Ստրկացուցիչ գործարքներն ու արդար դատաքննության խախտումը. «Փաստ»

«Փաստ» օրաթերթը գրում է.

«Նաիրիտ»–ի նախկին աշխատակիցները բողոքի ակցիաներից հետո, ինչպես հայտնի է, իրենց իրավունքները փորձում են վերականգնել դատարանների միջոցով: Տևական ժամանակ է, ինչ նրանց ներկայացրած հայցերով դատաքննություն է իրականացվում: Նաիրիտցիների շահերը ներակայացնող փաստաբան Տիգրան Սարգսյանը «Փաստ»–ի հետ զրույցում նախ ընդգծեց, որ այսօրվա դրությամբ կան հայցեր 18, 3, 26 և 131 հոգուց բաղկացած խմբերի կողմից, որոնք առանձին հայցերով են մտել դատարան:

Տիգրան Սարգսյանը տեղեկացրեց, որ կոնկրետ 18 հոգուց բաղկացած խմբի գործով Մարդու իրավունքների եվրոպական դատարան դիմելու վերաբերյալ որոշում է կայացվել: Նա մանրամասնեց, թե գանգատը հատկապես ինչ պատճառաբանությամբ են ներկայացնելու:

«Առաջին ատյանի դատարանում դատաքննության ընթացքում դատավարական նորմերի կոպիտ խախտումներ են թույլ տրվել: Տեղի է ունեցել Եվրոպական կոնվենցիայով նախատեսված արդար դատաքննության իրավունքի խախտում: Առանց մեր կողմին պատշաճ ծանուցելու և մեր բացակայությամբ դատավորը դատաքննության ավարտ էր հայտարարել և մտել խորհրդակցական սենյակ: ՀՀ քաղաքացիական դատավարության օրենսգրքում հատուկ նորմ կա, որտեղ նշվում է, որ դատաքննության ավարտ կարելի է հայտարարել միայն այն ժամանակ, երբ դատավորը համոզվում է, որ կողմը լրացուցիչ նյութեր ներկայացնելու ցանկություն չունի: Միայն դրանից հետո կարող է դատավորը մտնել խորհրդակցական սենյակ և որոշում կայացնել: Բայց այդ կանոնը խախտվել է: Մենք Վերաքննիչ դատարան բողոք ենք ներկայացրել, Վերաքննիչ դատարանը մեր պահանջը չի բավարարել: Հետո դիմել ենք Վճռաբեկ դատարան, որը կրկին չի բավարարել մեր բողոքը: Մեզ լրացուցիչ նյութեր տրամադրելու հնարավորություն չի տրվել: Բացի այդ, տեղեկացված չենք եղել վճռի հրապարակման օրվա և ժամի մասին: Եթե տեղեկացված լինեինք, նույնիսկ այն ժամանակ, երբ դատավորը խորհրդակցական սենյակում կլիներ, մենք նոր միջնորդություններ ներկայացնելու իրավունք կունենայինք: Ինչպես նաև՝ կարող էինք նոր դատաքննության վերսկսում խնդրել»,–ասաց փաստաբանը՝ ընդգծելով, որ վերոնշյալ խախտումները արդար դատաքննության իրավունքի խախտմանն են հանգեցրել, մինչդեռ պետությունը երաշխավորել է արդար դատաքննության իրավունքի իրականացումը:

«Վճռաբեկ դատարանի որոշումը մենք ստացել ենք հունվար ամսին: Նախատեսում ենք ապրիլ ամսվա ընթացքում նշված հիմքերով դիմում ուղարկել ՄԻԵԴ: Մեր շանսերը շատ մեծ են այնտեղ հաջողություն ունենալու համար»,– հավելեց Տ. Սարգսյանը:

Ավելի քան երկու տարի առաջ «Նաիրիտ»–ի աշխատակիցները հայտարարեցին, որ իրենք ստիպված են եղել ստորագրել մի պայմանագիր, ըստ որի՝ հրաժարվում են չվճարված աշխատավարձի տույժ ու տուգանքներից: Խոսքը դեռ այն ժամանակ չվճարված աշխատավարձերից գոյացած տույժ ու տուգանքների մասին է: 18 հոգուց բաղկացած խմբի հայցադիմումը տույժ ու տուգանքները ստանալու վերաբերյալ էր:

««Նաիրիտի» նախկին աշխատակիցները չվճարված աշխատավարձի հսկայական պարտքեր են ունեցել: Բողոքների, ակցիաների միջոցով իրենց վճարել էին աշխատավարձերը, բայց վճարել էր ոչ թե «Նաիրիտ» գործարանը, այլ «Նաիրիտ–2» ՓԲԸ–ն: Ի դեպ՝ անհասկանալի է, թե ինչ կազմակերպություն է: Քանի որ աշխատավարձը չէին տվել, բավականին շատ տույժ ու տուգանքներ էին հաշվարկվել: Նաիրիտցիները ստիպված են հրաժարվել այդ տույժ ու տուգանքներից, որովհետև իրենց ասել էին՝ եթե չհրաժարվեք՝ մայր գումարը չենք տա: Նման պայմանները դեմ են մարդու շահերին: Մարդը չպետք է հրաժարվի իր իրավունքից: Քաղաքացիական օրենսգրքով նման գործարքները կոչվում են ստրկացուցիչ գործարքներ: Նման գործարքները դատական կարգով ենթակա են անվավեր ճանաչման: Նաիրիտցիները դիմել էին դատարան ու խնդրել, որ այդ պայմանագրերը անվավեր ճանաչվեն: Այսինքն՝ իրենք ցանկանում են ստանալ իրենց չվճարված տույժերն ու տուգանքները, և ժամանակին ստորագրել էին, որովհետև ծայրահեղ վիճակում են եղել ու այլ տարբերակ չեն ունեցել»,–պարզաբանեց փաստաբանը:

Տիգրան Սարգսյանը հայտնեց, որ ներկայացված մյուս գործերով մի շարք դատական նիստեր են նշանակված:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»