Հովսեփ Խուրշուդյան. «Սերժ Սարգսյանը ամբողջությամբ տիրապետում է դաշտին և կարող է «պեշկաների» պես ինչ–որ մեկին զոհաբերել». «Փաստ»

«Փաստ» օրաթերթը գրում է.

«Ազատ քաղաքացի» հասարակական կազմակերպության նախագահ Հովսեփ Խուրշուդյանի կարծիքով քաղաքական կյանքն այսօր այնքան գաճաճ և թերզարգացած իրավիճակում է գտնվում, որ հնարավորություն չի տալիս անգամ տնտեսությունն ու մշակույթը զարգանա: Բայցև համոզված է, որ բոլորն իրենց ուժերի ներածի չափով պետք է աջակցեն այն մարդկանց, ովքեր այսօր մտել են այդ ծանր բեռի տակ, որպեսզի նույնիսկ այն փոքր թվացող ալիքը, որն այսօր կա, մեծանա և օգնի, որ ընդդիմությունն ինչ–որ տեղ հաջողության հասնի:

«Ցանկացած երկիր հիմնվում է երեք հիմնական սյուների վրա: Դա քաղաքականությունն է, տնտեսությունը և մշակույթը: Հայաստանում քաղաքականություն չլինելու պատճառով չեն զարգանում նաև տնտեսությունն ու մշակույթը: Եվ մնում են թերզարգացած, քանի որ առանց մի ուղղությունը զարգացնելու հնարավոր չէ, մյուս երկու ուղղություններն արդյունավետ զարգացնել»,– ասաց Հ. Խուրշուդյանը:

Նրա կարծիքով քաղաքական կուսակցությունը չի կարող գոյություն ունենալ, եթե ընտրությունների ժամանակ հաղթում է, բայց ընտրության արդյունքները կեղծելու պատճառով չի կարողանում ստանալ այն, ինչն ընտրությունների ժամանակ վաստակել է:

«Նման կուսակցությունը ժամանակի ընթացքում անէանում է, քանի որ հասարակությունը ցանկանում է տեսնել արդյունքը: Իսկ երբ քաղաքական ճանապարհով իշխանափոխություն տեղի չի ունենում, ձևավորվում է քրեաօլիգարխիկ համակարգ, որի միջոցով էլ ձևավորվում է պետական իշխանությունը: Դա ազդում է նաև մշակույթի վրա, քանի որ հասարակությունը և նոր սերունդը տեսնելով, որ չափանիշը զոռբայությունն է, որ ուժի, կեղծիքների, փողի միջոցով է իշխանություն ձևավորվում, ուստի նման պահանջ է սկսում ձևավորել...»,– «Փաստ»–ի հետ զրույցում ասաց Հ. Խուրշուդյանը:

Նա նշեց նաև, որ Հայաստանի նման պետությունները, որտեղ պետական համակարգը զավթված է լինում մի խումբ մարդկանց կողմից, որոնք էլ սերտաճում են ադմինիստրատիվ բյուրոկրատիայի հետ, միջազգային իրավունքի տեսանկյունից կոչվում են զավթված պետություններ:

«Արդյունքում բյուրոկրատիան սպասարկում է այն մի քանի տասնյակ անձանց, որոնք բռնազավթել են պետությունը, տիրապետում են տարբեր գործիքների և այդպես «առաջ» շարժվում: Այդ պատճառով է, որ իմ կարծիքով Հայաստանում փաստացի քաղաքականություն չկա: Դրա փոխարեն կան քրեաօլիգարխիկ հարաբերություններ»,– համոզված է Հ. Խուրշուդյանը:

Նա համաձայն չէ այն կարծիքին, թե կուսակցությունները ոչինչ չեն անում իրավիճակը շտկելու համար: Խոսելով լրատվական դաշտի ազատության մասին, նա նշեց, որ իր դիտարկմամբ այն նույնպես բավականին գրագետ ձևով վերահսկվում է իշխանությունների կողմից:

«Դաշտը թվում է ազատ է, բայց հենց վճռական պահ է լինում, նույն իշխանություններին ամենասուր ձևով քննադատող լրատվամիջոցները սկսում են «մանիպուլյացիաների» գնալ: Եվ երբ հարկավոր է լինում իշխանություններին ոչ միայն քննադատել, այլ նաև վերլուծությունների միջոցով ցույց տալ ելքերն ու աջակցել իշխանությունների համար ռեալ վտանգ սպառնացող ուժերին, հանկարծ նույն լրատվամիջոցները ընդդիմադիրի դիրքերից սկսում են հարվածել այդ ուժերին: Վերջին ընտրությունների ժամանակ այդ հարձակումը «ՕՐՕ» դաշինքի վրա էր, երբ պսևդոընդդիմադիր լրատվամիջոցները գրոհել էին դաշինքի վրա»,– ասաց Հ. Խուրշուդյանը:

Խոսելով ՀՀԿ–ի մասին` Հ. Խուրշուդյանը նշեց, որ այն ոչ թե կուսակցություն է, այլ քրեաօլիգարխիկ խմբավորում, որը սպասարկում է ընդամենը մեկ անձի՝ Սերժ Սարգսյանին:

«Սերժ Սարգսյանը ամբողջությամբ տիրապետում է դաշտին և կարող է «պեշկաների» պես ինչ–որ մեկին զոհաբերել: Այս ամբողջ ընթացքում, ի դեպ, բավականին բարձրաստիճան պաշտոնյաների զտումներ են իրականացվել, բայց նաև ասում են, որ ջրերը կարող են հոսել, հետո մի տեղ կրկին մեկտեղվել և այլն: Այսինքն, երբ չկա քաղաքական դաշտ, պետք է նման ռազբորկաներ, խմորումներ տեղի ունենան: Բայց դրանից, ցավոք սրտի, երկիրը ոչ թե շահում է, այլ տուժում է, իսկ ընդդիմադիր քաղաքական ուժերը՝ գնալով ջլատվում ու քայքայվում: Դա այն է, ինչ այսօր մենք ունենք, որի վերջը, ցավոք, դեռևս չի երևում»,– համոզված է Հ. Խուրշուդյանը:

Շարունակությունը՝ «Փաստ» օրաթերթի այսօրվա համարում