Երկրում մթնոլորտ է փոխվել. «Փաստ»

«Փաստ» օրաթերթը գրում է.

Հայաստանյան ներքաղաքական դաշտում իրադարձությունները շատ արագ են զարգանում: Սերժ Սարգսյանի հրաժարականից հետո իրավիճակն, այնուամենայնիվ, բարդ է: Ամբողջ Հայաստանում վերսկսվել են քաղաքացիական անհնազանդության խաղաղ բնույթ կրող ակցիաները: Պատճառն, ըստ էության, վարչապետի ժամանակավոր պաշտոնակատար Կարեն Կարապետյանի հայտարարություններն են: Անդրադառնալով իր և Նիկոլ Փաշինյանի չեղարկված հանդիպմանը, Կ. Կարապետյանը մասնավորապես հայտարարել էր, որ հանդիպումը տեղի չի ունենալու, քանի որ Ն. Փաշինյանը միակողմանի առաջադրել է նոր պահանջներ, մասնավորապես` հանդիպման ձևաչափի, օրակարգի և լուսաբանման առումով. «Վերջինիս կողմից առաջարկվել է մեր կողմից մասնակցող անձանց ցանկը, ինչպես նաև հայտարարվել, որ բանակցելու է բացառապես իր օրակարգի շուրջ»:

Նիկոլ Փաշինյանն էլ իր պարզաբանումն էր ներկայացրել, որտեղ մասնավորապես նշել էր. «Ես ի սկզբանե ասել եմ, որ բանակցությունները կարող են ընթանալ միայն մեր նշած 4 կետերի շուրջ, որից 1–ը՝ Ս. Սարգսյանի հրաժարականն արդեն իրագործված է: Իրադարձություններն ու ՀՀԿ–ի այս լռությունը ստիպում են մտածել, որ ՀՀԿ–ն ուզում է Ս. Սարգսյանի հրաժարականն օգտագործել՝ ՀՀԿ–ին իշխանության պահելու մեջ: Մենք չենք կարող թույլ տալ, որ այս կոռումպացված համակարգը սկսի գործել: Ս. Սարգսյանի հրաժարականից հետո ժողովրդի հաղթանակը չի կարող մնալ կիսատ ճանապարհին»: «Ազատության» հետ զրույցում էլ նա նշել է, որ Կ. Կարապետյանը լավ չի հասկացել, թե իրենք ինչ են ասում. «Վարչապետը պետք է ընտրվի Ազգային ժողովում, պետք է օրենքի համապատասխան առաջադրվի ԱԺ խմբակցության կողմից, իսկ ժողովուրդը հրապարակում մինչ այդ պետք է համաձայնություն տա որևէ թեկնածուի»:

Քաղաքագետ Ռուբեն Մեհրաբյանը, անդրադառնալով ներքաղաքական իրավիճակին, նախ նշեց. «Սա մի իրավիճակ է, որի հանգուցալուծումը կարող է լինել արտահերթ ընտրությունների մասին համատեղ պայմանավորվածությունը, բացի այդ, նաև համատեղ պայմանավորվածությունը՝ անցումային շրջան ապահովելու մասին: Նշվածը մեզ անցնցում կտանի դեպի այնպիսի խորհրդարանական ընտրություններ, որի արդյունքները որևէ մեկի մոտ որևէ կասկած չեն առաջացնի: Մենք արդյունքում կունենանք լեգիտիմ Ազգային ժողով, որը կձևավորի լեգիտիմ կառավարություն: Մենք կունենանք լեգիտիմ վարչապետ, որը պատշաճ ձևով կներկայացնի Հայաստանը թե՛ երկրի ներսում, թե՛ դրսում»:

Դիտարկմանը, թե, այնուամենայնիվ, ՀՀԿ–ն կարծես այլ ուղղությամբ է գնում, և իշխանությունն անցնցում հանձնելու պահանջը չի կատարում, քաղաքագետը արձագանքեց. «Համենայն դեպս, պարզ էր, որ թե՛ ՀՀԿ–ն, թե՛ ընդհանրապես ողջ իշխանական համակարգը փորձում էր դասավորվել Կարեն Կարապետյանի՝ որպես նոր առաջնորդի անձի շուրջ: Հասկացանք նաև, որ դրա հետ կապված խիստ բացասական դիրքորոշում կա: Իսկ օրվա վերջում էլ Կ. Կարապետյանը հայտարարեց, որ պատրաստ են քննարկել նաև արտահերթ խորհրդարանական ընտրություններ անցկացնելու մասին»:

Քաղաքագետը շեշտեց, որ կարևոր է նաև այն փաստը, որ այս գործընթացների նկատմամբ բավականին բարենպաստ դիրքորոշում կա նաև միջազգային հանրության կողմից: «Բոլորը հուսով են, որ այս ամենը կլուծվի շատ արագ և բանական սահմաններում: Համենայն դեպս կարծում եմ, որ այդ ամենին հասնելու համար ոչինչ չի խանգարում: Ըստ իս՝ հիմնական պայմանավորվածությունների ուրվագծերը մենք արդեն այսօր կունենանք»:

Ռուբեն Մեհրաբյանը չի կարծում, որ ՀՀԿ–ին կհաջողվի իրավիճակը դասավորել այնպես, որ հնարավոր ընտրությունների ժամանակ իր օգտին և արդեն հայտնի միջոցներով կկարողանա որևէ արդյունքի հասնել:

«Ես այլևս չունեմ այդ մտավախությունը: Երկրում մթնոլորտ է փոխվել: Ընտրակաշառքն ու ահաբեկումը այլևս չեն աշխատելու: Չի աշխատելու նաև ադմինիստրատիվ ռեսուրսը: Հետևապես՝ հուսով եմ, որ քաղաքական ուժերին վերադասավորվելու ժամանակ կտրվի: Այս թվում նաև «Ելք» դաշինքին, որի խմբակցության ղեկավարը մինչ այս պահը դեռ Նիկոլ Փաշինյանն է: Կարծում եմ՝ իրենք կունենան այնքան հեռատեսություն, որ դաշինքը կպահպանեն նաև ընտրությունների ընթացքում, ինչի միջոցով կգնան ու կձևավորեն վստահություն վայելող ու լեգիտիմ Ազգային ժողով»,– եզրափակեց քաղաքագետը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»