Էմիլ Օրդուխանյան. «ՀՀԿ–ն կարող է ստանձնել կառուցողական ընդդիմության գործառույթը ԱԺ–ում». «Փաստ»

«Փաստ» օրաթերթը գրում է.

Երեկ պաշտոնաթող Սերժ Սարգսյանը հանդիպել էր Ազգային ժողովի ՀՀԿ խմբակցության պատգամավորների հետ: Հայտարարություն էր տարածվել, որ Հանրապետական խմբակցությունն առանց նախապայմանների պատրաստ է բոլոր կողմերի հետ քննարկել ցանկացած հարց: Միաժամանակ ասվում էր, որ պայմանավորվածություն է ձեռք բերվել կուսակցության ղեկավար մարմիններում կուսակցության նախագահի փոփոխության վերաբերյալ քննարկումներ սկսելու շուրջ:

Առանց նախապայմանների քննարկումներ անելը կարո՞ղ է խոսել այն մասին, որ ժողովուրդը վերջնական հաղթանակի է հասել, թե դեռ պետք է սպասել և «զենքերը» վայր չդնել: Սրան ի պատասխան քաղաքագետ Էմիլ Օրդուխանյանը «Փաստ»–ի հետ զրույցում նշեց, որ այդ ամենը թավշյա հեղափոխության տրամաբանության մեջ է, այս ամենը պահանջում է թավշյա հանգուցալուծում՝ առանց որևէ էքսցեսների: Ըստ քաղաքագետի՝ սա անձերի միջև պայքարի և արժեքների հեղափոխություն չէ: Նշում է, որ իրականության հետ պետք է հաշվի նստեն բոլոր կողմերը ու չփորձեն էմոցիոնալ կամ այլ մոտիվացիաներով ազդեցություններ ունենալ:

«Իրողությունը պարզ է՝ երկիրն արդեն մոտ երկու շաբաթ այս վիճակում է և հանգուցալուծում է պահանջում: Գուցե նաև սրանով էր պայմանավորված այդ հանդիպումը և առանց նախապայմանների բանակցությունների շուրջ իշխանության խաղաղ փոխանցման մասին զրուցելը: Հաշվի առնելով նաև միջազգային հանրության ուշադրությունը այս իրողությունների վրա, միևնույն ժամանակ նաև խոշոր գերտերությունների դեսպանների պաշտոնական կարծիքներն ու ողջունելը՝ ժողովրդավար ճանապարհով Հայաստանում իշխանության փոփոխման իրատեսական հնարավարության ստեղծման մասին: Նույնիսկ միջազգային հարթակում ոչ ոք չի կարողանում այս գործընթացները համեմատել այլ երկրներում տեղի ունեցած հեղափոխության փորձերի հետ: Սա որակական բարձր նիշ ունեցող քաղաքացիական վարքագծի դրսևորում է՝ պայմանավորված հեղափոխական գործընթաց է, բացառապես խաղաղ և ոչ բռնի սկզբունքով: Ամենաիրատեսական և ողջամիտ լուծումը պետք է լինի այս գործընթացի թավշյա ավարտը»,– նկատեց նա:

Անդրադառնալով ՀՀԿ–ի նախագահի փոփոխության մասին ակնարկին և մեր այն հարցին, թե ՀՀԿ–ականների կողմից այս պահին ինչ–որ «վտանգ» կարելի՞ է սպասել, Օրդուխանյանը նշեց, թե չգիտի այդ հրաժարականը կլինի, թե ոչ, բայց եթե լինի, կլինի օբյեկտիվ ու տրամաբանական: Ըստ նրա, այս պահին իշխող ուժի առաջնորդը որպես պետության ղեկավար հրաժարական է տալիս, նշելով նաև, որ սխալվում էր և ճիշտ էր հեղափոխության առաջնորդը: Օրդուխանյանի համոզմամբ, սա չի կարող չանդրադառնալ նաև կուսակցության վրա: Կուսակցությունն էլ պետք է վերադասավորվի, վերակազմավորվի ու արդիականանա:

«Իսկ ինչ վերաբերում է կուսակցության անվանափոխությանը, մենք այսպիսի երևույթներ շատ ենք տեսել մեզ մոտ: Բայց եթե անձինք մնալու են նույնը, ձևական, արտաքին ֆորմալ փոփոխությունը կլինի առանց բովանդակային փոփոխության, անօգուտ կլինի: Մեր հասարակության մեջ բոլորն իրար ճանաչում են, առավել ևս՝ քաղաքական դաշտում: Կարծում եմ ՀՀԿ–ն էլ կունենա առողջ զանգված: Տարիներ շարունակ այս ուժը ինստիտուցիոնալացման ուղի է անցել, թող արդիականանա: Քանի որ ժողովրդավարությունը պահանջում է քաղաքական պլյուռալիզմ, կարող է նաև մասնակցել արտահերթ ընտրություններին:

Իրենք միշտ մեղադրել են, որ կառուցողական ընդդիմություն չկա: Գուցե իրենք ստանձնեն այդ կառուցողական ընդդիմության ֆունկցիան խորհրդարանում: Քաղաքականության մեջ տագնապ վիճակ չի կարող լինել: Միշտ պետք է փոփոխություն լինի: Մի ուժն այսօր իշխող է, վաղը կարող է դառնալ ընդդիմադիր»,– ասաց նա:

Դիտարկմանը, թե սա բացառիկ էր և տարիներ շարունակ նման բան չէինք էլ ակնկալում, պատասխանեց, թե սա որակական բարձր նիշ ունեցող գործընթաց է: եվ ամբողջ քաղաքակիրթ աշխարհը ողջունում է սա: Քաղաքագետի խոսքով, մենք չտեսանք որևէ պետություն քննադատի կամ բացասական ֆոնի ներքո ներկայացնի այս ամենը:

Անդրադառնալով նաև երեկ Կարեն Կարապետյանի և Շիրակի մարզպետի հրաժարականների մասին կեղծ լուրերին, դրանց հեղինակների և տարածման պատճառներին, Օրդուխանյանը նշեց, թե այսօր տեղեկատվական պատերազմի շրջան է:

«Սոցցանցերով ու լրատվամիջոցներով են նման բաներ տարածվում: Վերջինները նաև տարբեր ուժերի ազդեցություններ են կրում: Սա կարող է միտված լինել հասարակության տրամադրություններն ուսումնասիրելուն: Ինֆորմացիան գցում են, տեսնում են արձագանքն ինչպիսին է, հինգ րոպե հետո հերքում են կամ հաստատում: 21–րդ դարին հատուկ տեղեկատվական պատերազմների դրսևորում է»,– նշեց նա:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»