Վահագն Խաչատրյան. «Հայաստանում հոգեկան հիվանդներ չեն ապրում, որ ինչքան կյանքը վատանա, նորից գնան ու այդ քաղաքական ուժին ձայն տան».«Փաստ»

«Փաստ» օրաթերթը գրում է.

ՀԱԿ վարչության անդամ Վահագն Խաչատրյանը «Փաստի» հետ զրույցում անդրադառնալով առաջիկա խորհրդարանական ընտրությունների ժամանակ ընդդիմադիր դաշտում առկա կուսակցությունների հնարավոր կոնսոլիդացմանը, նշեց, որ իր կարծիքով դա այնքան էլ կարևոր չէ, քան քաղաքական և պետական գործիչների կողմից երկրում քաղաքական միջավայրը մաքրելու և ներկայիս արատավոր երևույթներին վերջ տալուն միտված քայլերի ձեռնարկումը:
Նրա կարծիքով` ընդդիմադիր ուժերի միավորումը պետք է տեղի ունենա բնական ճանապարհով, քանի որ, ըստ նրա, արհեստականորեն ձևավորված միավորները շատ արագ էլ քանդվում են և հիասթափեցնում հասարակությանը, իսկ իրական մրցակցային քաղաքական միջավայր ձևավորելու համար էական չէ, թե ընդդիմադիր ուժերը կմիավորվեն, թե՝ ոչ:
«Այն նաև խայծ է, որով գայթակղվում են շատ քաղաքական ուժեր, բայց հետո պարզվում է, որ դրա հիմքում այլ գաղափար էր դրված՝ ընտրությունների կեղծումը և նման ձևով ցույց տալը, որ «ընտրված» ուժը եկել է «ազատ» ընտրության արդյունքում: Դրա փոխարեն ընդդիմադիր քաղաքական ուժերը պետք է ինչքանով հնարավոր է, ամեն մեկն իր չափով իրավիճակ փոխի ընտրությունների ժամանակ»,– ասում է Վ. Խաչատրյանը:
«Եթե իսկապես մրցակցային քաղաքական դաշտը ձևավորվեր քաղաքական մրցակցության արդյունքում, ապա այդ դեպքում արդարացի կլիներ քաղաքական կուսակցությունների կշռի մասին խոսելը, բայց այդ ամենը ժողովրդավարական սկզբունքների դեպքում է ստեղծվում: Եվ Հայաստանում հոգեկան հիվանդներ չեն ապրում, որ ինչքան կյանքը վատանա, նորից գնան ու այդ քաղաքական ուժին ձայն տան, բայց միշտ արձանագրվում է, որ գործող իշխանությունն ունեցել է բացարձակ մեծամասնություն: Խնդիրն այստեղ է, որը պետք է լուծվի, իսկ դրա համար պետք չի քաղաքական կուսակցություններին որակել փոքր, մեծ, թույլ և այլն: Ինչ վերաբերում է ընդդիմադիր ուժերի միավորմանը, ապա երկու դեպքում է դա հնարավոր՝ կամ պետք է միավորվեն մեկ գաղափարի շուրջ, կամ մեկ նպատակի»,– ասում է ՀԱԿ քաղխորհրդի անդամը:
Մեկնաբանելով ՀՀ վարչապետի այն միտքը, թե՝ լավ մասնագետ լինելու դեպքում ինքը պատրաստ է ընդդիմադիր դաշտից նույնպես մասնագետ հրավիրել իր ղեկավարած կառավարությունում աշխատելու համար, Վ. Խաչատրյանն ասաց, որ ներկայում նույնպես կառավարությունում շատ լավ մասնագետներ կան, որոնք աշխատում են, բայց, ցավոք, բոլորը սպասարկում են այն նույն համակարգին, որը երկիրը տանում է կործանման:
«Թող ոչ ոք չվիրավորվի, ես այնտեղ ընկերներ ու մոտ մարդիկ ունեմ, նրանք աշխատում են, շատ լավ տիրապետում են իրենց գործին, բայց այն չեն անում, ինչ որ պետք է անեն: Դրա փոխարեն ամեն ինչ արվում է իշխող կուսակցությանը հարստացնելու և «հզոր» դարձնելու համար, իսկ իրավիճակ փոխելու ցանկություն ամենևին էլ չկա»,–ասում է Վ. Խաչատրյանը:
«Եթե մեր երկրում դիկտատուրական կարգեր լինեին, ես նման հարցադրումներ չէի անի, կընդունեի, որ ամեն ինչ այնպես է ինչպես Չիլիում՝ 70–ական թվականներին էր, բայց երբ երկիրը ժողովրդավարական է, ուրեմն պետք է ժողովրդավարական սկզբունքները գործեն, իսկ դրանից բացի ինձ ոչինչ չի հետաքրքրում: Նույն ժամանակավոր տնտեսական հաջողությունները՝ երկնիշ տնտեսական աճը և այլն, ի վերջո, դառնում են ժամանակավրեպ, ինչի մասին մենք ասում էինք: Իսկ հիմա առանց վերջնական նպատակները և առաջնահերթությունները մատնանշելու, իրավիճակային հարցեր լուծելու ճանապարհով են գնում, որը շատ վտանգավոր է»,– ասում է Վ. Խաչատրյանը:

Շարունակությունը` «Փաստ» օրաթերթի այսօրվա համարում: