Վոլոդյա Ավետիսյան. «Ամբողջ ազգը դուրս գա՝ 3 օրում մի քանի հոգու հեռացնելով երկիրը կփրկենք». «Փաստ»

«Փաստ» օրաթերթը գրում է.

Ազատամարտիկ Վոլոդյա Ավետիսյանն ու իր մի քանի ընկերներ Ազատության հրապարակում այս պահին նստացույց են իրականացնում:

Ավետիսյանը պատասխանել է «Փաստ»–ի մի քանի հարցերին.

– Պարոն Ավետիսյան, ո՞րն է նստացույցի նպատակը:

– Նպատակը հանրությանն արթնացնելն է, ցույց տալ, որ պետք է պայքարել այս անօրինական իշխանությունների դեմ, պետք է այս իշխանություններին հեռացնել, որպեսզի մեր երկրում քաղբանտարկյալներ չլինեն, իրենց կարծիքի համար մարդիկ չդատվեն` օրենքով պետություն ունենալու համար: Եվ Սերժ Սարգսյանին թույլ չտանք իր բանդայով վերարտադրվի:

– Առիթը երեկ հրապարակված Ժիրայր Սեֆիլյանի և մյուսների դատավճիռնե՞րն էին:

– Առիթն ընդհանուր Հայաստանի իրավիճակն է: Ես մեկ ուղղվածությամբ չեմ պայքարում: Պետք է ապրենք առանց քաղբանտարկյալների: Ես պայքարում եմ օրենքով պետություն ունենալու համար, իսկ դրա մեջ մտնում են բոլորը:

– Ակնկալիք ունե՞ք, որ այսպես ինչ–որ արդյունք կունենաք: Հիմա ձեզ միացողներ կան:

– Ես ցանկություն ունեմ փոխելու, դուրս եմ եկել փողոց, ով ցանկություն ունի փոխելու, թող դուրս գա՝ փոխի, ով ցանկություն չունի փոխելու՝ վախեցած ապրում է, թող վախեցած ապրի:

– Ձեզ մոտ մտավախություն չկա՞, որ այս քայլերի արդյունքում կրկին կհայտնվեք ճաղերի հետևում:

– Ոչ, ես ոչնչից չեմ վախենում:

– Առհասարակ Հայաստանում հնարավո՞ր է նստացույցով ինչ–որ բան փոխել, ինչ–որ բանի հասնել:

– Նստացույցը նրա համար է, որ ժողովրդին կրկին արթնացնենք, հիշեցնենք անընդհատ, որ մենք պետություն, երկիր, հայկական արժանապատվություն ենք կորցնում, որ պետք է ոտքի կանգնել: Ընդամենը մի քանի հոգու հեռացնելով՝ երկիրը կփրկենք, բայց պետք է, որ ամբողջ ազգը երեք օրով դուրս գա փողոց:

– Կարծո՞ւմ եք կլինի դա, կհաջողվի՞ այս անգամ:

– Ես չգիտեմ կհաջողվի, թե՝ ոչ: Իմ քաղաքացիական պարտքն է, ես կատարում եմ: Ես պայքարում եմ անօրինականության, բռնապետական ռեժիմի դեմ և ցանկանում եմ ունենալ օրենքով ու ապահով պետություն ու ժողովուրդ:

– Նստացույցին միայնա՞կ եք, թե ունեք համախոհներ, ովքեր միացել են ձեզ:

– 7–8 հոգի հավաքվել ենք, մարդիկ գալիս–գնում են: Կարծում եմ՝ դեռ կմիանան ընթացքում:

– Քանի՞ օր եք պատրաստվում անցկացնել նստացույցը:

– Երևի 3–4 օր: Բայց դեռ չգիտեմ՝ գիշերները կմնանք, թե՝ ոչ: Երեկոյան կերևա:

Հիշեցնենք, որ Վոլոդյա Ավետիսյանը չորս տարի առաջ խարդախության մեղադրանքով 6 տարվա ազատազրկման էր դատապարտվել, իսկ նախորդ տարի համաներմամբ ազատ արձակվելուց հետո անմիջապես գնացել էր կառավարության շենքի դիմաց ու նստացույց սկսել: Պահանջն այն ժամանակ կրկին նույնն էր՝ Հայաստանը օրենքի երկիր դարձնել:

Շարունակությունը՝ «Փաստ» օրաթերթի այսօրվա համարում

Այս թեմայով Իմ ծննդյան օրվա լավագույն նվերը․ Գոհար Ավետիսյանը որդու հետ լուսանկարներ է հրապարակել «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ»