Արայիկ Պապիկյան. «Սեֆիլյանի դատավճիռը «մեղմելու» մեջ իրավաբանություն և տրամաբանություն փնտրել պետք չէ». «Փաստ»

«Փաստ» օրաթերթը գրում է.

«Հիմնադիր խորհրդարան»–ի ղեկավար Ժիրայր Սեֆիլյանը 10 ամիս տևած դատավարությունից հետո դատապարտվեց 10 տարի վեց ամիս ազատազրկման: Գևորգ Սաֆարյանը դատապարտվեց 5 տարի վեց ամիս ազատազրկման: Հաշվի առնելով նրա՝ «տոնածառի» գործով կրած երկու տարվա պատժաչափը, նա անազատության մեջ կմնա ևս երեքուկես տարի: Այս գործով մյուս մեղադրյալներ Սասունիկ Կիրակոսյանը և Ներսես Պողոսյանը դատապարտվեցին 3 տարի վեց ամիս ազատազրկման, իսկ Գալուստ Գրիգորյանն ու Հրայր Թոփչյանը՝ 3–ական տարվա ազատազրկման:

«Փաստ»–ի հետ զրույցում Ժիրայր Սեֆիլյանի և Ներսես Պողոսյանի պաշտպան Արայիկ Պապիկյանը հայտնեց, որ իրենք անպատճառ բողոքարկելու են վճիռները՝ ձևական ընթացակարգը կապահովեն, որովհետև, ինչպես նա է ասում՝ Հայաստանում բովանդակային արդարադատություն չի կատարվում: Վերաքննիչ, այնուհետև Վճռաբեկ դատարան դիմելուց հետո վճիռը կբողոքարկեն Եվրոպական դատարանում:

Պապիկյանի խոսքով՝ Վերաքննիչ ու Վճռաբեկ դատարաններն ընդամենը պետք է վավերացնեն Առաջին ատյանի դատարանի դատավճիռը, ավելի ստույգ՝ քաղաքական իշխանության պատվերը: Եվ իրենք այդ օղակներից ոչ մի ակնկալիք չունեն:

Ըստ Պապիկյանի՝ վճիռը ոչ միայն արդարացի չէր, այլև՝ իրավաբանության տարրեր չէր պարունակում: Անձնավորված հաշվեհարդար էր, ներկայի ռեժիմի կողմից պատվեր՝ Սեֆիլյանին լռեցնելու համար:

«Առաջինը՝ ուղղված էր հենց Սեֆիլյանի անձի դեմ հաշվեհարդարի ձևով: Երկրորդը՝ այն ուղղված էր բոլոր այն անձանց դեմ, ովքեր կհամարձակվեն և կհանդգնեն Սերժ Սարգսյանի կամ Հանրապետականի ապօրինությունների մասին խոսել: Նման դատավարությունների արդարադատության մասին անհնար է խոսել: Ամենամիամիտ մարդն անգամ չի կարող որևէ բան ակնկալել»,– նշեց նա:

Հարցին, թե՝ Ներսես Պողոսյանն ինչո՞ւմ էր մեղադրվում, պաշտպանն ասաց, որ Պողոսյանը դատապարտվեց 3 տարի 6 ամիս ժամկետով ազատազրկման: Բայց ինքը դժվարանում է ասել, թե դատարանն ինչ պատճառաբանություններ կբերի, թեև այդ գործով պատճառաբանություն պետք չէ:

«Այդ գործով կա ընդամենը ռեժիմի պատվեր: Իսկ դատավորը դրա կատարողն էր: Պողոսյանի նկատմամբ նախաքննության ժամանակ մեկ–երկու ցուցմունք է եղել, որոնք դատարանում հերքվել են՝ չեն հաստատվել: Նա ակտիվ էր, տարիներ շարունակ բազմաթիվ անգամ հանդես է եկել քննադատական հայտարարություններով ու կոչերով: Հրաժարվել է մասնակցել նախաքննության ժամանակ, պատվերի տակ չի ստորագրել, Սեֆիլյանի դեմ ցուցմունք չի տվել: Ռեժիմի հետ չի համագործակցել, ապօրինի համագործակցության չի գնացել: Դրա համար նրան ազատազրկեցին երեքուկես տարի ժամկետով»,– հայտնեց Արայիկ Պապիկյանը՝ հավելելով, թե վերջինս բացարձակապես կապ չի ունեցել Սեֆիլյանի հետ, նույնիսկ չի ճանաչել նրան, երբևէ չեն հանդիպել, ավելին՝ նույնիսկ Ֆեյսբուքում ընկերներ չեն եղել:

Ներսես Պողոսյանն ընդամենը հրաժարվել էր ստորագրել ի սկզբանե իրեն առաջարկված թղթերը: Ընդ որում՝ եթե նա ընդուներ այդ առաջարկը, ըստ պաշտպանի՝ հավանաբար իրեն չէին էլ կալանավորի: Բայց նա ապօրինություն չի արել: Եվ քանի որ Սեֆիլյանի գործը պետք էր ամբողջացնել մի խումբ անձանց մասնակցությամբ, Ներսես Պողոսյանը դարձավ այդ մարդկանցից մեկը՝ ռեժիմի զոհը: Կարծում է պաշտպանը:

Մեղադրող կողմը Սեֆիլյանի համար 11 տարվա ազատազրկում էր պահանջել, սակայն դատավորն այդ դատավճիռը կրճատեց 6 ամսով: Սա ըստ Պապիկյանի զրո արժեք ունի:

«Դատավորի՝ այդ վեցամսյա ժամկետի փոփոխությունը բացարձակ զրո արժեք ունեցող գործոն է: Եթե դատավորը իսկապես դատավոր էր և արդարադատություն էր իրականացնում, նա պիտի արդարացման դատավճիռ կարդար: Ժիրայր Սեֆիլյանի դեպքում մեկ օրվա ազատազրկման դատավճիռը կամ տասուկես տարվա ազատազրկումը նույն անարդարադատությունն է՝ ռեժիմի պատվերի կատարումը: Անհասկանալի էր, թե ինչու նվազեցրեց: Թեև այդտեղ պետք չէ փնտրել ո՛չ իրավաբանություն, ո՛չ էլ՝ տրամաբանություն»:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»