Գուրգեն Եղիազարյան. «Իշխանությունները գնում են խնդիրների հանգուցալուծման բոլորովին այլ ճանապարհով». «Փաստ»

«Փաստ» օրաթերթը գրում է.

ՀԱԿ փոխնախագահ Արամ Մանուկյանի կարծիքով «Ոչ»–ի շարժման ժամանակ ընդդիմադիրների համառ ջանքերի շնորհիվ ժողովուրդը հասկացավ, որ իշխանությունները դավադրություն են կազմակերպում և Սահմանադրության բովանդակությունը փոխում են Սերժ Սարգսյանի՝ իշխանության մնալու հնարավորություն ստեղծելու համար: Քաղաքական գործչի կարծիքով, ժողովրդի կողմից երկրի նախագահ ընտրելու հնարավորությունը երկրի թիվ մեկ քաղաքական գործընթացն է, և այդ հնարավորությունից զրկելը ժողովրդավարությանը հասցված ամենամեծ դավադրությունն ու հարվածն էր:

Երկրորդ հարվածը՝ ընտրված խորհրդարանն է, որն իր խոսքով՝ իրականացրեց և ավարտին հասցրեց առաջին «ռաունդում» սկսած գործը: Այս երկուսը միասին էլ երկիրը «նոկդաունի» ենթարկեցին:

ԱԱԾ նախկին փոխնախարար Գուրգեն Եղիազարյանը նույնպես համամիտ է, որ Սահմանադրության բովանդակության փոփոխությունն ի սկզբանե հուշում էր այն մասին, որ նպատակը Սերժ Սարգսյանի պաշտոնավարման ժամկետը երկարաձգելն է: Նրա կարծիքով սակայն, Հայաստանի ներքաղաքական խնդիրները ոչ թե կառավարման համակարգով են պայմանավորված, այլ՝ երկրում տիրող իրավիճակով:

«Երկրի 0,1 %–ը իշխում է ողջ ժողովրդին, բանակը և ուժայինները ենթարկվում են իշխանություններին, իսկ ամեն անգամ խայտառակ ընտրություններով նույն բանն անընդհատ շարունակվում է: Եվ մենք չպետք է մեր հույսը դնենք Արևմուտքի վրա, թե, իբր, արևմտյան ուժերը թույլ չեն տա, որ Հայաստանում տոտալիտար համակարգ և բռնապետություն լինի: Դրանք սին գաղափարներ են, քանի որ նրանց հետաքրքրում են իշխանությունների հետ իրենց հարաբերությունները: Եվ որքան չընտրված լինի Հայաստանի իշխանությունը, այնքան խոցելի կլինի նրանց առջև»,– «Փաստ»–ի հետ զրույցում ասաց Գ. Եղիազարյանը:

Նույնը, սակայն, նա չի մտածում Ռուսաստանի մասին, քանի որ գործընկեր պետություն է և ոչ միայն իշխանական որևէ խաղի երբեք էլ չի միջամտի, այլև՝ Հայաստանին թիկունքից չի հարվածի: Նրա դիտարկմամբ իրավիճակը երկրում բավականին բարդ է, քանի որ իշխանությունները գնում են խնդիրների հանգուցալուծման բոլորովին այլ ճանապարհով:

«Անջրպետը սարսափելի մեծ է, և այլ ճանապարհ չկա, քան վաղը–մյուս օրը ֆորսմաժորային լուծումներ գտնելը: Եվ եթե Ս. Սարգսյանն իրեն վարչապետ կարգի, ապա երկիրը կհայտնվի տնտեսական կոլապսի մեջ: Նա արդեն ապացուցել է, որ դա կարող է անել: Եվ եթե նա դառնա վարչապետ, ապա տնտեսությունն ամբողջապես փլուզելու է: Դրա հետևանքով կրկին 100 հազարներով մարդիկ կլքեն Հայաստանը, կթուլանան մեր սահմանները»,– ասաց Գ. Եղիազարյանը:

Ըստ նրա, միայն ՀԱԿ–ն է, որ այսօր կարող է երկրում իրավիճակ փոխել: Մյուս քաղաքական ուժերում իշխանությունները «ներմուծել» են սեփական մարդկանց և կարողանում են իրենց ձեռքում պահել կառավարման ղեկը: Խոսելով ԱԺ «Ելք» խմբակցության հնարավոր պառակտման մասին, Գ. Եղիազարյանը նշեց, որ ինքը մշտապես էլ այդ կարծիքին է եղել:

«Ես միշտ էլ ասել եմ, որ «Ելք» խմբակցության կազմում գտնվող կուսակցությունները չեն կարող մեկ կաթսայում եփվել: Նրանց բերեցին ԱԺ միայն մեկ նպատակով՝ որ ճանաչեն ընտրությունները: Այսինքն, իշխանությունների գլխավոր պայմանը կատարված է: Իսկ իրենց ընդդիմադիր կեցվածքը պայմանական է, քանի որ նրանք շատ լավ գիտեն, որ ինչ հարց էլ բարձրացնեն, լուծում չի ստանալու»,– ասաց Գ. Եղիազարյանը:

Նրա դիտարկմամբ երկրում առկա գաղջ մթնոլորտը դեռ մի քանի ամիս էլ կշարունակվի, իսկ լուծումներն ամենևին էլ Հայաստանի օգտին չեն լինի:

«Իրենք իրենց խաբելով՝ անընդհատ գալիս են իշխանության, բայց վերջ ի վերջո տուժողը ոչ թե իրենք են լինելու, այլ՝ Հայաստանի Հանրապետությունը: Ու չնայած ես այսօր դեղատոմս չունեմ, թե այս իրավիճակից դուրս գալու համար ինչ է հարկավոր անել, ուստի կարծում եմ, որ պետք է մի քիչ սպասենք, մինչև լավ օրեր կգան: Հո Հայաստանը չի՞ կործանվելու ներկա իշխանությունների պատճառով»,– եզրափակեց Գ. Եղիազարյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»