Պատերազմ Ռուսաստանի դեմ, դեռևս՝ տնտեսական. սառը պատերազմի նոր փուլ կսկսվի՞. «Փաստ»

«Փաստ» օրաթերթը գրում է.

Քաղաքագետ Երվանդ Բոզոյանը զրուցել է «Փաստ»–ի թղթակցի հետ

– Օրերս ԱՄՆ պետքարտուղար Ռեքս Թիլլերսոնը հայտարարել էր, որ ԱՄՆ–ը լրացուցիչ սանկցիաներ է կիրառելու Ռուսաստանի նկատմամբ, իսկ ԱՄՆ պետդեպարտամենտի ներկայացուցիչ Հիզեր Նոյերտն էլ հանդիպումներից մեկի ժամանակ նշել էր, թե իրենց հաջողվել է չեղարկել Ռուսաստանի՝ ավելի քան 3 միլիարդ դոլարի հասնող արտահանման գործարքները՝ հավելելով, թե դա պատիժ է 2016 թ. նախագահական ընտրություններին միջամտելու համար: ԱՄՆ–ն այս ամենով ի՞նչ նպատակներ է հետապնդում և ի՞նչ է ուզում ասել:

– Սա տնտեսական պատերազմ է Ռուսաստանի դեմ: Ֆորմալ պատճառներն, իհարկե, ԱՄՆ նախագահական ընտրություններին խառնվելն էր, Ղրիմի խնդիրը, Ուկրաինայի հետ հարաբերությունները, սակայն տնտեսական պատժամիջոցների քաղաքականությունն ավելի հեռահար, ավելի երկար ժամանակաշրջանում է իրականացվել: Պարզապես 2014 թ. այն որակապես նոր փուլի մեջ մտավ: Դա պայմանավորված էր այն հանգամանքով, որ Ռուսաստանի՝ իր գերտերության կարգավիճակը վերականգնելու փորձը հասկանալի պատճառներով Միացյալ Նահանգներին շահավետ չէր: Խորհրդային Միության փլուզումից հետո համաշխարհային միակ գերտերությունը մնաց ԱՄՆ–ն, և նրանք ամեն ինչ անում էին այդ կարգավիճակը պահպանելու համար:

– Այս ամենը մեկ բանի է տանում՝ տնտեսական գերակշռություն Ռուսաստանի կողմից թույլ չտա՞լ:

– Մինչև Խորհրդային Միության փլուզումը համաշխարհային երկու գերտերություն կար: Սառը պատերազմի արդյունքում ԽՍՀՄ–ը փլուզվեց, և մնաց միայն Միացյալ Նահանգները: 90–ական թթ. Ռուսաստանը դարձել էր բավական թույլ և հետամնաց զարգացող երկիր, որտեղ նա լուրջ մրցակից չէր ԱՄՆ–ի համար: Վերջինս մարսեց իր նախկին արարքները Արևելյան Եվրոպայում, Բալթյան երկրներում, հետո անցավ Լատինական Ամերիկա, Հարավարևելյան Ասիա, արաբական աշխարհ՝ Ալժիրում փոխելով իրենց մարդկանց:

Ռուսաստանը չէր դիմադրում այդ ժամանակ, և նրա նկատմամբ սանկցիաները կրում էին բավական լատենտ բնույթ: Բայց երբ 2014 թ. նրանք հայտ ներկայացրեցին Ուկրաինան պոկելու համար, Ռուսաստանն արդեն սկսեց դիմադրել, և Ղրիմի խնդիրն առաջացավ: Ռուսաստանը տեսնելով, որ Միացյալ Նահանգները հետևողականորեն փորձելու է մինչև վերջ պոկել Խորհրդային Միության բոլոր բեկորները, քայլ արեց դեպի Սիրիա՝ վերականգնելով իր դիրքերն այնտեղ:

Այստեղ արդեն առաջացավ ռուս–ամերիկյան գլոբալ հակամարտություն, և այդ պարագայում ցանկացած կայծ կարող էր հրդեհի պատճառ դառնալ, որն էլ եղավ ԱՄՆ ընտրություններում Ռուսաստանի միջամտության խնդիրը: Այսօրվա դրությամբ ԱՄՆ–ի թիվ մեկ թշնամին Ռուսաստանն է, և նրանք այսօր ամեն տեղ տեսնում են ռուսական հետք ու վտանգ, և պայքարելու են բոլոր բնագավառներում՝ սկսած տնտեսականից վերջացրած մշակութայինով, սպորտով, քաղաքականությամբ և ռազմական ոլորտով:

– Ռուսաստանը սրան հավասարազոր պատասխան կտա՞:

– Ռուսաստանը փորձում է դիմադրել, Միացյալ Նահանգներն՝ իրենց խնդիրները լուծել: Թե ինչով կավարտվի այդ ամենը, ես չեմ ցանկանում գուշակել, որովհետև բավական վտանգավոր պրոցեսի մեջ են հայտնվել երկու կողմերն էլ: Միացյալ Նահանգներում չեն գիտակցում, որ վիրավոր արջից ավելի վտանգավոր կենդանի չկա: Նրանք չեն հասկանում, որ Ռուսաստանի դեմ այդ պատժամիջոցները շատ խորացնելը ինչի կհանգեցնի: Ռուսաստանը ռազմական գերտերություն է, և այնքան քանակի միջուկային զենք ունի, որ կարող է մի քանի անգամ ոչնչացնել ոչ միայն Միացյալ Նահանգները, այլև՝ ամբողջ աշխարհը:

Ռուսաստանում էլ արդեն գնում են վերանայման, հասկանում, որ պետք է կոշտացնել հարաբերությունները ԱՄՆ–ի հետ: Իսկ եթե պատասխան կոշտացում լինի, կառաջանա գլոբալ սառը պատերազմի նոր փուլ, որը հղի կլինի լրջագույն խնդիրներով:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»