Իրանում ուշիուշով հետևում են հայաստանյան թավշյա հեղափոխությանը . «Փաստ»

«Փաստ» օրաթերթը գրում է.

Հայաստանի Հանրապետության դաշնակից Իրանի Իսլամական Հանրապետությունում ուշի ուշով հետևում են Հայաստանում տեղի ունեցող ներքաղաքական իրադարձություններին:

«Հայաստանում տեղի ունեցող յուրաքանչյուր իրադարձություն բավականին կարևոր է, քանզի այն դիտարկվում է Իրանի ազգային անվտանգության տեսանկյունից: Հարցը կարևոր է նաև, քանի որ կարծես թե Իրանի գլխին նոր ամպեր են կուտակվում և նման իրավիճակում իրենք ուզում են հասկանալ, թե տարածաշրջանում տեղի ունեցող յուրաքանչյուր փոփոխություն իրականում ինչ խնդրի է միտված»,– «Փաստ»–ի հետ զրույցում ասաց իրանագետ Գոհար Իսկանդարյանը:

Նա նաև նշեց, որ Հայաստանում տեղի ունեցող գործողությունների ողջ ընթացքում ներհայաստանյան տարաբնույթ քննարկումների ժամանակ տեսակետ էր հնչեցվում, թե թավշյա հեղափոխությունը կարող է նաև արևմտյան ծրագիր լինել: Եվ բնական է, որ դա, ինչ խոսք, կարող էր անհանգստացնել հարևան երկրի ղեկավարությանը: Ուշագրավ է, որ, ինչպես ողջ աշխարհի, այնպես էլ իրանական մամուլը, հայատանյան ներքաղաքական իրադարձություններին անդրադառնալու հարցում ամենևին էլ պասիվություն չի ցուցաբերել:

«Գրեթե ամեն օր նյութեր են եղել իրանական մամուլում: Ե՛վ իրանական ԶԼՄ–ներով, և՛ օգտատերերի շրջանում անդրադարձ էր կատարվում հայաստանյան իրադարձություններին: Եվ եթե իրենք սկզբնական շրջանում ամբողջական պատկերացում չունեին և դեռ տարակուսանք կար, թե այս ամենը կարող է արևմտյան ինչ–որ նախագաիծ լինել, ապա օրեր անց վերլուծություններից պարզ էր դառնում, որ այն, ինչ տեղի է ունենում Հայաստանում զուտ ներհայաստանյան իրադարձությունների հետևանք է և արևմտյան կողմնորոշման մասին որևէ խոսք չկա»,– ասաց Գ. Իսկանդարյանը:

Իրանագետի կարծիքով հարևան երկրում բավականին լավ են ընկալվել նաև Նիկոլ Փաշինյանի հայտարարությունները, համաձայն որոնց թավշյա հեղափոխության արդյունքում Հայաստանը համատարիմ է մնալու իր որդեգրած արտաքին քաղաքականությանը: Իրանի համար կարևոր է եղել նաև այն հայտարարությունը, համաձայն որի Հայաստանն այսուհետ ևս արժևորում է Իրանի հետ համագործակցությունը և կարծում է, որ հայ–իրանական հարաբերությունները չպետք է կառուցվեն մեկ այլ երկրի հետ ունեցած կամ ձևավորվելիք հարաբերությունների հաշվին:

«Հետաքրքիր էր նաև, որ այս տարի Հայոց ցեղասպանության օրը՝ ապրիլի 24–ին տեղի ունեցած երթի ժամանակ իրանական իշխանությունները թույլատրել էին, որպեսզի մասնակիցներն իրենց բողոքի ակցիան իրականացնեն նաև Իրանում Թուրքիայի դեսպանատան մոտ: Դա միշտ չէ, որ հնարավոր է լինում: Իմ դիտարկումներն այս առիթով թույլ են տալիս եզրակացնել, որ երբ Իրանը թուրքական կողմից դժգոհություններ է ունենում, այդ դեպքերում է հայ համայնքին թույլատրում նման ակցիաներ իրականացնել»,– ասաց իրանագետը:

Խոսելով ներհայաստանյան իրադարձությունների վերաբերյալ իրանահայ համայնքի ներկայացուցիչների տրամադրությունների և տեսակետների մասին, Գ. Իսկանդարյանը նշեց, որ իրանահայ մամուլի ուսումնասիրություններից պարզ է դառնում, որ նրանք նույնպես քաջատեղյակ են այս ամենին:

«Պետք է փաստենք, որ Իրանի Իսլամական Հանրապետությունում հայ համայնքի շրջանում բավականին ակտիվ է «Հայ հեղափոխական դաշնակցություն» կուսակցությունը: Եվ բնականաբար իրենք ավելի հակված են դաշնակցության գործելաոճին և համակարծիք են լինում նրանց մոտեցումների հետ»,– ասաց իրանագետը:

Շարունակությունը՝ «Փաստ» օրաթերթի այսօրվա համարում

Այս թեմայով Իմ ծննդյան օրվա լավագույն նվերը․ Գոհար Ավետիսյանը որդու հետ լուսանկարներ է հրապարակել «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ»