Մաքուր ջրի կարոտ դիլիջանցիներն ահազանգում են. «Փաստ»

«Փաստ» օրաթերթը գրում է.

Սիրված ֆիլմի հայտնի խոսքերը, որ հնչել էին Մհեր Մկրտչյանի շուրթերից այն մասին, թե Դիլիջանի ծորակից հոսող ջուրը աշխարհում երկրորդ տեղն է զբաղեցնում, այսօր և արդեն երկարուձիգ տարիներ այդպես չէ: Այն, ինչ հոսում է դիլիջանյան բնակարանների ու տների խոհանոցների ու սանհանգույցների ծորակներից, դժվար է անվանել ջուր: Այդ պղտոր, կարծես թե հողի հետ խառնված հեղուկը պիտանի չէ խմելու համար: Թե՛ համը, թե՛ հոտը տհաճ զգացողություններ են առաջացնում մարդկանց մոտ: Դիլիջանցիները իրենց համար խմելու ջրի այլընտրանքային տարբերակ ունեն՝ ջուրը վերցնում են հատուկ աղբյուրներից: Դե իսկ «այլ» հնարավորությունների տեր մարդիկ օգտվում են խանութներում վաճառվող ջրից:

Ու թեև խնդիրը կա արդեն մոտ երկու տասնամյակ, բայց դրա լուծման ուղղությամբ կարելի է ասել, որ գրեթե ոչինչ չի կատարվել: Գրեթե, որովհետև բնակիչների ահազանգերը կամ բողոքները գոնե ուշադրության են արժանացել, խնդիրը արձանագրվել է: Սակայն դրանով էլ ամեն ինչ ավարտվել է:

Երկու տարի առաջ Դիլիջան տեղափոխված Արման Հայրապետյանը «Փաստ»–ի հետ զրույցում նշեց, որ լսել է, թե ծորակներից հոսող պղտորաջրերի պատճառը ֆիլտրերի բացակայությունն է: Սակայն հայտնի չէ, թե դրանք ինչպես են անհետացել՝ կամ գողացել են, կամ վաճառել, կամ էլ՝ պարզապես այլևս անսարք են: Նաև ասում են՝ անձրևից հետո անգամ գորտ է ընկել ծորակից:

Բնակիչները միշտ էլ դիմել են բոլոր պատկան մարմիններին՝ թե՛ այժմյան «Վեոլիա Ջուր» ընկերությանը և թե՛ դրանից առաջ գործող ընկերությանը: Դիլիջանում ապրող մարդիկ, սակայն, կարծես թևաթափ են եղել՝ թողնելով ամեն ինչ ինքնահոսի բազմիցս դիմելու ու պատասխան չստանալու պատճառով:

Սա իհարկե բոլորին չի վերաբերում, կան մարդիկ, և նրանք քիչ չեն, ովքեր հետևողական են՝ նամակներ են պատրաստում և ուղարկում պատկան մարմիններին:

Անձամբ Հայրապետյանը բավական ակտիվ է խնդրի կարգավորման հարցում, ժամանակ առ ժամանակ հրապարակումներ է անում իր ֆեյսբուքյան էջում Դիլիջանի պղտոր ջրի վերաբերյալ, լուսանկարներ ու տեսանյութեր տեղադրում: Նման մի նկարի հրապարակումից հետո էլ, խոսքը նախորդ տարվա մասին է, Իջևանի առողջապահական պետական տեսչությունից եկել էին և ջրի նմուշ վերցրել փորձաքննության համար: Սակայն, թե ինչ պարզեցին այդ վերցված նմուշից, տեղյակ չէ: Նա պատրաստվում է անձամբ նմուշ վերցնել և ուղարկել լաբորատոր հետազոտության: Այս պահին սպասում է անձրևների՝ դրանից հետո է, որ ծորակից հոսող ջուրը առավելագույնս կեղտոտ է լինում:

Հայրապետյանը, սակայն, բացառություն չէ: Բազմաթիվ դիլիջանցիներ նույնպես հետևողական են ու մինչև իրենց բնակարանների ծորակներից մաքուր ջուր չհոսի, չեն պատրաստվում դադարեցնել սկսած աշխատանքները: Այդ աշխատանքների սկիզբ կարելի է համարել բազմաթիվ քաղաքացիների՝ «Վեոլիա Ջուր» ընկերությանն ուղղված հարցումները:

Մասնավորապես, բնակիչներն ահազանգել են թե՛ ջրի որակի և թե՛ անկանոն ջրանջատումների մասին: Ընկերությունից նրանք մի ծավալուն նամակ էին ստացել, որի մեջ, սակայն, մեկ տող անգամ չկար ջրի որակի մասին: Այնտեղ նշված էր, որ վթարները պայմանավորված են համակարգի տեխնիկական անմխիթար վիճակով, որը «Վեոլիա Ջուր» ընկերությանն է անցել նախկին ջրամատակարար կազմակերպությունից: Գրված էր, որ ջրամատակարարման համակարգում առկա հիմնական խնդիրները վերացնելու և ջրամատակարարումը բարելավելու համար անհրաժեշտ են զգալի ներդրումներ, հավելելով, թե այդ նպատակով քննարկումներ են տարվում Ջրային տնտեսության պետական կոմիտեի հետ: Իսկ ջրանջատումների դեպքում պարզապես խորհուրդ էին տվել տեղեկատվություն ստանալ ընկերության կայքէջից, ֆեյսբուքյան էջից և կամ ԶԼՄ–ներով տարածվող հաղորդագրություններից:

Սակայն այս բովանդակությամբ նամակը Դիլիջանի բնակիչներին բնավ չի գոհացրել, այն ամենը, ինչ ասված էր, իրենք արդեն իսկ գիտեին: Նամակում գեղեցիկ ձևով շրջանցել էին գլխավոր խնդիրը՝ ջրի որակը, չէին հերքել, որ այն խմելու է, խնդիր չկա: Պարզապես բաց էին թողել այդ հարցը: Մարդիկ նամակում նշել են, որ այդ ջուրը ոչ միայն խմելու չէ, այլև՝ վտանգավոր է ու տարբեր աղիքային վարակների պատճառ կարող է դառնալ: Այս տողերը նույնպես անպատասխան են մնացել:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»