Հայկական կողմը պետք է պահանջ ներկայացնի. «Փաստ»

«Փաստ» օրաթերթը գրում է.

Ադրբեջանում մարտի 12–ից 17–ը կանցկացվեն զորավարժություններ: Ըստ ադրբեջանական լրատվամիջոցների՝ զորավարժություններին կներգրավվեն անձնակազմի մինչև 25 հազար զինծառայողներ, մինչև 250 միավոր տանկեր և այլ զրահատեխնիկա: Ի դեպ՝ Twitter–ի իր միկրոբլոգում Հայաստանի ԱԳՆ մամուլի քարտուղար Տիգրան Բալայանը տեղեկացրել է, որ «Ադրբեջանը զորավարժություններ է սկսել (երկրի նախագահի «վերընտրման» քարոզարշավի ամենամարդաշատ իրադարձությունը) ԵԱՀԿ պարտավորությունների բացահայտ խախտմամբ, առանց այդ մասին ԵԱՀԿ մասնակից պետություններին տեղեկացնելու»:

Զորավարժություններ իրականացնելու հանգամանքը պայմանավորված է Ադրբեջանում սպասվելիք նախագահական ընտրություններո՞վ, թե ավելի շատ արտաքին ազդակներ ունի:

Քաղաքագետ Ռուբեն Մեհրաբյանի խոսքով՝ նշված երկու հանգամանքներն էլ առկա են:

«Հասցեագրված է ներքին լսարանին՝լսարան, որը պետք է նախապատրաստվի նախագահական ընտրություններին: Երկրորդն, անշուշտ, մեսիջ է միջազգային հանրությանը: Ընդ որում՝ ինչպես ՀՀ ԱԳՆ մամուլի խոսնակն է նշել, դա արվում է ԵԱՀԿ–ի առջև ստանձնած պարտավորությունների կոպիտ հակասություններով: Երրորդ տարրը, որը ես անպայման կուզեի շեշտել, հետևյալն է. ես այստեղ զուգահեռ եմ տեսնում Արցախի նախագահ Բակո Սահակյանի` ԱՄՆ կատարած այցի, ինչպես նաև Ադրբեջանի ռեակցիայի հետ: Այցի առնչությամբ Ադրբեջանի ԱԳՆ–ն բավականին տխմար հայտարարությամբ հանդես եկավ: Իսկ 4–րդն այն է, որ Ադրբեջանը պատրաստվում է պատերազմի, և այս զորավարժությունները նախապատրաստական կարևոր փուլերից են»,– «Փաստ»–ի հետ զրույցում ասաց քաղաքագետը:

Ռուբեն Մեհրաբյանի խոսքով՝ Հայաստանի արձագանքը զորավարժություններին համարժեք է:

«Այո, հայկական բանակը պետք է պատրաստ լինի հետ մղել Ադրբեջանի նախաձեռնած ցանկացած արկածախնդրություն, իսկ Ադրբեջանը վաղ թե ուշ դա կնախաձեռնի: Խոսքը ոչ թե առաջիկա շաբաթների կամ ամիսների մասին է, այլ գուցե ավելի ուշ ընկած ժամանակահատվածի, երբ Ադրբեջանը Ռուսաստանի հետ համատեղ կորսա հարմար պահը: Առանց Ռուսաստանի Ադրբեջանը երբեք դա չի անի: Մեր բանակը պետք է պատրաստ լինի, հրամկազմը պետք է տեղյակ լինի խնդիրներին, բարձրացնի կոորդինացիայի աստիճանը: Այս ամենի մասին արված պաշտոնական հայտարարությունները նույնպես ուղերձ են թե՛ Հայաստանի, թե՛ Արցախի և թե՛ միջազգային հանրությանը, որ, այո՛, եթե անհրաժեշտություն եղավ, և եթե Ադրբեջանը ոտքը փշալարերից դուրս հանի, մենք պատրաստ ենք ատամները ջարդելու»,– նշեց մեր զրուցակիցը՝ հավելելով, որ ինչքանով հնարավոր է, հայկական կողմը գնում է իր արտաքին քաղաքականության ու անվտանգության դիվերսիկացմանը:

ԵԱՀԿ պարտավորությունների բացահայտ խախտման առումով մինչ այս միայն պաշտոնական Երևանի արձագանքը կա: Հարցին, թե ԵԱՀԿ–ի ու նաև ԵԱՀԿ Մինսկի խմբի համանախագահների դիրքորոշման անհրաժեշտությունը չկա՞, քաղաքագետը պատասխանեց. «Նախևառաջ Հայաստանը ԵԱՀԿ–ում այդ հարցը պետք է պաշտոնապես բարձրացնի, միայն խոսնակի հայտարարությունը բավարար չէ: Պետք է բոլորին համապատասխան ձևով գրություն ուղարկի»:

Ռուբեն Մեհրաբյանը Ադրբեջանի կողմից նման կեցվածքն արհամարհանք է որակում:

«Ցավոք սրտի, միջազգային հանրությունը վերջին տարիներին գնալով էլ ավելի է կորցնում իրերն իրենց անուններով կոչելու ունակությունը: Եվ սա բերում է նրան, որ տարբեր դուրսպրծուկներ համարում են, որ իրենց ամեն ինչ կարելի է: Օրինակ՝ Ալիևը, Էրդողանը, Պուտինը: Նրանք կարող են իրենց նման բաներ թույլ տալ` միայն զգալով իրենց անպատժելիությունը»,– հավելեց քաղաքագետը:

Նրա խոսքով՝ ԵԱՀԿ ՄԽ հայտարարությունը կարևոր կլինի, քանի որ այս քայլն ուղղված չէ տարածաշրջանում խաղաղության ու կայունության ամրապնդմանը, այլ ուղղված է ապակայունացմանը:

«Սա հարված է թե՛ տարածաշրջանային, թե՛ եվրոպական անվտանգությանը: Այդ ամենի մասին հայկական կողմը պետք է շատ հստակ արտահայտվի և պահանջ ներկայացնի: Պետք է լինի պաշտոնական դիրքորոշում՝ պաշտոնական նամակների ու նոտաների ձևով: Պետք է նաև դեսպաններ հրավիրվեն ԱԳՆ, նրանց հանձնվեն համապատասխան գրություններ, կարծիքներ փոխանակվեն: Հայկական կողմը, սրա հետ կապված, բոլորից պետք է դիրքորոշում պահանջի: Իսկ առաջին հերթին՝ հենց Ռուսաստանից, որովհետև այդ մազութի տակառն իրեն այդքան լպիրշ չէր պահի, եթե 90 տոկոսով մինչև ատամները զինված չլիներ ռուսական հարձակողական զենքով»,–եզրափակեց Ռ. Մեհրաբյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»