Գագիկ Համբարյան. «Շիրակի պետհամալսարանի ռեկտորը «բեսպրեդելությամբ» է զբաղված». «Փաստ»

«Փաստ» օրաթերթը գրում է.

Շիրակի Միքայել Նալբանդյանի համալսարանի շուրջ դեռ ամիսներ առաջ ծավալված կրքերը ոչ միայն չեն հանդարտվում, այլ նոր երանգ են ստանում: Համալսարանի Պատմության և փիլիսոփայության ամբիոնի վարիչի պաշտոնակատար Հովհաննես Խորիկյանն անժամկետ հացադուլ է հայտարարել: Հացադուլի պատճառը մասնավորապես համալսարանի գիտական խորհրդում ֆակուլտետների դեկանների և ամբիոնների վարիչների ընտրությունն է:

ՇՊՀ դասախոս Գագիկ Համբարյանը «Փաստ»–ի հետ զրույցում նախ ընդգծեց, որ փետրվարի 5–ին Սոցիալական գիտությունների և իրավագիտության ֆակուլտետում պետք է դեկանի թափուր տեղի համար ընտրություններ տեղի ունենային:

«Սակայն ռեկտոր Սահակ Մինասյանի երկու տեղակալները մեզ տեղեկացրեցին, որ ընտրություն չի լինելու և ընդամենը քննարկվելու է թեկնածության հարցը: Սա կոպտորեն խախտում է բուհի կանոնադրությունը: Ըստ ՀՀ կառավարության կողմից հաստատված կանոնադրության՝ բուհի ֆակուլտետի դեկանների ու ամբիոնների վարիչների ընտրությունը տեղի է ունենում ֆակուլտետային խորհուրդներում: Հիմա պարոն Մինասյանը կամայական փոփոխություններ մտցրեց բուհի կանոնադրության մեջ, դրանք ներկայացնելով որպես «աննշան» վրիպումներ: Նա փոփոխություններ է մտցրել ֆակուլտետի դեկանների և ամբիոնի վարիչների ընտրության կարգի մեջ՝ ֆակուլտետային խորհուրդներից այն տեղափոխելով բուհի գիտական խորհուրդ: Նա կոպտորեն խախտում է բուհի կանոնադրությունը: Սահակ Մինասյանն անգամ որևէ կետադրական նշան փոխելու իրավունք չունի կանոնադրության մեջ, քանի որ բոլոր փոփոխությունները պետք է վերահաստատվեն կառավարության մակարդակով: Բուհի կանոնադրության մեջ փոփոխություններով հանդես է գալիս գիտական խորհուրդը, որը հետագայում այդ փոփոխությունների առաջարկով դիմում է բուհի հոգաբարձուների խորհրդին: Իր հերթին հոգաբարձուների խորհուրդը այն ներկայացնում է ԿԳՆ–ին, իսկ ԿԳՆ–ն էլ՝ ՀՀ կառավարությանը»,–ասաց նա՝ հավելելով, որ փոփոխությունները միայն կառավարության կողմից հաստատվելու դեպքում են ուժի մեջ մտնում:

«Մենք փետրվարի 5–ից այդ մասին բարձրաձայնում ենք, բայց պարոն Մինասյանն անդրդվելի է ու հայտարարում է, որ ինքը խնդիր չունի՝ ինչ ցանկանա, կանի այդ բուհում: Եվ գործը հասել է նրան, որ այդ կամայականության և նման քայլերի դեմ Հ. Խորիկյանը հացադուլ է հայտարարել»:

Գագիկ Համբարյանը նշեց, որ իրենք ԿԳ նախարարի հետ հանդիպում են պահանջում. «Այսպես շարունակել հնարավոր չէ, պարոն Մինասյանը տարրական «բեսպրեդելությամբ» է զբաղված: Բուհը գտնվում է ֆինանսական խորը ճգնաժամի մեջ, ուսումնական պրոցեսն էլ խայտառակ վիճակում է: Բացի այդ՝ մենք գիտխորհրդի կողմից հաստատված գնահատման համակարգ չունենք: Այն, ինչ տեղի է ունենում ՇՊՀ–ում, խայտառակություն է: Մենք պահանջում ենք, որ ԿԳ նախարարը կարգի հրավիրի պարոն Մինասյանին: Ամենաառաջին պահանջն է չեղարկել ֆակուլտետների դեկանների և ամբիոնների վարիչների կազմակերպվելիք ընտրությունները, քանի որ դա բուհի կանոնադրության կոպիտ խախտում է»: Գագիկ Համբարյանը շեշտեց, որ մինչ այս ԿԳՆ–ից որևէ արձագանք դեռ չկար:

Նա հիշեցրեց, որ չորս ամիս է՝ բարձրաձայնում է ռեկտորի հանցագործությունների և ապօրինությունների մասին. «Պարոն Մինասյանի թեթև ձեռքով գրադարանային ֆոնդի կեսից ավելին գրեթե ոչնչացվեց: Բարձրաձայնել եմ նաև կոռուպցիոն երևույթների, ապօրինի լիցենզիաների մասին, ըստ որի նա կրթական ծրագրեր է իրականացնում բուհում, ինչի իրավունքը չունի: Բարձրաձայնել ենք թալանի մասին, ինչպես նաև՝ 25 միլիոն դրամանոց բուֆետի մասին: Եվ սա այն դեպքում, երբ Գյումրու քաղաքապետարանը 32 մլն դրամով երկհարկանի մեծ շենք է վերանորոգում քաղաքի կենտրոնում: Նա փորձում էր բուհում ժամեր կրճատել և դրանով մեծ ֆինանսական միջոցներ էր գրպանում: Պարոն Մինասյանն իր և իր յուրայինների համար աստղաբաշխական աշխատավարձեր է նշանակել: Իր խորհրդականը 300 հազար դրամ աշխատավարձ է ստանում, իր համակարգչից օգտվել չկարողացող քարտուղարուհին՝ 200 հազար: Գրեթե այնքան, որքան ամբողջ դրույքով աշխատող դոկտոր պրոֆեսորը: Այս շարքն անընդմեջ կարող եմ թվարկել: Ի դեպ՝ մեր բարձրաձայնած հարցերի մեծ մասը հաստատվել է ԿԳ նախարարության հանձնախմբի կողմից»:

Շարունակությունը՝ «Փաստ» օրաթերթի այսօրվա համարում