Տաքսիների համար հին մեքենաների շահագործումը կարգելվի. «Փաստ»

«Փաստ» օրաթերթը գրում է.

Իրավական ակտերի նախագծերի հրապարակման միասնական կայքում Հայաստանի տրանսպորտի, կապի և տեղեկատվական տեխնոլոգիաների նախարարությունը հրապարակել է «Ավտոմոբիլային տրանսպորտի մասին» ՀՀ օրենքում փոփոխություններ և լրացումներ կատարելու նախագիծը: Ներկայացված նախագծի 1–ին հոդվածի 5–րդ կետի համաձայն՝ այն կազմակերպությունները կամ անհատ ձեռնարկատերերը, որոնք սույն օրենքի ուժի մեջ մտնելուց հետո ցանկություն են հայտնում իրականացնել տաքսամոտորային փոխադրումներ կամ փոխարինել տաքսամոտորային փոխադրումներում ներգրավված տրանսպորտային միջոցները, պետք է փոխադրումներում ներգրավեն տվյալ ավտոտրանսպորտային միջոցների արտադրության տարեթվից հաշվարկված մինչև 6 տարեկան տրանսպորտային միջոցներ: 4–րդ հոդվածի 1–ին կետով էլ 2022 թվականի հունվարի 1–ից արտադրության տարեթվից հաշվարկված 6 տարեկանից բարձր տրանսպորտային միջոցների շահագործումը տաքսամոտորային փոխադրումներում արգելվում է:

«Փոխադրողների միության» նախագահ Հրանտ Եղիազարյանը նախագծում առկա փոփոխությունները մի կողմից ընդունելի է համարում, մյուս կողմից էլ՝ խնդրահարույց:

Հրանտ Եղիազարյանը «Փաստ»–ի հետ զրույցում նախ ընդգծեց, որ առաջինը պետք է մտածել ուղևորի անվտանգության մասին:

«Վեց տարեկան արտասահմանյան արտադրության մեքենաները բավականին ամուր են և կարող են շահագործվել, բայց օրենքի նախաձեռնողը պետք է ապահովի նաև ուղևորի անվտանգությունը: Կային օրենքներ, որոնք ժամանակին զրոյացվեցին, բայց նման բան չէր կարելի անել, որովհետև դրանով մենք խաչ քաշեցինք տաքսամոտորային փոխադրումներով զբաղվող թե՛ վարորդների և թե՛ ուղևորների անվտանգության վրա: Այսինքն՝ այդ օրենքները զրոյացնելու արդյունքում ստեղծվեց մի իրավիճակ, երբ ամեն մարդ կարող է գնալ, լիցենզիա ստանալու համար վճարում կատարել և դառնալ տաքսիստ: Բայց այդպես չի լինում: Խոսում ենք ցիվիլ լինելու, եվրոպական ոճի ու փորձի մասին, բայց մենք այդ ամենի հետ ոչ մի կապ չունենք, իսկ տաքսիների մասին օրենքը «պլենդուսից» ցածր է»,– նշեց «Փոխադրողների միության» նախագահը:

Հրանտ Եղիազարյանը շեշտեց, որ եթե հիմա փորձում են կանոնակարգել ոլորտը, օրենքի նախագծում մեկ այլ կետ էլ պետք է լինի. «Այն է՝ վեց տարեկանից մեծ ավտոմեքենաները տեխնիկապես բավարար լինելու պարագայում առանձին դեպքերում կարող են ներգրավվել այդ աշխատանքներում: Այս դեպքում ամեն ինչն իր տեղը կընկնի: Իհարկե, այն պայմանով, որ եթե 6 տարեկան մեքենաները տարեկան մեկ անգամ են ստուգատես անցնում, այդ մեքենաները պետք է տարեկան երկու անգամ տեխստուգատես անցնեն»:

Անդրադառնալով բուն նախագծին, մեր զրուցակիցը շեշտեց. «Մեծ հաշվով՝ շատ նուրբ պահ է՝ արգելե՞լ, թե թույլատրել: Արգելելով հացից զրկում ենք վարորդների մի մեծ խմբի, մյուս կողմից էլ մենք վտանգում ենք քաղաքացիների կյանքը: Եթե մարդն անսարք մեքենայով ուղևոր է տեղափոխում՝ նա պոտենցիալ մարդասպան է»:

Հրանտ Եղիազարյանը նաև ընդգծեց, որ այսօր Երևանում տաքսիները գերհագեցած են:

«Գերհագեցած լինելով՝ տաքսիները նաև որոշակի խնդիրներ են առաջացնում կապված երթևեկության հետ: Խցանումների հիմնական պատճառը տաքսիներն են: Հիմա եթե մենք ուզում ենք, որ ինչ–որ փոփոխություն լինի, պետք է քայլեր ձեռնարկենք: Ես, իհարկե, կտրականապես դեմ եմ, որ մարդուն իր մի կտոր հացից զրկենք, բայց այս գերհագեցած վիճակը նույնպես խանգարում է: Մեր միջին տեղափոխման արագությունը 20 կմ/ժամ–ից, ի վերջո, չի անցնում: Սա հենց մեծաթիվ ավտոմեքենաների առկայության հետևանքն է: Հիմա եթե ուզում են կանոնակարգել, թող կարգավորեն, բայց նաև պետք է հանրային քննարկում լինի: Պետք է ներգրավվեն համապատասխան հասարակական կազմակերպություններին, քանի որ իրենք ավելի մոտ են կանգնած այդ մարդկանց, ավելի ճիշտ խորհուրդ կտան: Պաղկվոցի խաղալով չի կարելի օրենքներ գրել: Թող փոխադրողն էլ իր կարծիքն ասի, թող ուղևորն էլ իր կարծիքն ասի»,–եզրափակեց մեր զրուցակիցը:

Շարունակությունը՝ «Փաստ» օրաթերթի այսօրվա համարում