Փոթորիկ մեկ բաժակ ջրում

Այսօր, համացանցում ռումբի նման պայթեց տեղեկությունը, թե իբր «Մուլտիգրուպ» կոնցեռնը չի վճարում աղբահանության գումարները և այդ հարցը հասել է դատարան:

Առաջին հայացքից լուրը ծիծաղ առաջացրեց, սակայն հետո պարզ դարձավ, որ իրականում հաջողվել է սեփական սխալն ուրիշի վրա բարդելու միջոցով ստվեր նետել մի ընկերության պատվի ու արժանապատվության վրա, որի ղեկավար Գագիկ Ծառուկյանն ամենօրյա ռեժիմով պայքարում է նման արատավոր երևույթների դեմ:

ԱԺ փոխնախագահ, «Ծառուկյան» դաշինքի անդամ Միքայել Մելքումյանը Past.am-ի հետ զրույցում նշեց, որ ինքը նույպես ծանոթ է «Մուլտիգրուպ» կոնցեռնի վերաբերյալ մամուլի հրապարակմանը, սակայն կարծում է, որ այն ոչ այլ ինչ է, քան սխալ մեկնաբանության հետևանք:

«Բավականին անհեթեթ իրավիճակ է ստեղծվել, քանի որ «Կենտրոն» վարչական շրջանի ղեկավարությունը մեղմ ասած ցուցաբերել են պրոֆեսիոնալ անբարեխղճություն, քանի որ սննդի օբյեկտների աղբանահության վճարը, որը կազմում է 70 դրամ, նույնացրել են այլ բնույթ ունեցող՝ այս դեպքում սպորտային, առողջարարական համալիրի կողմից գանձման ենթակա 4-5 դրամի հետ: Եվ ամենևին էլ հասկանալի չէ, թե ինչպես են կատարվել հաշվարկները, երբ 10779,45 ք.մ-ից ընդամենը 107 ք.մ-ն է սննդի համար նախատեսված տարածք: Այսինքն, այստեղ կա անհեթեթություն, քանի որ նշված ողջ տարածքի աղբահանության գումարը հաշվարկվել է ամենաբարձր գնով:

Եվ իրենց կողմից կատարված սխալ հաշվարկը շտկելու փոխարեն, փաստորեն դատական գործընթաց են սկսել: «Մուլտիգրուպ» կոնցեռնը առաջիկայում հակընդդեմ հայց կներկայացնի դատարան, որով կպահանջի ոչ միայն «Կենտրոն» վարչական շրջանի կողմից իրականացված սխալ հաշվարկը վերանայել, այլ կպահանջի նաև ընկերության բարի համբավին հասցրած վնասի փոխհատուցում»,- ասաց Մ. Մելքումյանը:

Նա նաև նշեց, որ նույն շրջանում, որտեղ նաև ինքն է բնակվում, աղբահանությունը բավականին վատ է իրականացվում: Եվ համայնքային իշխանությունները այդ իրավիճակը շտկելու և հասարակական հնչեղություն ունեցող վայրերի աղբահանությունը պատշաճ կազմակերպելու փոխարեն, փաստորեն զբաղված են մեղմ ասած իրենց պաշտոնին ոչ համարժեք քայլեր կատարելով:

«Փաստորեն պետք է հասկանալ, թե «Կենտրոն» վարչական շրջանի աշխատակիցները պրոֆեսիոնալ առումով իրենց պաշտոնին վերաբերող լիազորություններին տիրապետում են, թե՝ ոչ: Պետք է այսօրինակ հարցերը նույնպես քննության առարկա դառնան և մենք, մեր կողմից, նույնպես հետամուտ ենք լինելու, որ այս հարցը նույնպես քննարկվի և իր արժանի լուծումը ստանա»,- ասաց ԱԺ փոխնախագահը:

Նա նաև նշեց, որ «Ծառուկյան» դաշինքը հետամուտ է լինելու պարզելու համար, թե արդյո՞ք ընկերության անվան շուրջ բարձրացված աղմուկի հետևում թաքնված այլ հարցեր չկան: Եվ եթե պարզի, որ նման խնդիր նույնպես կա, ապա իրենք ավելի հուժկու պատասխաններով հանդես կգան:

ԱԺ փոխնախագահը նաև առաջարկեց «Կենտրոն» վարչական շրջանի փողոցներով քայլել և գնահատել, թե կարելի՞ է արդյոք աղբահանության վիճակն ընդհանրապես բավարար համարել:

«Ես կցանկանայի իմանալ նաև, թե արդյոք համայնքի ղեկավարը տեղյա՞կ է, որ «Կենտրոն» համայնքի աղբահանության այդ անբավարար վիճակը ոչ թե օրերի կամ եզակի դեպքերի է վերաբերում, այլ բավականին տարածված բնույթն ունի և տևական ժամանակ է այդ իրավիճակն է տիրում: Կարծում եմ, որ սրանք կարևոր հարցեր են, որոնց պատասխանը բավականին ուշագրավ կարող է լինել բոլորի համար»,- խոսքը եզրափակեց Մ. Մելքումյանը:

Արմինե Գրիգորյան