Պոռնոգրաֆիա և ինքնասպանության դասեր. ի՞նչ են փնտրում երեխաները համացանցում

Հայաստանում վերջին տարիներին կտրուկ աճել է երեխաների դեմ ուղղված հանցագործությունների թիվը։ Այս մասին այսօր ՀՀ Քննչական կոմիտեում կազմակերպված «Անչափահասների մասնակցությամբ հանցագործությունների քննությունը» թեմայով գիտագործնական միջազգային կոնֆերանսի բացմանը հայտարարել է ՀՀ ՔԿ նախագահ Աղվան Հովսեփյանը։

Ընդ որում` պաշտոնական վիճակագրությունը վկայում է, որ երեխաններն առավել հաճախ սեռական հանցագործությունների զոհ են դառնում։ Այսպես` 2015թ-ին Քննչական կոմիտեի վարույթում քննված 131 սեռական բնույթի հանցագործություններից 84-ը կատարվել է երեխաների նկատմամբ, 2016թ-ին քննված 157 գործերից 110-ում տուժող են եղել երեխաները, իսկ 2017-ին` 161 գործից երեխաներին է վերաբերել 101-ը։

Հանցագործները ոչ միայն պոռնոգրաֆիկ նյութեր են տարածում համացանցով, այլև կարող են երեխաներին դրդել ինքնասպանության։ Երեխաներին ինտերնետում իրենց ցանցն են գցում ոչ միայն մանկապղծությամբ ու ինքնասպանություններով հետաքրքրված առանձին խմբեր ու անհատ հանցագործները, այլև կրոնական ու ահաբեկչական տարատեսակ կազմակերպությունները։