48 հազար եվրո՝ հօգուտ «Եհովայի վկաների». «Փաստ»

«Փաստ» օրաթերթը գրում է.

Կառավարության նիստի չզեկուցվող հարցերի մեջ է ընդգրկվել ՀՀ արդարադատության նախարարությանը գումար հատկացնելու մասին հարցը, որը վերաբերում է Մարդու իրավունքների եվրոպական դատարանի «Ադյանը և այլք ընդդեմ Հայաստանի» գործով վճռին:

2017 թվականի հոկտեմբերի 12–ի կայացրած վճռի պահանջները կատարելու նպատակով ՀՀ կառավարության պահուստային ֆոնդի հաշվին 2018 թ. 1–ին կիսամյակում 48000 եվրոյին համարժեք ՀՀ դրամ կհատկացվի: 4 դիմումատուներից յուրաքանչյուրին 12000 եվրո կհատուցվի:

«Ադյանը և այլք ընդդեմ Հայաստանի» գործը վերաբերում է Արթուր Ադյանին, Վահագն Մարգարյանին, Հարություն Խաչատրյանին և Գարեգին Ավետիսյանին, ովքեր 2011 թ. ամռանը դատապարտվել են երկուսուկես տարվա ազատազրկման։

ՀՀ չորս քաղաքացիներ բողոք են ներկայացրել 2011 թվականի դեկտեմբերի 6–ին՝ Մարդու իրավունքների և հիմնարար ազատությունների պաշտպանության մասին կոնվենցիայի 34–րդ հոդվածի հիման վրա: Հայցվորները ՄԻԵԴ–ում բողոքել են, որ իրենց նկատմամբ կայացված դատավճիռները խախտել են կոնվենցիայի 9–րդ հոդվածը, և նրանց կալանքը հիմնված է եղել դատարանների կողմից կարծրատիպային փաստարկների վրա: Հայցվորները «Եհովայի վկաներ» կրոնական կազմակերպության անդամներ են եղել: Երկուսը՝ Երևանից, մեկը՝ Ծաղկավանից, մյուսը՝ Կապանից: 2011 թվականի մայիսին և հունիսին նրանց կանչել են զինվորական ծառայության, բայց քաղաքացիները չեն ներկայացել: Փոխարենը նրանք նամակներ են ուղղել զինկոմիսարիատ և շրջանային դատախազություն՝ հրաժարվելով զինվորական կամ այլընտրանքային ծառայության անցնել: Հայցվորների դեմ զինվորական կամ այլընտրանքային ծառայությունից խուսափելու մեղադրանքներ են ներկայացվել, և նրանք դատապարտվել են ազատազրկման: Նրանք պնդել են, որ իրենք «Եհովայի վկաներ» են, և եկել մի եզրակացության, ըստ որի՝ եվրոպական չափանիշներով առաջարկվող ծառայությունը փաստացիորեն քաղաքացիական բնույթ չի կրել և վերահսկվել է զինվորական իշխանությունների կողմից:

Նախորդ տարվա հոկտեմբերի 12–ին ՄԻԵԴ–ը սահմանել է, որ Հայաստանում չորս «Եհովայի վկաներ» անարդարացիորեն դատապարտվել են ազատազրկման այլընտրանքային ծառայությունից հրաժարվելու համար, որը հսկվում և վերահսկվում էր զինվորական մարմինների կողմից։ ՄԻԵԴ–ը նաև սահմանել է, որ այդ չորս երիտասարդները դատապարտվել են անհիմն կերպով, քանի որ Հայաստանը չի տրամադրել իսկական քաղաքացիական բնույթի այլընտրանքային ծառայության հնարավորություն, թեև պարտավորվել էր դա անել։ ՄԻԵԴ–ը վճռել է, որ այդ երիտասարդների հետապնդմամբ ու դատապարտմամբ ոտնահարվել է Մարդու իրավունքների եվրոպական կոնվենցիայի 9–րդ հոդվածով երաշխավորված խղճի և կրոնի ազատության իրավունքը։

Հավելենք, որ նշված գործով ՄԻԵԴ վճիռն օրինական ուժի մեջ է մտել 2018 թ. հունվարի 12–ին: Վճռով սահմանված հատուցման գումարի վճարման վերջնաժամկետը 2018 թ. ապրիլի 12–ն է:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»