցումները թե՛ արտաքին և թե՛ ներքին քաղաքականության հետ կապված:

«Համագործակցություն կոչվածը հենց այնպես չի լինում, դա քաղաքական հստակ քննարկումներ են, բանակցություններ, կոնսուլտացիաներ, որոնք, կարծում եմ, սպասվում են առաջիկայում: Այս պահին պաշտոնական մակարդակի դեռևս որևէ քննարկում չկա, դրա համար ես զերծ կմնամ ինչ–որ բան ասելուց: Մենք բաց ենք քննարկումների համար, միշտ էլ բաց ենք եղել հանուն Հայաստանի և հայ ժողովրդի բարեկեցության գործելու և այս անգամ էլ ասում ենք, որ ցանկացած աջակցություն ու համագործակցություն պետք է լինի բանակցային սեղանի շուրջ»,– ընդգծեց նա:

Հնարավոր ԱԺ արտահերթ ընտրություններին մասնակցելու վերաբերյալ էլ նշեց, որ ինչպես ցանկացած քաղաքական ուժ, որը ցանկանում է իր ներդրումն ունենալ և իր քաղաքական գործունեությունը ծավալել Հայաստանում, պետք է մասնակցի կարևորագույն գործընթաց համարվող պրոցեսին՝ ընտրություններին, և «Ազատ դեմոկրատներ» կուսակցությունը ևս արտահերթ կամ հերթական ընտրությունների դեպքում մասնակցություն կունենա:

Դիտարկմանը, թե այդ ընտրություններին ՀՀԿ–ն իր ներկայիս վարկանիշով մեծաթիվ ձայներ չի կարողանա ունենալ, փոխարենը՝ այսօր ընդդիմադիր կամ այդպես իրենց կոչող քաղաքական ուժերն ավելի մեծ քանակ կունենան խորհրդարանում, Խաչատրյանը պատասխանեց, թե երբ կհասնենք ընտրական փուլ, կհասկանանք ովքեր են այդ գործընթացի հիմնական մասնակիցները, այդ ժամանակ կարող ենք ասել՝ ում վարկանիշը ինչպիսին է:

«Հիմա դեռ վաղ է ենթադրություններ անելու համար: Հանրապետական կուսակցությունը, լինելով երկրում առկա թե՛ աղքատության և թե՛ ներքին խնդիրների հեղինակը, այո, կարող ենք ասել, որ իր վարկանիշով չի փայլում: Թե մնացածներն ինչ վարկանիշ կունենան՝ ընտրական գործընթացն ու առաջ քաշած ծրագրերը ցույց կտան:

Նախևառաջ պետք է վերանա ռեյտինգային կոչվող համակարգը, որը Ընտրական օրենսգրքի մեջ փոփոխություններ անելու ամենահիմնաքարային կետն է: Սա նաև մենք ենք առաջ քաշում, որովհետև մենք 2017 թ. ընտրությունների ժամանակ հստակ տեսանք, որ ընտրական գործընթացների և ընտրական մասնագիտական–գաղափարական բանավեճերի վրա էական ու շատ արատավոր ազդեցություն ուներ ռեյտինգային համակարգը, որը կարծես թե փողի, քսակի պայքար էր, այլ ոչ թե՝ քաղաքական գաղափարների:

Երբ կատարվի նաև այս փոփոխությունը ի թիվս այլ փոփոխությունների, և լինեն մաքուր, ազատ ընտրություններ, այդ ժամանակ ՀՀ քաղաքացին հնարավորություն կունենա կողմնորոշվելու՝ ըստ գաղափարների և ըստ քաղաքական ծրագրի: Այդ ժամանակ կլինեն լիիրավ արդար ու ազատ ընտրություններ, և կլինի ժողովրդի կամարտահայտություն»:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»