Արմեն Գրիգորյան. «Առաջին փոխվարչապետի պաշտոնը ստեղծված է Կարեն Կարապետյանի համար». «Փաստ»

«Փաստ» օրաթերթը գրում է.

Մինչ ՀՀ արդարադատության նախարարությունը կներկայացներ «Կառավարության կառուցվածքի և գործունեության մասին» Հայաստանի Հանրապետության օրենքի նախագիծը, ավելի վաղ քաղաքագիտական դաշտում չէր բացառվում արդեն նախագծում ամրագրված առաջին փոխվարչապետի պաշտոն ստեղծելու հնարավորությունը:

«Կառավարության կառուցվածքի և գործունեության մասին» ՀՀ օրենքի նախագծի 1–ին հոդվածը սահմանում է. կառավարությունը կազմված է վարչապետից, առաջին փոխվարչապետից, երկու փոխվարչապետերից և նախարարներից:

Առաջին փոխվարչապետի պաշտոնի անհրաժեշտության շուրջ դիտարկումները միանշանակ չեն: Կա կարծիք, որ այն հստակ Սահմանադրության պահանջն է: Բացի այդ՝ շրջանառվում են կարծիքներ, համաձայն որոնց նախագծում տեղ գտած այս փոփոխությունն անձերի համար է: Ավելի հստակ՝ ապրիլին ընդառաջ գործող վարչապետի համար ստեղծվել է փոխվարչապետի պաշտոնը, քանի որ ապրիլից հետո վարչապետի պաշտոնում կլինի գործող նախագահ Սերժ Սարգսյանը:

Քաղաքագետ Արմեն Գրիգորյանի խոսքով՝ օրենքի նախագծում տեղ գտած դրույթն ավելի շատ քաղաքական նպատակ ունի:

«Առաջին փոխվարչապետի պաշտոնը ստեղծված է Կարեն Կարապետյանի համար: Կարծում եմ՝ երկու ամիս անց, եթե քաղաքական ինչ–որ ֆորս մաժորային իրավիճակներ չլինեն, Կարեն Կարապետյանը առաջին փոխվարչապետ կնշանակվի: Օրենքի ընդհանուր նախագիծը ևս քաղաքական նպատակ է հետապնդում: Եթե նայենք ընդհանուր օրենքը, ապա այն ավելի շատ համապատասխանեցված է Սերժ Սարգսյանի պահանջներին»,– «Փաստ»–ի հետ զրույցում ասաց Արմեն Գրիգորյանը՝ հավելելով, որ օրենքի նախագծում այլ սահմանափակումներ էլ կան:

«Քանի որ Սերժ Սարգսյանը պլանավորում է վարչապետ դառնալ, օրինակ է նաև նախագծում առկա Կառավարության նիստերի դռնփակ լինելու պահանջը»,– նկատեց քաղաքագետը:

Ինչ վերաբերում է առաջին փոխվարչապետի լիազորություններին, Արմեն Գրիգորյանը նշեց. «Առաջին փոխվարչապետը գրեթե ոչ մի լիազորություն չի ունենալու, որովհետև քաղաքականությունը կենտրոնանում է վարչապետի լիազորությունների շուրջ: Նոր օրենքով բոլոր ուժային կառույցները ևս լինելու են վարչապետի վերահսկողության ներքո: Նույնիսկ Անվտանգության խորհուրդն ամբողջովին վարչապետի վերահսկողության ներքո է: Այս առումով առաջին փոխվարչապետը մեծ լիազորություններ չի ունենա: Նա վարչապետի վերահսկողության տակ գտնվող անձ կլինի և կունենա սահմանափակ լիազորություններ»:

Նշենք, որ «Կառավարության կառուցվածքի և գործունեության մասին» օրենքի նախագծում նախարարությունների թիվն անփոփոխ է մնացել:

Արմեն Գրիգորյանի դիտարկմամբ՝ նախարարությունների թիվը կրճատելը ենթադրում է գործազրկության մակարդակի ավելացում:

«Կառավարության և իշխանության համար սոցիալ–տնտեսական այսպիսի պայմաններում գործազրկության ցուցանիշն ավելացնելը կարող է հավելյալ ճնշում լինել: Այդ պատճառով էլ նախարարությունները չեն կրճատվում: Բացի այդ՝ նախարարությունների մեծ մասն ավելի շատ քաղաքական լոյալությունը պահպանելու կառույցներ են: Այս պահին Սերժ Սարգսյանի նպատակը քաղաքական բարեփոխումներ իրականացնելը չէ: Նա ավելի շատ քաղաքական լոյալության կարիք ունի»,– ընդգծեց մեր զրուցակիցը:

Նրա խոսքով՝ 2015 թ. Սահմանադրական փոփոխությունները կատարվեցին հենց այն նպատակով, որպեսզի 2018 թ. ապրիլին վարչապետի պաշտոնում նշանակվի Սերժ Սարգսյանը:

«Ավելի քան երկու տարի Սերժ Սարգսյանն աշխատել է այդ ուղղությամբ ու գնում է այդ ուղղությամբ: Կարեն Կարապետյանը հայտարարել էր, որ ինքն ուզում է վարչապետ դառնալ, բայց ըստ իս նա այս պահին նման հնարավորություն չունի»,– եզրափակեց Ա. Գրիգորյանը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»