Գուրգեն Եղիազարյան. «ՀՀԿ–ն իր գոյությամբ ու ներկայությամբ ոչ թե արջի ծառայություն է մատուցում Արմեն Սարգսյանին, այլ ողջ հայ ազգին». «Փաստ»

«Փաստ» օրաթերթը գրում է.

Երբ Կարեն Կարապետյանը նոր էր նշանակվել երկրի վարչապետ, Գուրգեն Եղիազարյանն ասուլիսներից մեկի ժամանակ տեսակետ հնչեցրեց, որ նրա համար հեշտ չի լինելու, քանի որ ինչպես Հովիկ Աբրահամյանի դեպքում էր, այնպես էլ Կարապետյանի դեպքում նույն դեմարշը կկազմակերպեն, որպեսզի վարկաբեկեն ու հեռացնեն նրան իշխանությունից: Ու թեև Գ. Եղիազարյանի այս կանխատեսումից անցել է երկար ժամանակ, բայց այսօր էլ նա նույն կարծիքին է և դրանով է պայմանավորում ՀՀԿ–ի ներսում տեղի ունեցող խմորումները:

«Դեռևս մոտ կես տարի առաջ ես ասել եմ, որ դեմարշ է սկսվելու Կարապետյանի դեմ, որը գնալով կսաստկանա: Ինչը, ինչպես արդեն տեսնում ենք, եղավ: Իհարկե, դեմարշի թիկունքում իմ կարծիքով կանգնած է ՀՀԿ–ն, պարզապես փորձում են ուրիշի ձեռքերով կրակից շագանակներ հանել: Եվ այդ դեմարշն ուղղորդվում է ՀՀԿ–ի շեֆի գովաբանությամբ, որ միակն է, որ անփոխարինելի է, որ առանց Սերժ Սարգսյանի չկա Հայաստանի Հանրապետություն: Եվ այնպիսի դաշտ են ստեղծում, որ սովորական հայաստանցին սարսափով մտածում է, որ Աստված չանի Սերժ Սարգսյանին մի բան լինի, թե չէ ճանճի նման կկորենք»,– ասաց Գ. Եղիազարյանը:

Մեջբերելով Ս. Սարգսյանի՝ այլևս պաշտոնի չհավակնելու և թեկնածությունը չառաջադրելու խոստման հայտարարությունը, նա նշեց, որ նման խոստումներն ընդամենը ՀՀԿ–ի կյանքը երկարացնելու համար էին արվում, բայց ինքը հուսով է, որ ներկա նախագահը իր տված խոստումներից գոնե այս մեկը՝ որ դուրս կգա քաղաքականությունից, կկատարի:

«Սերժ Սարգսյանը մինչ օրս իր տված որևէ խոստում չի կատարել, բայց ես դեռ հույս ունեմ, որ նա կմնա «գենսեկի» կարգավիճակում ՀՀԿ–ի ղեկավար: Ես արդեն ասել եմ, թե ա, բ, ց սցենարներով ինչ են անելու և դրա համար հիմա բոլոր նախապատրաստական աշխատանքներն իրականացվում են, բայց մեկ բան հայտնի է, որ Սերժ Սարգսյանը հենց այնպես իշխանությունը հանձնողը չէ: Մնում է տեսնել, թե որ ձևն է նախընտրելու: Կարեն Կարապետյանին կառավարման ղեկը տալով, հետո նրան լրջագույնս վարկաբեկելո՞ւ, որ Կարապետյանը ստիպված լինի մի քանի ամիս հետո ինքնուրույն հեռանալ, ու հետո Սերժ Սարգսյանը կդառնա վարչապետ ու երկիրը վերջնականորեն կկանգնեցնի կործանման ճանապարհին: Ի դեպ ասեմ, որ եթե ՀՀԿ–ն Սերժ Սարգսյանի գլխավորությամբ իշխանությունը պահպանի, ապա 350 հազարը միանգամից կդառնա 700 հազար մարդ»,– ասաց Գ. Եղիազարյանը:

Նա նաև նշեց, որ երկիրը փոփոխությունների կարիք ունի և պետք է ամեն ինչ անել, որ ներկայի նեխած ճահիճից դուրս գան բոլորը: Ու եթե Կարեն Կարապետյանի գալով ժողովրդի մոտ դրական փոփոխությունների հույս արթնացավ, ապա Սերժ Սարգսյանի գլխավորությամբ ՀՀԿ–ն իշխանության ղեկին մնալու դեպքում երկիրը վերջնականապես կկործանվի:

«Չնայած հիմա խնդիր է առաջացել արևի տակ տեղ զբաղեցնելու, և մարդիկ իրենց ապագայի մասին են մտածում: Մի մասը մտածում է, թե ինչու պետք է ուրիշների արածների համար պատասխան տա, մյուս մասն էլ մտածում է, թե այս երկար ու ձիգ թալանի արդյունքում ինչպես է ամեն ինչ վերջանալու: Եվ բնական է, որ խմորումներ կլինեն, բայց Աստծո կամոք Հայաստանը չի կործանվի, որովհետև ՀՀԿ–ի իշխանության 11 տարիների ընթացքում Տեր Աստված է Հայաստանը պահել: Եվ հուսով եմ, որ էլի կպահի, մինչև վերջնականապես ՀՀԿ–ից պրծնենք»,– ասաց Գ. Եղիազարյանը:

Խոսելով այն մասին, որ դեռ Արմեն Սարգսյանը չի հայտարարել, թե համաձայն է նախագահի պաշտոնում առաջադրվել, սակայն բոլորը նրան որպես 4–րդ նախագահի պաշտոնում ընտրվածի են ընդունում, նա նշեց, որ դրանով ՀՀԿ–ն իր գոյությամբ ու ներկայությամբ ոչ թե արջի ծառայություն է մատուցում Արմեն Սարգսյանին, այլ ողջ հայ ազգին:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»