Փոխգնդապետ Օնիկ Գրիգորյան. կռվել է մինչեւ վերջ, հնարավորություն տալով զինակիցներին փրկվել

Մեր ժամանակի հերոս փոխգնդապետ Օնիկ Գրիգորյան. Օնիկ Գրիգորյանն Արցախի ՊԲ Ջաբրայիլի զորամասի հրամանատարի թիկունքի գծով տեղակալն էր:

Մարդ, ում պաշտոնավարման ընթացքում զինվորները թիկունքային խնդիրներ չունեին: Օնիկ Գրիգորյանը զոհվել է ապրիլի 2-ին: Ապրիլյան մարտական գործողությունների ժամանակ հինգ սպայից բաղկացած խումբը` փոխգնդապետներ Ալեքսան Առաքելյանը, Օնիկ Գրիգորյանը, Ռոման Պողոսյանը, մայոր Սուրեն Մելքումյանը եւ ավագ լեյտենանտ Մաքսիմ Գրիգորյանը, օգնության հասնելով 112 դիրքի անձնակազմին՝ անմիջապես նետվել է մարտի: Հակառակորդի հատուկ նշանակության ուժեղացված ջոկատի դեմ մղած կատաղի մարտերում պատճառելով թշնամու կենդանի ուժի զգալի կորուստներ, կասեցրել են նրա ներթափանցումը դեպի մեր պաշտպանության խորք: Ծավալված մարտական գործողությունների ժամանակ, ցուցաբերելով անձնվիրություն ու արիություն, խմբի ամբողջ կազմը ընկել է քաջի մահով:

Ընտանիքի անդամները, զինակից ընկերները համոզված են` Օնիկն այլ կերպ չէր կարող վարվել. չէր կարող փախչել կռվից, չէր կարող առաջ չնետվել ու չպայքարել:

Ընկերները պատմում են Օնիկի վերջին մարտի մասին. լսելով հարձակման լուրը՝ հինգ սպաներով, առանց րոպե կորցնելու, նետվել են մեքենայի մեջ եւ օգնության շտապել դիրքում մնացած զինվորներին, ընդունել մարտը: Երկու տեղից վիրավոր Օնիկը կռվել է մինչեւ վերջ: Տեսնելով, որ հակառակորդը հրետակոծում է այն ճանապարհը, որտեղով օգնության պիտի հասնեին, խրամատում գտնվող զինվորներին հրամայել է պահունակները տալ իրեն եւ լքել խրամատը։ Գիտեր, որ այդ խրամատները, այդ բարձունքը չի կարելի թողնել թշնամուն:

Հերոսի մարմինը ծննդավայր է հասել ութ օրից հետո, այդ ամբողջ ընթացքում ընտանիքն ու ընկերները, իրենք իսկ չհավատալով, հույս էին պահում, որ Օնիկը ողջ է: Այդ օրերին ադրբեջանական կայքերից մեկը, որն ավելի շատ էր առանձնացել սահմանում իրենց զինուժի հաղթանակների մասին հորինվածքներով, տեղադրել էր զոհված հայ սպայի նկարն ու գրառում թողել, որ իրենց հաջողվել է ոչնչացնել հայկական հատուկ նշանակության ջոկատի հրամանատարին: Թիկունքի գծով տեղակալի գրեթե միայնակ վարած մարտը խուճապահար հակառակորդի մոտ նման տպավորություն էր թողել: Վիրավոր Օնիկը կռվել էր մինչեւ վերջ, հնարավորություն տալով զինակիցներին փրկվել:

Օնիկ Գրիգորյանը ծնվել է 1978 թվականին Ասկերանի շրջանի Խրամորթ գյուղում։ 1995-ին ավարտել է գյուղի միջնակարգ դպրոցը եւ ծառայության անցել Պաշտպանության բանակի շարքերում։ Ավարտել է ԱրՊՀ «Ֆիզկուլտուրա եւ նախնական զինվորական պատրաստություն» բաժինը։ Օնիկը երկու անչափահաս երեխայի հայր էր:

Ծառայության ընթացքում փոխգնդապետը զբաղեցրել է տարբեր պաշտոններ՝ միշտ աչքի ընկելով բացառիկ բարեխղճությամբ ու նվիրվածությամբ։ Հաշվի առնելով Օնիկ Գրիգորյանի մասնագիտական բարձր ունակություններն ու ծառայողական փորձը՝ ՀՀ պաշտպանության նախարարի հրամանով 2016թ. հունվարին նշանակվել է ՊԲ Ն զորամասի հրամանատարի թիկունքի ու կոմունալ շահագործման ծառայության գծով տեղակալ։

Բարեխիղճ ծառայության համար Օնիկ Գրիգորյանը պարգեւատրվել է «Ծովակալ Իսակով», ԼՂՀ «Մարտական ծառայություն», «Նելսոն Ստեփանյան», «ՀՀ ԶՈՒ 20 տարի», «Անբասիր ծառայության» 1-ին եւ 2-րդ աստիճանի մեդալներով, բազմաթիվ շնորհակալագրերով ու պատվոգրերով։ Ցուցաբերած բացառիկ արիության եւ անձնազոհության համար փոխգնդապետ Օնիկ Կարոյի Գրիգորյանը Սերժ Սարգսյանի կողմից հետմահու պարգեւատրվել է «Մարտական Խաչ» 1-ին աստիճանի, իսկ ԼՂՀ նախագահի կողմից «Արիության համար» շքանշաններով:

Այս թեմայով Շատ շուտով ձեր կողքին կլինեմ․ Արթուր Ասատրյանը իր մերձավորների հետ վերադառնում է Հայաստան Վայքում երեք տղաներ, տեսնելով կնոջը սեռական հարաբերություն ունենալու պահին, պահանջել են, որ իրենց ևս «սպասարկի» Օրվա կադր. Կրթության նախարարը մետրոյով տուն է գնում Ես գալիս եմ այս պաշտոնին ունենալով հստակ պատկերացումներ. Առողջապահության նախարարը կոչով դիմել է հանրությանը (տեսանյութ) «Եթե զուգարանում թուղթ չլինի, քո դեմքով եմ սրբվելու». երիտասարդը ինտերնետ ակումբում դանակով հարձակվել է աշխատողի վրա