Հակոբ Սանասարյան. «Մեկը 40 միլիոն տոննա թափոն է լցնում շրջակա միջավայր, ո՛չ հարկում են, ո՛չ տուգանում». «Փաստ»

«Փաստ» օրաթերթը գրում է.

«Ախթալայի ԼՀԿ» ՓԲԸ–ն իր կողմից կատարված խախտումների հետևանքով շրջակա միջավայրին հասցված վնասը փոխհատուցելու նպատակով ՀՀ բնապահպանության նախարարությանը կվճարի ավելի քան 5 միլիոն դրամ: Այս մասին տեղեկանում ենք ՀՀ բնապահպանության նախարարության մամլո ծառայությունից:

Այս տարվա հունվարի 16–ից փետրվարի 4–ն ընկած ժամանակահատվածում ՀՀ ԲՆ բնապահպանության և ընդերքի տեսչական մարմինը ստուգում է անցկացրել «Ախթալայի ԼՀԿ» ՓԲԸ–ում, որի արդյունքում պարզվել է, որ ընկերությունը խախտել է մի շարք օրենքներ, այդ թվում ՀՀ ջրային և «Ընդերքի մասին» օրենսգրքերի, «Մթնոլորտային օդի պահպանության մասին», «Թափոնների մասին» օրենքների մի շարք հոդվածների պահանջներ:

Մասնավորապես, իրականացվել է ջրօգտագործման թույլատրելիից ավելի ջրառ,

2017 թ. վթարի հետևանքով արտադրական հոսքաջրերն աղտոտել են 200 քառակուսի մետր հողային տարածք, մթնոլորտային օդ է արտանետվել թույլատրելիից ավելի փոշի և առանց թույլտվության ածխածնի ազոտի օքսիդներ, բնության և շրջակա միջավայրի պահպանության դրամագլխին սահմանված կարգով վճարները չեն կատարվել:

Ընդհանուր առմամբ նշված խախտումների համար նախատեսվել է տարբեր չափերի վարչական պատասխանատվություն և նախազգուշացում` խախտումները վերացնելու համար։

Նշված խախտումներն առաջացրել են շրջակա միջավայրին հասցված վնասի վերականգնում 5 միլիոն 3 հազար 974 և վարչական պատասխանատվություն` 200 հազար դրամի չափով։

Հայաստանի կանաչների միության նախագահ Հակոբ Սանասարյանը պատասխանելով «Փաստ»–ի հարցին, թե արդյոք այդ տուգանքները բավարար են օրինախախտներին «խելքի բերելու» համար, դրական արձագանքեց, նշելով, թե սա ամբողջ աշխարհում ընդունված կարգ է, սակայն, թե ինչ բարեխղճությամբ են այն կատարում, այլ հարց է:

«Հայաստանում թափոնների հարցը անկառավարելի է: Մեկը մի 40 միլիոն տոննա թափոն է լցնում շրջակա միջավայր, դրան ոչ հարկում են, ոչ էլ առանձին դեպքերում տուգանում, ինչպես օրինակ Քաջարանի դեպքում: Բայց լավ է, որ գոնե փոքր դեպքերն են անում»,– նշեց բնապահպանը:

Հարցին, թե տուգանքները կարող են դադարեցնել հետագա խախտումները և գործունեություն ծավալողին օրինապահ դարձնել, Սանասարյանը պատասխանեց, որ տուգանքի իմաստը հենց դա է:

«Նույնը վերաբերում է սանիտարական խնդիրներին, արտադրություններին, եթե սխալ են արտադրում, փակում են արտադրությունը: Բայց ես չեմ կարող ասել, թե ինչ բարեխղճությամբ են իրենք գործն անում, քանի որ այնտեղ ԲՆ–ից են գնացել, տեսել: Իսկ մենք գիտենք, թե այնտեղ ինչ է կատարվում: Ախթալայում, Շամլուղում հանցագործություն է կատարվում, իրենց ամբողջ թափոնները լցնում են անտառային տարածք, Ախթալա, Նահատակ գետեր: Խոշորածավալ աղտոտումներ են: Այս փոքր տուգանքներն էլ թող լինեն»,– ասաց Սանասարյանը և պատասխանելով՝ խնդիրը վերահսկելու այլ լծակներ նախարարությունը չունի հարցին, ասաց. «Դե պակաս լծակ չէ սա, ուղղակի, եթե առհասարակ փոքր գործերի համար տուգանում են, իսկ մեծի համար փակում, պարզապես մեզ մոտ դա ընդունված չէ»:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»