ՔՊ վերջին կանգառին մնաց երկու օր. «Փաստ»

«Փաստ» օրաթերթը գրում է.

«Քաղաքացիական պայմանագիր» կուսակցության խորհրդի, ինչպես նաև Երևանի ավագանու «Ելք» խմբակցության անդամ Արայիկ Հարությունյանը «Փաստ»–ի հետ զրույցում նշեց, որ իրենց քայլարշավը լավ է անցնում և մինչ օրս քայլարշավի մասնակիցները որևէ հետապնդումների կամ ճնշումների չեն ենթարկվել:

«Մեր կամքն ամուր է, մենք արդեն 11–րդ օրն է այսօր, և արդեն անցել ենք մոտ 140 կմ ճանապարհ՝ Շիրակի մարզից Լոռու, Տավուշի մարզերով հասել ենք Գեղարքունիքի մարզ: Ներկայում շարժվում ենք դեպի Հրազդան: Տպավորությունները լավ են, իսկ հասարակության արձագանքն առաջին օրերի համեմատ ավելանում է: Մայրուղիներում, վարորդների արձագանքը մեր քայլարշավին ցույց է տալիս, որ մեր այս տասը օրերի իրազեկման փուլը լավ է անցնում և մարդիկ տեղեկացված են: Վերջին օրերի ընթացքում իրազեկման աշխատանքներն ավելի ինտենսիվ կդարձնենք, որպեսզի Հայաստանում եթե 100%–ով չստացվի իրազեկել, ապա շատ փոքր թվով մարդ մնա, ով տեղեկացված չի լինի մեր նախաձեռնության մասին: Պետք է նաև ջանքեր գործադրենք, որպեսզի ապրիլի 13–ին, ժամը 18:00–ին «Ազատության հրապարակում» առավելագույն մասնակցություն կարողանանք ապահովել, ինչին էլ ուղղված էր մեր այս 14–օրյա քայլարշավը»,– ասաց Ա. Հարությունյանը:

Խոսելով ճանապարհին խորհրդանշական ծառեր տնկելու մասին, նա նշեց, որ երեկ քայլարշավի մասնակիցները տնկեցին «ուսանողի ծառը», որը խորհրդանշական բնույթ ունի, քանի որ նման նախաձեռնությունների ժամանակ կարևորում են ուսանողների և երիտասարդների ներգրավվածությունը:

«11 օր քայլել եմ մեր թիմի հետ, բայց այսօր մի քանի ժամով եկել եմ Երևան, որպեսզի ուսանողների հետ հանդիպումների ժամանակ քննարկենք ուսանողների հնարավոր ներգրավվածության հարցը: Եվ առիթ ունեմ կոչ անելու ուսանողներին, որպեսզի ապրիլի 16–ին և 17–ին դասադուլ հայտարարեն և ակտիվորեն ներգրավվեն Սերժ Սարգսյանի պաշտոնավարման երրորդ ժամկետը կանխելու գործընթացում»,– ասաց Ա. Հարությունյանը:

Նա նաև տեղեկացրեց, որ «Քաղաքացիական պայմանագիր» կուսակցության և «Հանուն Հայաստան պետության» ճակատի միջև մինչև ապրիլի 13–ը գործողությունները համակարգելու պայմանավորվածության կա, իսկ դրանից հետո համատեղ քայլերի հարցը կքննարկվի ապրիլի 13–ի հանրահավաքից հետո:

Խոսելով ՀՀ նախագահ Արմեն Սարգսյանի երդմնակալության արարողությանը մասնակցելու մասին, նա նշեց, որ «Ելք» խմբակցության անդամները չեն մասնակցել արարողությանը:

Ա. Հարությունյանը նշեց նաև, որ «ՔՊ» կուսակցության քայլերթին բավականին մեծ թվով երիտասարդներ են մասնակցում: Մյուս կողմից իր շփումները ցույց են տալիս, որ երիտասարդների շրջանում բավականին մեծ է այն գիտակցումը, որ Սերժ Սարգսյանի պաշտոնավարման երրորդ ժամկետը մի շարք լրջագույն խնդիրներ կառաջացնի մեր պետության համար:

«Դա Հայաստանի ադրբեջանացումն է, լիդերի անփոխարինելիության թեզը շրջանառության մեջ դնելը, որը քաղաքական դաշտի դեգրադացում է նշանակում, և թույլ չի տա երկրի քաղաքական կյանքում առաջընթաց ապահովել: Բացի այդ, վերջին 10 տարիներին Սերժ Սարգսյանը և Հանրապետական կուսակցությունը իրենց կառավարման ընթացքում ամենամեծ ձախողումներն են ունեցել: Այդ բոլորը հաշվի առնելով ենք սկսել պայքարը, և առաջիկա օրերին պատրաստվում ենք մեր ջանքերը կրկնապատկել, որպեսզի հաջողության հասնենք»,– ասաց Ա. Հարությունյանը:

Ի դեպ, երեկ Ֆեյսբուք սոցիալական ցանցի միջոցով «ՔՊ» կուսակցության նախագահ, ԱԺ պատգամավոր Նիկոլ Փաշինյանը ուղիղ միացման ժամանակ տեղեկացրեց, որ իր հետ հեռախոսային կապ է հաստատել «Ժառանգություն» կուսակցության հիմնադիր Րաֆֆի Հովհաննիսյանը և իր զորակցությունն է հայտնել իրեն և քայլարշավի բոլոր մասնակցիներին:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»