Պետրոս Մակեյան. «Արդեն պրովոկացիոն փոքր խմբեր են պատրաստում, որ ներդնեն ժողովրդի մեջ». «Փաստ»

«Փաստ» օրաթերթը գրում է.

«Ժողովրդավարական հայրենիք» կուսակցության նախագահ Պետրոս Մակեյանը «Փաստ»–ի հետ զրույցում նշեց, որ ամիսներ առաջ տված հարցազրույցներից մեկում տեսակետ է հայտնել, որ եթե Սերժ Սարգսյանը առաջադրվի վարչապետի պաշտոնում, հասարակությունը կպոռթկա:

«Շատերը իմ այդ տեսակետը թերահավատությամբ, նույնիսկ հեգնանքով ընդունեցին, բայց հիմա արդեն տեսնում են, թե ինչ է կատարվում: Եվ դա պատահական չէ, քանի որ այս տարիների ընթացքում հասարակության մեջ այնքան շատ բացասական էներգիա է կուտակվել, որ պետք է մի տեղից դուրս գա: Եվ Նիկոլը կարողացավ այդ պոռթկումն իրագործել, և պետք է նրան ողջունել, իսկ թե ինչ է կատարվում Ազգային ժողովում, չեմ հետևում, քանի որ Հայաստանում արդեն 20 տարի է ընտրություն չի լինում, քանի որ ընտրական համակարգ չկա: Եվ դա պետք է արձանագրել»,– ասաց քաղաքական գործիչը:

Նրա կարծիքով դաշտում գործող բոլոր ակտիվ քաղաքական ուժերը, որոնք դեմ են այս համակարգին և Սերժ Սարգսյանի վարչապետությանը, հրապարակում են և ժողովրդի կողքին:

«Պարտադիր չէ, որ բոլորը ելույթ ունենան, որ երևա, թե ժողովրդի կողքին ենք: Այս պայքարը մի փոքր նման չէ մյուս հանրահավաքներին: Եվ ինչ կա որ, թող Նիկոլն էլ ոչ ստանդարտ ձևով շարժվի առաջ: Բայց կարծում եմ, որ ինչ–որ պահի նա կմտածի քաղաքական սոուսը ընդլայնելու, թանձրացնելու մասին: Եվ ճիշտ են այն դիտարկումները, որ պայքարի քաղաքական մասնաբաժինը պետք է ավելանա»,– ասաց Պ. Մակեյանը:

«Ժողովրդավարական հայրենիք» կուսակցության առաջնորդը նշեց նաև, որ ապրիլի 16–ին, երբ ոստիկանությունը նռնակներ նետեց ժողովրդի վրա, երկու խնդիր էր ուզում լուծել, սակայն հաջորդ օրը պարզ դարձավ, որ այն հակառակ էֆեկտ է ունեցել:

«Ոստիկանությունը, հոգեբանական խնդիր լուծելով, ցանկանում էր վախի մթնոլորտ ձևավորել: Ինձ էլ էր հետաքրքրում, թե դա ինչ հետևանք կունենա ժողովրդի վրա՝ մարդիկ կավելանա՞ն, թե՝ կպակասեն: Հիմա տեսնում ենք, որ կրկնակի ավելացել են: Այսինքն, ինչքան ուզում է ուժ կիրառեն, նման պարագաներում արդեն գործում է ֆիզիկայի հայտնի օրենքը: Եվ ինչքան մեծացնեն ճնշումը, այնքան ավելի կմեծանա հասարակության հակազդեցությունը»,– ասաց Պ. Մակեյանը:

Քաղաքական գործչի կարծիքով իշխանությունները պետք է հասկանան, որ այլևս հնարավոր չէ նման կերպ շարունակել: Դրա համար էլ Հայաստանի Հանրապետությունում միայն Երևանը չէ, որ ոտքի է կանգնել:

«Եթե պետք է ժողովրդին ճնշեն, այդ դեպքում թող դիմեն Ալիևի օգնությանը, որովհետև նույն ոճով են վարվում ժողովրդի հետ, ինչպես Ալիևը կվարվեր: Եվ քանի դեռ իշխանություններն իրենց առողջ բանականությունը չեն կորցրել, պետք է հասկանան, որ այսպես շարունակելը և՛ երկրի պետականությունը կվտանգի, և՛ իրենց ֆիզիկական գոյությունը: Պետք է հաշվի առնել, որ եթե ժողովուրդը ոտքի կանգնի, ապա ոչինչ այլևս չի կարող կանգնեցնել նրան»,– ասաց Պ. Մակեյանը:

Եվ դա է պատճառը, որ ժողովուրդը իշխանություններից ձերբազատվելու համար ժամանակ առ ժամանակ ոտքի է կանգնում, բայց ամեն անգամ ստացվում է այնպես, որ նրանցից ազատվել չի կարողանում:

«Ինչքան կարելի է չհասկանալ, որ ժողովրդի ձայնը ապրանքի վերածել ու գնել չի կարելի: Եվ բոլոր նրանք, ովքեր նման կերպ են վարվում ժողովրդի հետ, այդ ժողովրդին սննկացրել են ու դրա հաշվին են օլիգարխներ դարձել: Հիմա էլ փորձում են նրանց ձայնն ապրանքի ձևով գնել»,– ասաց Պ. Մակեյանը:

Խոսելով երեկ ԱԺ–ում վարչապետի թեկնածու Սերժ Սարգսյան–ընդդիմություն հարց ու պատասխանի մասին, նա կարծիք հայտնեց, որ սուր հարցերն ու վարչապետի թեկնածուի հասցեին հնչեցված քննադատություններն ընդամենը թատերականացված ներկայացում է եղել:

«Բոլորն էլ իրենց պահվածքի պատճառով ուզում են մի ձևով իրենց դեմքը փրկել: Բոլորն էլ հայտարարել են, որ եթե ժողովրդի հանդեպ բռնություն գործադրեն, նրանք ժողովրդի կողքին կլինեն:Բայց այսօր ամբողջ օրը ոստիկանությունը բռնի ուժ է կիրառում ժողովրդի հանդեպ, բա ո՞ւր են, չեն գալիս, մտել են Ազգային ժողով ու դուրս չեն գալիս: Մենք տեղեկություն ունենք, որ արդեն պրովոկացիոն փոքր խմբեր են պատրաստում, որ ներդնեն ժողովրդի մեջ»,– ասաց Պ. Մակեյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»