Կարեն Չիլինգարյան. «Լինի սննդի օբյեկտ, թե առևտրի կենտրոն, ռիսկային են՝ պետք է հետևություններ անեն». «Փաստ»

«Փաստ» օրաթերթը գրում է.

Հյուսիսային պողոտայի թիվ 5 հասցեում գտնվող «Բուրգեր Քինգ» արագ սննդի կետում տեղի ունեցած պայթյունի դեպքի առթիվ ՀՀ քննչական կոմիտեում քրեական գործ է հարուցվել: Նախնական վարկածի համաձայն՝ պայթել է գարեջրի ճնշումն ապահովող ածխաթթու գազի (CO2) 20 կգ–անոց բալոնը։ Պայթյունի հետևանքով ստացած մարմնական վնասվածքներով հոսպիտալացվել է 8 մարդ:

Քրեական գործը հարուցվել է ՀՀ քրեական օրենսգրքի 279–րդ հոդվածի 2–րդ մասի 2–րդ կետով, այն է՝ անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը, որն անզգուշությամբ վնաս է պատճառել երկու կամ ավելի անձանց առողջությանը։

«Սպառողների խորհրդատվության կենտրոն» հասարակական կազմակերպության նախագահ Կարեն Չիլինգարյանը «Փաստ»–ի հետ զրույցում, խոսելով առհասարակ ոլորտում առկա խնդիրներից, նախ ընդգծեց, որ ընդհանրապես ճնշումով բալոնները ստուգվում են համապատասխան կառույցի կողմից:

«Մեքենաների գազաբալոնները ևս նման կերպ են ստուգվում: Ուղղակի խնդիրն այն է, որ բալոնները շահագործողները պետք է տանեն դրանք, ներկայացնեն, որ նոր ստուգեն: Խոսքը թե՛ վերոնշյալ բալոնների, և թե՛ մեքենաների դեպքում է: Մեքենայի վարորդը պետք է տանի ստուգման, բայց, ցավոք սրտի, հիմնականում դա չեն անում, ինչն արդեն խախտում է սպառողի կողմից: Բացի այդ, լիցքավորողն էլ պետք է հետևի հատկապես բալոնների վրա առկա մակնշմանը, որը տրվում է բալոնը ստուգող կազմակերպության կողմից: Մակնշման վրա նշվում է, թե երբ է բալոնը ստուգվել, նշվում են ժամկետները, թե որքան կարելի է օգտագործել: Բայց, ցավոք սրտի, լիցքավորման ժամանակ ուշադրություն չեն դարձնում այդ հանգամանքին: Սեփականատերն էլ դրան ուշադրություն չի դարձնում: Ըստ այդմ՝ արդեն կարելի է պատկերացնել հետևանքը: Չի բացառվում, որ նշված դեպքը ևս այդ ամենի հետևանքն է»,– ասաց Կ. Չիլինգարյանը:

Մեր զրուցակցի կարծիքով՝ վերոնշյալ պարագայում չի բացառվում նաև, որ գործ ունենք նույն խնդրի հետ, ինչը հաճախ հանդիպում է մեքենաների գազաբալոնների դեպքում ու հանգեցնում պայթյունների:

«Դա և՛ մաշվածությունն է, և՛ անորակությունը: Բացի այդ, հնարավոր է, որ բարձր ճնշում են տվել, որովհետև այսքան ժամանակ ես չէի լսել, որ ածխաթթու գազի բալոնը պայթի: Այն նույն ճնշումը չունի, որն, օրինակ, ունի մեքենայի գազաբալոնը: Բալոնը ստուգվում և թույլատրվում է շահագործել մասնավոր կառույցի կողմից, բայց ընդհանրապես անվտանգության հետ կապված ստուգումները պետք է իրականացնի ԱԻՆ–ը: Պետք է բացահայտի՝ խախտումներ կա՞ն, թե ոչ, հակահրդեհային իրավիճակն ինչպիսի՞ն է: Կամ, եթե օգտագործվում են ինչ–որ սարքավորումներ, համապատասխանո՞ւմ են գործարանային տեսքին, թե ոչ»,–նկատեց մեր զրուցակիցը՝ ընդգծելով, որ ԱԻՆ–ը ոչ միայն առևտրի կենտրոններում, այլև խանութներում, սննդի կետերում ևս պետք է ստուգումներ իրականացնի:

«Կեմերովոյի հրդեհի դեպքում, ճիշտ է, այլ խնդիր էր, բայց նույն հարցն առաջացավ: Հակահրդեհային իրավիճակը չէր վերահսկվել, խախտումներ էին եղել, և դրա համար նման դեպք եղավ: Ցանկացած վայր, լինի սննդի օբյեկտ, թե առևտրի կենտրոն, ռիսկային են: Ածխաթթու գազի բալոնը գազավորված ջրերի համար են օգտագործում՝ ճնշում ստեղծելու համար: Այս պարագայում գարեջրի համար էր, ինչն այդքան էլ էական չէ: Գլխավորն այն է, որ պետք է սարքին և ստուգված լինեն այդ սարքավորումները: Պետք է հետևություններ անեն: Ինչպես հակահրդեհային իրավիճակն են ստուգում տարբեր խանութներում, դրան էլ պետք է հետևեն նաև այլ կառույցների ստուգումները: Տեսեք՝ մեքենաների գազաբալոնները պայթյուն են առաջացնում, որովհետև վերահսկողությունը մատների արանքով է իրականացվում: Հիմա այդ առումով օրենք են խստացնում, թեպետ օրենքը կար, բայց չէր կիրառվում: Յուրաքանչյուր մարմին ուղղակի պետք է հստակ կիրառի օրենքը: Եթե կիրառվի՝ դժբախտ դեպքեր շատ հազվադեպ կգրանցվեն»,– եզրափակեց հ/կ նախագահը:

Շարունակությունը՝ «Փաստ» օրաթերթի այսօրվա համարում