Հայ գործարարի սպանված որդու դին Խաբարովսկից հայրենիք կտեղափոխեն (տեսանյութ)

Զոհված Անդրեյ Մուրադյանի եւ նրա հարազատ եղբոր՝ Ալեքսանդրի դիերը Հայաստան կտեղափոխեն եւ հայրենիքում կհուղարկավորեն: Հիշեցնենք, որ անցյալ շաբաթ առեւանգվել, այնուհետեւ խեղդամահ է արվել ու հրկիզվել գործարարի որդին, որից մարդասպանները առեւանգված հարազատի համար փրկագին են պահանջել: Այս մասին հայտնում է DVHab-ը:

Երկու չարագործները շահույթ ստանալու նպատակով առեւանգել են հայ գործարարի որդուն եւ 20 մլն ռուբլու փրկագին պահանջել: Մինչ ծնողները մտորում էին առեւանգողների հետ ինչպես վարվել, վերջինները գիտակցել են, որ երկար չեն դիմանա, իրենց նկատմամբ հետախուզում կհայտարարվի, ուստի հետեւից մոտեցել են Անդրեյին եւ նրան սառնասրտորեն խեղդամահ արել:

Սպանված տղամարդու մարմինը քաղաքից դուրս են տարել եւ ամայի վայրում այրել: Որոշ ժամանակ անց երկու հանցագորներին ձերբակալել են:

Նախկինում գործարարի ընտանիքում արդեն դժբախտություն պատահել էր: Մի քանի տարի առաջ հոսանքահարումից մահացել էր նրանց ավագ որդին՝ Ալեքսանդրը: Նրան հուղարկավորել էին 49 կմ հեռավորությամբ գտնվող գերեզմանատանը: Տղամարդու աճյունը արտաշիրմելու եւ երկու եղբայրների մարմինները հայրենիք տեղափոխելու որոշում է ընդունվել, որտեղ նրանք կհուղարկավորվեն:

Ներկայումս կատարվում է Անդրեյ Մուրադյանի սպանության գործով քննություն: 27 եւ 26 տարեկան երկու չարագործները կալանավորված են:

Խաբարովսկի մարզի Քննչական կոմիտեի քննչական վարչությունից հայտնել են, որ առեւանգված 25-ամյա տղամարդը եւ կասկածյալներից մեկը համադասարանցիներ էին: 2017 թվականի հունվարի 10-ին կասկածյալները նրան ավտոտնակ են կանչել: Երբ նա իր մեքենայով մոտեցել է հանդիպման վայրին, նրա վրա են հարձակվել եւ կապկպել: Առեւանգվածին ավտոտնակում են պահել: Հունվարի 11-ի առավոտյան կասկածյալները զանգահարել են նրա ազգականներին եւ 20 մլն ռուբլու չափով փրկագին պահանջել: Առեւանգվածի հայրը գործարար է: