Լարիսա Ալավերդյանի համար քաղաքական դաշտը գայթակղիչ չէ. «Փաստ»

«Փաստ» օրաթերթը գրում է.

Մարդու իրավունքների նախկին պաշտպան, ԱԺ նախկին պատգամավոր Լարիսա Ալավերդյանը, որոշել է չմասնակցել առաջիկա խորհրդարանական ընտրություններին, քանի որ փորձագիտական և հասարակական դաշտում իրեն ավելի լավ է զգում, քան քաղաքականում: Նա իրեն ավելի ուժեղ և կայուն է զգում, թե՛ որպես ՀԿ գործադիր տնօրեն և թե՛ որպես Արցախի հարցերով փորձագետ:
Բոլոր ուժերին, ովքեր արդեն հասցրել են իր հետ համագործակցելու առաջարկ անել, հասարակական գործիչը պատասխանել է, որ ինքն իր ունակություններն ու հմտությունները կարող է ներդնել միայն ու միայն որպես փորձագետ՝ ծառայելով ազգին ու պետությանը:
«Եվ եթե որևէ քաղաքական ուժ ինձ որպես փորձագետ հրավիրի, ես սիրով կընդունեմ, բայց քաղաքական դաշտում ես ինձ ուղղակի չեմ տեսնում»,– «Փաստին» ասաց Լ. Ալավերդյանը:
Խոսելով ներկայում տեղի ունեցող քաղաքական պրոցեսների մասին, նշեց, որ տեղի ունեցող իրադարձությունները վկայում են այն մասին, որ քաղաքական դաշտը դեռևս կայացման ճանապարհին է:
«Նախ՝ բոլոր քաղաքական միավորումները խոսում են ինչի մասին ասես, բացի նրանից, թե արդյո՞ք նրանք ընդհանուր գաղափարախոսության, ընդհանուր մեթոդների, թե ձևերի շուրջ են միավորվում: Իմ կարծիքով՝ ներկա միավորումներ կամ դաշինքներ ստեղծելը գործընթացներ են, որտեղ «նմանը զնմանին կգտանե» տարբերակով են փորձում իրար գտնել: Երկրորդը՝ գաղափարախոսության ներկապնակը շատ միապաղաղ է, քանի որ բոլորը հանդես են գալիս ազատական գաղափարախոսությամբ, բայց դժվար է պատկերացնել, որ այդ տեսանկյունից ներկայացող բոլոր խավերը ազատական գաղափարախոսության ջատագովներ են»,– ասաց Լ. Ալավերդյանը:
Նրա կարծիքով՝ միապաղաղությունն արտահայտվում է նաև նրանով, որ բոլոր զրույցները գնում են պահի տակ եղած կամ արդեն իսկ հասունացած խնդիրների շուրջ միավորվելուն: Երկրի կառավարման համակարգի փոփոխությունը՝ կիսանախագահականից անցումը խորհրդարանականին, Լ. Ալավերդյանի կարծիքով, կարող է խթանել կուսակցական համակարգերի զարգացմանը, որի արդյունքում, բայց՝ ապագայում, մենք կկարողանանք ունենալ գաղափարախոսությունների բազմազանություն և կուտակված հարցերի լուծման տարբերակված մոտեցումներ:
«Ես դժվար եմ պատկերացնում, որոշ նախկին պետական գործիչների գործունեությունը քաղաքական, այն էլ՝ ընդդիմադիր դաշտում: Նրանց համար է՛լ է դժվար լինելու իրականացնել իրենց քաղաքական ծրագրերը: Այս երկու ուղղություններն էլ բոլորովին տարբեր ունակություններ, հմտություններ և մինչև անգամ անձնական պատմություններ պահանջող երևույթներ են, և ես կարծում եմ, որ մենք առայժմ տեսնում ենք խմբերի ստեղծում, ոչ թե քաղաքական ուժերի»,– ասաց Ալավերդյանը:
Խոսելով նոր ձևավորված որոշ ուժերի հանդեպ իր ունեցած դրական վերաբերմունքի մասին, նշեց, որ իր կարծիքով «Ելք» դաշինքը միակն է, որը թե՛ խոսքի կուլտուրայի և թե՛ գաղափարներ առաջարկելու տեսանկյունից ավելի շատ ինտելեկտուալ դաշտում է հանդես գալիս:
«Այսինքն, դա բոլորովին նոր ուժ է, և եթե Արամ Սարգսյանը միացել է այդ ուժին և կիսում է նրանց գաղափարները, ապա դա շատ ողջունելի է: Սակայն, դժվարանում եմ, կանխատեսել, թե արդյո՞ք նրանք կարող են գործոն դառնալ այս ընտրությունների ընթացքում և արդյունքում»,– ասաց Լ. Ալավերդյանը:

Շարունակությունը` «Փաստ» օրաթերթի այսօրվա համարում: