Վարչապետ Կարեն Կարապետյանը և ՀՀԿ նախընտրական ցուցակի ձևավորման սկզբունքները. «Փաստ»

«Փաստ» օրաթերթը գրում է.

Մեր հյուրն է քաղտեխնոլոգ Կարեն Քոչարյանը

– Պարոն Քոչարյան, ձեր կարծիքով վարչապետ Կարեն Կարապետյանը կընդգրկվի՞ ՀՀԿ նախընտրական ցուցակում, այն դեպքում, երբ օրենքի հետ կապված խնդիրներ կան: Ինչպես ժամանակին վարվեց Ռոբերտ Քոչարյանը: Եվ եթե օրենքը շրջանցելով ընդգրկվի ցուցակում, ապա այդ հանգամանքն ինչպե՞ս կանդրադառնա նրա վարկանիշի վրա:

– Եթե ցուցակում ընդգրկվելը կեղծիքով լինի, շատ վատ կանդրադառնա: Ես կարծում եմ, որ, այո՛, Հանրապետական կուսակցությունն ուզում էր ամեն ինչ անել, որպեսզի Կարեն Կարապետյանը լիներ իրենց քարոզարշավի դեմքը: Բայց անգամ այն պարագայում, եթե ցուցակում չլինի նրա անունը, միևնույն է Կարեն Կարապետյանն էլի է լինելու այդ կուսակցության նախընտրական քարոզարշավի դեմքը: Դա իմ համոզմունքն է: Եվ դա բնական է, քանզի բոլորն են հասկանում, որ նրա վարկանիշը բարձր է: Անգամ կարող եմ պատկերացնել, թե մոտավոր ինչ է ասելու: Ասելու է` դուք ձայն եք տալիս ոչ թե Հանրապետական կուսակցությանը, այլ ձայն եք տալիս ինձ: Որովհետև Հանրապետական կուսակցության ընտրվելու դեպքում ես մնալու եմ վարչապետ:
Ես կարծում եմ, որ Կարեն Կարապետյանն ավելի ժամանակակից տիպի գործիչ է և չի գնա կեղծիքի: Եթե չլինեն իրավական հիմքեր, որ կարող է ընդգրկվել ցուցակում, ապա չի ընդգրկվի: Եվ դա կաշխատի իր օգտին: Որովհետև ընտրողը կհասկանա, որ անգամ իր սեփական անձի համար նա չի դիմում կեղծիքի:

– Սերժ Սարգսյանի քաղաքական ժառանգորդը միայն Կարեն Կարապետյա՞նն է, թե ուրիշների էլ եք տեսնում այդ դերում:

– Դեռևս ակտուալ չէ ժառանգորդ հասկացությունը: Պարզապես այս պահին, որպես ներկա վարչապետ, դիտարկվում է Կարեն Կարապետյանը: Իսկ ինչ վերաբերում է այն բանին, թե ով կլինի վարչապետ արդեն 2018 թվականի ապրիլից հետո, ասեմ` ո’չ, միայն նրան չէ, որ ես տեսնում եմ այդ պաշտոնում:

– Իսկ դրանք երևացո՞ղ դեմքեր են:

– Թույլ տվեք առայժմ այդ մասին չխոսել: Եվ ասեմ, թե` ինչո՞ւ: Հնարավոր է սխալվեմ, երբ ինչ–ինչ անուններ տամ: Իսկ այդ դեպքում այդ մարդկանց կդնեմ լուրջ հարվածի տակ:

– Իսկ ի՞նչ եք կարծում` Հանրապետական կուսակցության ցուցակում առավել ովքե՞ր կլինեն. կընդգրկվե՞ն Կարեն Կարապետյանի մարդիկ:

– Անպայման կընդգրկվեն:
Ես կարծում եմ, որ ցուցակը կձևավորվի երկու սկզբունքով: Նախ` կբացակայի կրիմինալը: Կհանվեն թաղային հեղինակությունները, այսպես ասած` օդիոզ դեմքերը: Եվ ապա` կհանվի ծերակույտը:

– Այդ դեպքում կարո՞ղ ենք ասել, որ սերնդափոխություն տեղի կունենա իշխող ուժի մեջ:

– Սերնդափոխություն չի կարող տեղի չունենալ: Բանն այն է, որ լինի բնական ճանապարհով: Վե՛րջ, արդեն անցել է ժամանակը. այդ մարդիկ այլևս չեն կարող բնության դեմ պայքարել:

– Եվ այդ մարդիկ հանգիստ կգնան թոշակի՞:

– Չէ, հանգիստ չեն գնա: Մինչև վերջին վայրկյանը կպայքարեն: Ատամներով կբռնվեն իշխանությունից: Ամեն ինչ կանեն, որ պրոցեսը խանգարեն: Բայց սրանք արդեն այլ խնդիրներ են:

– Դրանք ստորգետնյա՞ շարժումներ կլինեն, թե արտաքուստ կերևան:

– Չի բացառվում անգամ հասնի այն վիճակին, որ արտաքուստ էլ երևան: Իսկ ստորգետնյա շարժումները վաղուց են ընթանում, այնպես չէ, որ նոր են:

– Իսկ էական բան կարո՞ղ են անել «պայքարողները»:

– Ընդհանուր առմամբ չեն կարող: Եթե հաշվի առնենք, որ, օրինակ, Սուրիկ Խաչատրյանի նման ֆիգուրը հայտարարեց, որ իր թեկնածությունը չի դնում խորհրդարանական ընտրություններում և դուրս եկավ կուսակցության մարզային կառույցի ղեկավարի պաշտոնից, ապա կարելի է ենթադրել, որ շուտով կսկսվի նման հայտարարությունների շքերթը:
Կան մարդիկ, ովքեր ունեն ռեսուրս, և եթե նրանց չստիպեն, չեն հեռանա: Իսկ կան նաև մարդիկ, ովքեր այդ ռեսուրսը չունեն, ուստի նրանց հեռացումն ավելի հանդարտ կլինի:

Շարունակությունը` «Փաստ» օրաթերթի այսօրվա համարում: