Լենինգրադյա՞ն, թե Ազգալդյան. այս է խնդիրը. «Փաստ»

«Փաստ» օրաթերթը գրում է.

Երևանի ավագանու «Բարև Երևան» խմբակցության անդամ Անահիտ Բախշյանը նախորդ շաբաթ քաղաքապետ Տարոն Մարգարյանին էր ներկայացրել մի որոշման նախագիծ, որով առաջարկում էր Երևանի Լենինգրադյան փողոցն անվանափոխել «Անկախության բանակ»–ի հրամանատար, ֆիզիկոս Լեոնիդ Ազգալդյանի անվամբ: Վերջինս իր նախագիծը հիմնավորել էր նրանով, որ Լենինգրադյանը բավականին բանուկ փողոց է և համապատասխան է Ազգալդյանի նման մեծությանը գնահատելու համար: «Սա բնավ ոչ հակախորհրդային և ոչ էլ, առավել ևս, հակառուսական քայլ պետք չէ ընկալել: Լենինի անունը միանշանակորեն չի ընդունվում նույնիսկ Ռուսաստանում: Նույն Լենինգրադ քաղաքը վաղուց վերանվանված է Սանկտ–Պետերբուրգ: Մենք բնավ չենք առաջարկում պատմություն ջնջել: Լենինի մասին մեր սերունդները թող իմանան պատմության դասագրքերից: Մենք ուղղակի առաջարկում ենք վաղուց արժեզրկված անունը փոխարինել մեր իրական և հավերժ արժեքով, մեր իրական ազգային հերոսներից մեկի անունով»,– նշել էր նա նախագծի տեղեկանք–հիմնավորման մեջ:
«Փաստի» հետ զրույցում Անահիտ Բախշյանը նշեց, որ օրենքը թույլ է տալիս ավագանու անդամին որևէ նախագծի որոշումով հանդես գալ. «Եվ ես դա արել եմ, ուրիշ բան դեռևս չեմ կարող ավելացնել: Դրա պատասխանը կլինի այն ժամանակ, երբ ստանանք Երևանի ավագանու փետրվարի 14–ի նիստի օրակարգի նախագիծը»: Վերջինս նշում է, որ մինչ իր նախագծի ներկայացումը քաղաքապետին՝ «Աջակցենք սահմանամերձ շրջաններին» քաղաքացիական նախաձեռնությունը Լենինգրադյանը Ազգալդյանի անունով անվանափոխելու հետ կապված 8000–ից ավելի ստորագրություն էր հավաքել և իր հավաքած ստորագրությունները համապատասխան նամակով ուղարկել քաղաքապետին: «Բարև Երևանի» անդամը նշում է, որ վերանվանելու հետ կապված քննարկումներն արդեն մեկ տարուց ավելի է շրջանառվում են հանրության շրջանում, ինչպես ինքն է նշում՝ դա այսօր արդեն միս ու արյուն է ստացել:
Մեր այն հարցին, թե ձեր շրջապատում նույնպես կարծում են, որ պետք է կամ արժե փողոցը վերանվանել, տիկին Բախշյանը պատասխանեց, որ դա կերևա Կրթության, մշակույթի և սոցիալական հարցերի համապատասխան հանձնաժողովում քննարկելուց հետո:
Գրող, կինոսցենարիստ, լրագրող Վահրամ Մարտիրոսյանի կարծիքով էլ նմանատիպ շատ անվանափոխումների կարիք կա: «Ես իմ բնավորությամբ շատ եմ սիրում պատմությունը փորփրել և շատ մարդկանց եմ հանդիպել, որոնց անունները, հենց թեկուզ փողոցն անվանակոչելու իմաստով կամ օգնությամբ՝ ճիշտ կլինի հանրայնացնել: Ես համարում եմ, որ Լեոնիդ Ազգալդյանը արժանավորագույն մարդ է: Իսկ թե իր անունը կկրի այդ փողոցը, թե մեկը ուրիշ, կարծում եմ, որ ավելի ճիշտ կլինի, որ դա մասնագիտական հանձնաժողովը որոշի: Բայց ես ինքս էլ հաճախ եմ մտածում նման բաների մասին և այդ անվանափոխությունը բնական եմ համարում, հատկապես, որ այսօր աշխարհում ոչ մի տեղ Լենինգրադ գոյություն չունի»,– նշեց նա:
Հայտնի հուշարձանագետ Սամվել Կարապետյանն էլ նշում է, որ Լեոնիդ Ազգալդյանի նման մարդու անունով փողոց վաղուց պետք է ունենայինք: Նրա խոսքով՝ մենք դեռ շատ ուշացել ենք: Ըստ նրա այդ վերանվանումը շատ է անհրաժեշտ. «Այս պահին մենք գոյություն ունենք այդ տեսակ մարդկանց հաշվին, և մայրաքաղաքի գլխավոր փողոցը հենց այդպիսի մարդու անունով պիտի կոչել»,– հավելեց նա:
Երևանի քաղաքապետարանի Տեղեկատվության և հասարակայնության հետ կապերի վարչության պետ Արթուր Գևորգյանն էլ հրաժարվեց մեկնաբանություն տալ՝ ասելով, թե դա բացառապես Երևանի ավագանու որոշումներով է իրականացվում, դրա համար ավագանու հետ կապված որոշումների և լիազորությունների հետ կապված նա որևէ մեկնաբանություն չի անում:
Նշենք, որ www.panarmenian.net կայքը սրա հետ կապված հարցում է անցկացնում իր կայքում, որտեղ կայքի ցանկացած այցելու կարող է նշել կողմ է, դեմ, թե իր համար միևնույն է Լենինգրադյան փողոցի՝ Ազգալդյանի անունով վերանվանումը: Այս պահի դրությամբ 3802 քվեարկողների 85%–ը կողմ է արտահայտվել հարցմանը:

Շարունակությունը` «Փաստ» օրաթերթի այսօրվա համարում: