Անլրջություն. «Փաստ»

«Փաստ» օրաթերթը գրում է.

Արդեն մի քանի օր է «Մերժիր Սերժին» քաղաքացիական նախաձեռնությունը շրջում է երևանյան փողոցներով և Սերժ Սարգսյանին «արժանապատիվ կերպով թոշակի ուղարկելու համար» գումար հավաքում: Նախորդ օրը նախաձեռնության անդամները Սերժ Սարգսյանի պատկերով պաստառը տեղադրել էին մետրոյի «Երիտասարդական», «Բաղրամյան» կայարանների մոտ, ապա նաև՝ Կասկադում: Պատկերում խորհրդանշական նախագահի ձեռքից ներքև ապակե տարա է դրված, որի մեջ էլ ցանկացողները գումար են նետում: Նախաձեռնության մասնակիցները հիմնականում կոչ են անում 10 և 20 դրամների հանգանակություն կատարել:

«Փաստ»–ի հետ զրույցում նախաձեռնության անդամ Դավիթ Սանասարյանը նշեց, թե ոստիկանները թույլ չեն տալիս իրենց Սերժ Սարգսյանի համար հավաքած հանգանակությունը փոխանցել նրան: Զրույցի պահին նրանք գտնվում էին Ազատության հրապարակում:

– Ակցիան շարունակվում է՝ Սերժ Սարգսյանը միայնակ իր գումարը հավաքում է:

– Դեռ քանի՞ օր կտևի այս ակցիան:

– Դա ոստիկանների համար անակնկալ է: Մենք օր չենք կարող ասել:

– Ոստիկանները ձեզ «հետապնդո՞ւմ» են:

– Մեզ չեն հետապնդում: Սերժ Սարգսյանի շահույթն են հետապնդում ոստիկանները: Եթե մեզ հետապնդեին, լրիվ ուրիշ վիճակ կլիներ: Այս պահին նրանք չկամություն են անում ու թույլ չեն տալիս, որ մենք Սերժ Սարգսյանի համար հավաքած հանգանակությունը փոխանցենք Սերժ Սարգսյանին: Սա Վովա Գասպարյանի չարախինդ ու հակասարգսյանական քայլն է:

– Դուք արդեն հաշվե՞լ եք, թե որքան հավաքված գումար կա:

– Ճիշտն ասած, մենք ուրիշի փողերը չենք հաշվում:

– Ազատության հրապարակից հետո ո՞ւր եք պատրաստվում գնալ, կանխորոշված ուղղություն կա՞:

– Ուղղություններ չկան, բայց պատրաստվում ենք միջոցառումների:

– Ի՞նչ միջոցառումներ են դրանք:

– Կհայտարարենք նախապես, անակնկալ միջոցառումներ են: Կան միջոցառումներ, որոնց մասին նախապես կասենք, կան՝ որոնք անակնկալ են լինելու:

– Սերժ Սարգսյանը դեռևս չի պատրաստվում թոշակի գնալ, և հավակնում է վարչապետի պաշտոնին, այս ամենը ինչո՞ւ է արվում:

– Իսկ դուք չե՞ք հավատում Սերժ Սարգսյանին: Մենք հավատում ենք, որ նա ասել է, թե չի ուզում դառնալ վարչապետ: Մենք իր ֆանատներն ենք, երբ ինքն ինչ–որ բան է ասում, մեր ներսը միանգամից խառնվում է:

– Սերժ Սարգսյանի համար գումար հավաքելու, նրան թոշակի «ուղարկելու» գաղափարը ինչպես ծնվեց, չէ՞ որ նա գումարի խնդիր չունի:

– Ո՞վ է ասում, որ չունի: Եթե չունենար, գիտնականների հետ հանդիպման ժամանակ կասեր փողի պակաս չունի, բայց ասել է, որ ունի: Հիմա մենք ուզում ենք էս մարդու կյանքի վերջին ցանկություններից մեկը կատարել:

Հիշեցնենք, որ մարտի 28–ին Գիտությունների ազգային ակադեմիայում Սերժ Սարգսյանի հետ հանդիպման ժամանակ գիտնականները նախագահին ակնարկել էին ֆինանսավորման պակասի մասին, ինչին ի պատասխան նախագահը նշել էր. «Գումար եք ուզում, ես էլ եմ ուզում, բոլորն էլ ուզում են»։

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»