Քարոզչապաստառների վահանակների ամսական վարձավճարը տատանվում է 100–350 հազար դրամի սահմաններում. «Փաստ»

«Փաստ» օրաթերթը գրում է.

Երեկվանից մեկնարկել է ապրիլի 2–ին կայանալիք ԱԺ ընտրություններին մասնակցող կուսակցությունների և կուսակցությունների դաշինքների գրանցման փաստաթղթերը ընդունելու գործընթացը: Այն կտևի տասն օր՝ մինչև փետրվարի 16–ը: Այդ տասն օրերի ընթացքում էլ արդեն հստակ պարզ կլինի, թե որ կուսակցություններն ու որ դաշինքներն են պատգամավորական մանդատը ստանալու համար հաստատապես մտնում պայքարի մեջ:
Միաժամանակ երեկ մեկնարկել է Կենտրոնական ընտրական հանձնաժողով կուսակցությունների և կուսակցությունների դաշինքների՝ 5 քառակուսի մետրը գերազանցող մակերեսով գովազդային վահանակներում քարոզչական պաստառներ տեղադրելու համար հայտեր ներկայացնելու գործընթացը:
ԿԸՀ–ն հրապարակել է նաև գովազդային վահանակների վրա պաստառներ փակցնելու արժեքները: Ընդհանուր առմամբ, առաջիկա խորհրդարանական ընտրությունների քարոզչությունն իրականացնելու համար Հայաստանում 735 գովազդային վահանակ է տեղադրվել: Նշենք, որ այդ 735 գովազդային վահանակների գրեթե կեսը՝ 366–ը, տեղադրվել է մայրաքաղաքում: Մնացած կեսը բաշխվել է ըստ մարզերի՝ Լոռի, Շիրակ, Արագածոտն, Կոտայք և այլն:
«ԱԴՎ դիզայն» ընկերությունը Երևանում թվով 21 վահանակ է տեղադրել քաղաքի Ավան, Աջափնյակ, Նոր Նորք, Մալաթիա–Սեբաստիա և այլ վարչական շրջաններում: 18 քառակուսի մետր մակերեսով երկկողմանի վահանակի ամեն կողմի տրամադրման արժեքը մեկ ամսվա կտրվածքով կազմում է 129 հազար 600 դրամ:
«Ադվերսիթի» ՍՊԸ–ի կողմից ընդամենը 13 վահանակ է տեղադրվել Երևանում, որոնց արժեքը՝ կախված վահանակի մակերեսից, տատանվում է 90 հազարից 345 հազար 600 դրամի սահմաններում:
Մեկ այլ ընկերություն՝ «Ալեքս Հոլդինգ» ՍՊԸ–ն, որն ամենայն հավանականությամբ պատգամավոր Սամվել Ալեքսանյանի հետ ուղղակի առնչություն ունի (համենայն դեպս, այդ մասին հրապարակումներ կան համացանցում), վահանակներ է տեղադրել հենց վերոնշյալ պատգամավորի հավակնությունների տարածքը համարվող վարչական շրջանում: Թվով յոթ վահանակները տեղադրվել են Սեբաստիա, Բաբաջանյան, Անդրանիկի և Րաֆֆու փողոցների վրա, ինչպես նաև Ծիծեռնակաբերդի խճուղուն հարակից տարածքում: Վահանակաների վարձակալության արժեքը մեկ ամսվա համար կազմում է 129 հազար 600–ից մինչև 338 հազար 600 դրամ՝ կրկին կախված վահանակի մակերեսից:
Նշենք, որ Երևան–Եղեգնաձոր–Մեղրի միջպետական մայրուղու ճանապարհի տարբեր հատվածներում տեղադրված 18 քառակուսի մետր մակերեսով գովազդային վահանակների համար սահմանվել է ընդամենը 6 հազար 900–ից 7 հազար 500 դրամ: Այս հատվածներում քարոզչապաստառ տեղադրելը ֆինանսական առումով բավական ձեռնտու կլինի, քանի որ ավելի քան 18 անգամ քիչ են վճարելու այդ 18 քառակուսի մետր զբաղեցնող վահանակի համար: Նման մատչելի գների սահմանումը, բնականաբար, կապված է տեղանքով: Ամեն դեպքում այդ ճանապարհահատվածում որքանով է ձեռնտու քարոզչապաստառ տեղադրելը՝ ավելի լավ կիմանան այդտեղ իրենց քարոզչապատառ փակցնող քաղաքական կուսակցություները:
Հավելենք նաև, որ ընտրողների նախնական ցուցակների հրապարակումը ընտրական կենտրոններում տեղի կունենա 2017 թ. փետրվարի 21–ին, իսկ նախընտրական քարոզչության համար նախատեսված ժամանակահատված է սահմանվել մարտի 5–31–ն ընկած ժամանակահատվածը: Քվեաթերթիկները կտպագրվեն մարտի 23–30–ն ընկած ժամանակահատվածում:

Շարունակությունը` «Փաստ» օրաթերթի այսօրվա համարում: