Զսպելո՞ւ, թե գումար աշխատելու միջոց. «Փաստ»

«Փաստ» օրաթերթը գրում է.

Այլ երկրում գրանցված տրանսպորտային միջոցների սեփականատերերը մարտի մեկից Վրաստան մուտք գործելիս պարտավոր են ապահովագրել իրենց տրանսպորտային միջոցը:

Վրաստան մուտք գործած մարդատար ավտոմեքենաների համար պահանջվում է առնվազն 15 օր ժամկետով ապահովագրում կատարել, որի դեպքում պետք է վճարել 30 լարի: Ապահովագրում կարող է կատարվել նաև 30, 90 օրով ու մեկ տարով:

Մարդատար մեքենաների ու մոտոցիկլետների պարագայում առանց ապահովագրության տրանսպորտային միջոց վարելու դեպքում նախատեսվում է մոտ 100 լարի տուգանք: Ավտոբուսների և բեռնատարների դեպքում նախատեսվում է 200 լարի տուգանք:

Մինչ Վրաստանում առկա փոփոխություններին անդրադառնալը, «Վարորդի ընկեր» հասարակական կազմակերպության փոխնախագահ Դավիթ Պեդանյանը Հայաստանի օրինակն է բերում:

«Ինչպես Վրաստանի, այնպես էլ ցանկացած այլ երկրի քաղաքացի Հայաստան մեքենայով մուտք գործելուց ապահովագրական վճար է տալիս: Այսինքն՝ այն, որ Վրաստանում հայերը պետք է ԱՊՊԱ–ի գումար վճարեն, հայերը վրացիների նկատմամբ դեռ վաղուց էին կիրառում: Ի դեպ՝ բավականին օբյեկտիվ որոշում է: Բացի դրանից, պետք է նկատել, որ հայկական ապահովագրական ընկերությունները հատուցումներն իրականացնում են միայն ՀՀ–ի ու Արցախի տարածքում տեղի ունեցած ՃՏՊ–ների համար: Այսինքն՝ եթե հայկական համարանիշներ ունեցող մեքենայով վթարի էին ենթարկվում Վրաստանում, հայկական ապահովագրականները հատուցում չէին տալիս, մարդիկ պետք է տեղում հարցը լուծեին: Չի բացառվում նաև, որ հայկական մեքենաները Վրաստանում նույնիսկ թեթև վթարի դեպքում փախուստի են դիմել: Իսկ մեքենան գտնելը լուրջ խնդիր է, եթե մանավանդ սահմանն անցավ»,– «Փաստ»–ի հետ զրույցում ասաց Դ. Պեդանյանը:

Նա օրինակ բերեց. «Երբ կայանատեղիում ինչ–որ մեքենայի են հարվածում, շատ մարդիկ հնարավոր է, որ փախուստի են դիմում: Մեքենայի սեփականատիրոջը չեն զանգահարում միայն նրա համար, որ Բոնուս–Մալուս համակարգի համաձայն իրենց ԱՊՊԱ–ն չթանկանա: Իսկ Վրաստանում ԱՊՊԱ–ն ընդհանրապես չէր հատուցում, և այդ մարդիկ պետք է իրենց գրպանից այդ հատուցումն անեին, ինչը նորմալ է, թեև հնարավոր է, որ շատերն այդ հարցում պարտաճանաչ չեն գտնվել»:

Դավիթ Պեդանյանը չբացառեց, որ փոփոխությունն, ամեն դեպքում, նաև զուտ գումար աշխատելու համար է արվել:

«Միգուցե գումար աշխատելու միջոց լինի, որովհետև մեզ մոտ էլ ապահովագրականը պարտադիր դարձրեցին հենց նման նպատակներով: Վրաստանն , ամեն դեպքում, գումար կորզելու հարցերում բավականին «հետամնաց» է: Վրաստանում տեխզննումը պարտադիր է դարձել միայն այս տարվա հունվարի 1–ից, մինչ այդ պարտադիր չի եղել: Փաստացի ստացվում է, որ իրենց մոտ մեր սցենարները մի քանի տարի հետո են հասնում: Վրաստանի ներքին քաղաքականությանը չեմ տիրապետում, բայց մտածում եմ՝ նաև գումարային շահերն են բախվել իրար, որ պարտադիր են դարձել: Մյուս կողմից էլ այն քաղաքակիրթ միջոց է՝ հետագայում վարորդների միջև ծագած խնդիրներից խուսափելու համար: Մեզ մոտ մինչև ԱՊՊԱ–ն պարտադիր դարձնելը, ծեծկռտուքներ, վենդետաներ էին լինում: Վրացիներն էլ մեզ նման տաքարյուն ազգ են: Չի բացառվում, որ ԱՊՊԱ–ն պարտադիր կիրառելն այդ իմաստով զսպելու միջոց է»,– նկատեց մեր զրուցակիցը:

Ինչ վերաբերում է սահմանված տուգանքներին, ՀԿ փոխնախագահը նշեց. «Մեր ԱՊՊԱ–ների 100 հազար դրամի համեմատ նշվածը շատ էժան տուգանք է: Եթե Վրաստանի քաղաքացուն մեզ մոտ առանց ԱՊՊԱ–ի բռնեն, տուգանելու են 100 հազար դրամով»:

Դավիթ Պեդանյանի խոսքով՝ հնարավոր է դեպի Վրաստան մեքենաների հոսքը նվազի, քանի որ Հայաստանից Վրաստան ուղևորափոխադրումներն այդքան էլ թանկ չեն:

«Համենայն դեպս, ստացվում է այն գինը, որը պետք էր մեքենայի ԱՊՊԱ–ի համար: Մեքենաների հոսքի նվազումը նույնիսկ լավ է, քանի որ ավելի ապահով է գնալ ուղևորափոխադրող մեքենայով: Համենայն դեպս, այդ մեքենաները երթևեկության մինիմալ կանոնները պահպանում են»,– եզրափակեց նա:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»