«Երազկոտ չեմ, ավելի ռեալ եմ ու հողին կպած». Թամարա Գեւորգյանը՝ նոր ֆոտոշարքի եւ դերի մասին

Դերասանուհի Թամարա Գեւորգյանը ներկայացել է նոր ֆոտոշարքով, որտեղ ցուցադրել է միանգամից երկու կերպար: Դերասանուհու նոր լուսանկարների հեղինակը Խանդութ Պարույրյանն է, իսկ դիմահարդարումն արել է Իզաբելլա Պապարիցուն:

Թամարան իր նոր ֆոտոշարքը տրամադրել է NEWS.am STYLE-ին, ինչպես նաեւ՝ խոսել ներկայացված կերպարների եւ առաջիկա նորությունների մասին.

«Ֆոտոշարքի մտահաղացումը համատեղ է որոշվել, կերպարները տեղում են ծնվել: Ի սկզբանե կար միտք երկու տարբեր կերպարներ ստանալ՝ նուրբ եւ վայրի, սակայն կոնկրետ բաներ որոշված չէին:

Ֆոտոշարքը կոնկրետ հոգեվիճակի մասին չէ, այն կնոջ երկու տարբեր բնույթների մասին է, կնոջ մասին է, այն մասին, որ նույն կինը կարող է լինել եւ նուրբ, եւ միաժամանակ վայրի: Ինձ թվում է՝ այս հակասական գծերն ապրում են յուրաքանչյուր կնոջ մեջ»:

Խոսելով այն մասին, թե որ կերպարն էր իրեն ավելի մոտ՝ Թամարան նշեց.

«Ես դերասանուհի եմ, ինձ համար յուրաքանչյուր կերպար ընդունելի է, սակայն ինքնավստահ կերպարն ավելի մոտ է Թամարային: Ես բնույթով երազկոտ չեմ, ավելի ռեալ եմ ու հողին կպած: Ֆոտոշարքերն իմ կարծիքով արտահայտչամիջոցներ են, առիթ ներկայանալու նոր կերպարներով՝ թե հետեւորդներին, եւ թե ինչու ոչ՝ ռեժիսորներին»:

Բացի նոր ֆոտոշարքից՝ Թամարան կներկայանա նաեւ այլ նորություններով, որոնց մասին որոշ բացահայտումներ արեց.

«Առաջիկայում նոր նախագիծ է լինելու: Ես կներկայանամ բոլորովին այլ կերպարում, որը շատ տարբերվում է իմ խաղացած կերպարներից: Առայժմ սրանից ավել փակագծերը չեմ կարող բացել: Առաջիկա պլանների մեջ ֆոտոշարքերը չեն մտնում, նորություններ են սպասվում ներկայացումների տեսքով, սակայն դրա մասին էլ առայժմ վաղ է խոսել: Ամեն դեպքում՝ ամբողջ ներուժս ուղղված է ներկայացման կայացմանը»,-եզրափակեց նա: