Արամ Սարգսյան. «Իշխանավորները համակարգի գերիներն են, բայց չեն էլ ուզում ազատվել դրանից». «Փաստ»

«Փաստ» օրաթերթը գրում է.

Հայաստանի դեմոկրատական կուսակցության նախագահ Արամ Սարգսյանը «Փաստ»–ի հետ զրույցում նշեց, որ ՀՀ 4–րդ նախագահի ընտրությունից մի քանի օր առաջ Արմեն Սարգսյանը հանդիպել է իրենց կուսակցության անդամների հետ և սպառիչ պատասխանել բոլոր հարցերին: Ինչ վերաբերում է ՀՀ քաղաքացիությանը, ապա նրանց համար համոզիչ է փաստարկը, թե 2011 թվականից է ՀՀ նախագահը ՀՀ քաղաքացիություն ունեցել: Ովքեր կասկածներ ունեն, Դեմկուսի նախագահը խորհուրդ է տալիս դիմել անձնագրային և վիզաների վարչություն:

Խոսելով խորհրդարանի հարց ու պատասխանի ժամանակ Ամուլսարի հետ առնչություն ունենալ–չունենալու մասին հարցին՝ Արամ Սարգսյանն ասաց, որ նույն հարցը բարձրացրել են իրենց կուսակիցներն ու մտավորականները, որին ՀՀ նախագահը պատասխանել է:

«5 տարի առաջ իրեն խնդրել են խորհրդատվություն իրականացնել, դա տևել է մոտ 2 ամիս, որից հետո ինքը այդ ընկերության հետ որևէ կապ չունի: Բացի այդ, Ա. Սարգսյանը շատ կարևոր այլ հանգամանք նշեց, որ ընդերքի շահագործման բոլոր այն ծրագրերը, որոնց գործունեությունը վնասելու է մեր բնապահպանությանը, չպետք է կյանքի կոչվեն: Նա այդ մասին հստակ հայտարարել է մեզ հետ ունեցած հանդիպման ժամանակ»,– ասաց Ա. Սարգսյանը:

Համաձայնելով դիտարկմանը, թե բոլորս բազմիցս ականատես ենք եղել, թե ինչպես են թեկնածուները սկզբում գեղեցիկ խոսքեր ասում, բայց ընտրվելուց հետո դրանց մասին մոռանում: Ուստի մեզ ոչ թե գեղեցիկ կամ ճկուն խոսքեր ասող է պետք, այլ առաջնորդ, ով կկարողանա իշխանության մեջ կառավարման որակ փոխել, Արամ Սարգսյանն ասաց, որ եթե 4–րդ նախագահը քաղաքական կամք դրսևորի, իսկ հանրությունն էլ ընդունի և աջակցի նրա ծրագրերին, ապա հնարավոր կլինի հաջողություններ ակնկալել:

«Ցավոք սրտի, մինչ օրս մենք չունենք լավ օրինակներ, քանի որ եղած համակարգը դա թույլ չի տալիս: Հիմա ամեն ինչ կախված է նրանից, թե ներկա քաղաքական վերնախավը կցանկանա՞ նորընտիր նախագահի հնարավորություններն ու կարողությունները ճիշտ ձևով օգտագործել և այդ ամենն ի սպաս դնել մեր երկրի զարգացմանը, թե՝ ոչ: Եթե Արմեն Սարգսյանը հանրության աջակցությունն ունենա, դրական փոփոխություններ կկարողանա իրականացնել: Հակառակ դեպքում ոչինչ չի կարողանա անել: Բայց եթե մենք ուզում ենք, որ երկրում դրական փոփոխություններ լինեն, ուրեմն պետք է ամեն կերպ սատարենք ու աջակցենք նրան: Ես այդպես եմ պատկերացնում երկրի առաջընթացը: Իսկ եթե հույսներս դնենք, թե նա Մատրոսովի նման պետք է փորձի փրկել բոլորիս, ապա պետք է իմանանք, որ ոչինչ էլ չի ստացվի»,– ասաց Ա. Սարգսյանը:

Կուսակցության առաջնորդը նշեց նաև, որ քաղհասարակության կողմից մեկնած ձեռքը նույնպես օդում չի մնա, եթե պատասխանատու պաշտոններ զբաղեցնողները շատ արագ համակարգի գերին չդառնան:

«Բոլորը, ովքեր իշխանության մեջ են, այսօրվա համակարգի գերիներն են: Եվ ցավալին այն է, որ չեն էլ ուզում ազատվել այդ գերությունից: Սա է ամբողջ խնդիրը, և ամենացավալին այն է, որ համարում են, թե դա է ճիշտը: Իսկ համակարգից ազատվել հնարավոր կլինի միայն այն դեպքում, երբ քաղաքական կամքի ու հանրային միասնության դաշինքը կայանա: Երբ տեսնենք, որ մեր ծրագրային դրույթներին համարժեք քայլեր են արվում, այդ ժամանակ էլ հանդես կգանք որպես աջակցող ուժ: Բացի այդ, հանրության մեջ դրական փոփոխությունների մեծ ծարավ կա, և եթե նրանք տեսնեն նման գործնական փոփոխություններ, ապա աջակիցների շարքերն անպայման շատ մեծ կլինեն, բայց քանի դեռ համակարգը շարունակում է քրեաօլիգարխիկ լինել, արդարության հաստատման սկզբունքը չի գործի»,– ասաց ՀԴ կուսակցության նախագահ Արամ Սարգսյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»