Սերգեյ Բագրատյան. «Իսկ որտե՞ղ է սոցիալական արդարությունը». «Փաստ»

«Փաստ» օրաթերթը գրում է.

Հունվարի 23–ին ՀՀ Ազգային ժողովում կազմակերպվել էին «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումներ, որին մասնակցում էին նաև տնտեսագետներ, մի շարք փորձագետներ և հասարակական կազմակերպությունների ներկայացուցիչներ:

ԱԺ «Ծառուկյան դաշինքի» պատգամավոր, տնտեսական հարցերի մշտական հանձնաժողովի անդամ Սերգեյ Բագրատյանի գնահատմամբ՝ լսումներ կազմակերպելը կարևոր էր, ճիշտ էր նաև նման նախաձեռնությամբ հանդես գալը:

«Բայց լսումների արդյունավետությունը ոչ թե մեզնից, այլ կառավարությունից էր կախված: Կառավարությունը պետք է լուծումներ առաջարկեր, որ լսումների ընթացքում մենք քննարկեինք այդ առաջարկները: Բայց կառավարությունը կարծես ավելի շատ պաշտպանում էր թանկացումների փաստը: Հիմնավորում էր, թե թանկացումների արդյունքում տնտեսության զարգացում կունենանք: Կառավարությունը պատրաստ չէր այդ քննարկմանը: Լսումներ կազմակերպելը ճիշտ էր, բայց պետք էր նախապատրաստել, որ կառավարությունն առաջարկություններով հանդես գար: Դա չկար»,– «Փաստ»–ի հետ զրույցում ասաց պատգամավորը՝ չբացառելով նոր լսումներ իրականացնելու մասին առաջարկություն ներկայացնելու հանգամանքը:

«Մենք եկամտահարկի իջեցման առաջարկություն արեցինք: Բացի այդ՝ առաջարկել էինք կարկուտից, երաշտից, ցրտահարությունից առնվազն 40%–ով վնասված հողերի դեպքում գյուղացիներից կոնկրետ մեկ տարով հողի հարկ չվերցնել: Ներկայացրել էինք նաև «Գյուղատնտեսության պետական աջակցության մասին» ՀՀ օրենքի նախագիծը: Կառավարությունը մերժեց բոլոր նախագծերը, բայց լսումների ժամանակ հայտարարեց լուծումներ տալու մասին:

Մենք չգիտենք, թե ինչ տեսքով կլինեն այդ լուծումները, բայց լսումների ժամանակ հայտարարությունները ենթադրում էին, որ մեր առաջարկներն ինչ–որ ֆորմատով կքննարկեն: Այս պահին կառավարության կողմից հստակ դիրքորոշում չունենք: Եթե առաջիկայում կառավարությունը քայլեր չձեռնարկի, մենք լսումներ կկազմակերպենք: Լսումները, սակայն, այնպիսի ձևաչափ պետք է ունենան, որի ժամանակ կառավարությունն արդեն առաջարկներով կներկայանա»,– ընդգծեց Սերգեյ Բագրատյանը:

Նա նշեց, որ լսումները պետք է այնպես կազմակերպվեին, որի ընթացքում հստակ առաջարկներ կլինեին նաև գնաճի հետևանքները մեղմելու ուղղությամբ:

«Իսկ գնաճը մեղմելու շատ ճանապարհներ չկան: Կամ պետք է աշխատավարձերը, թոշակները բարձրացնելով մեղմեն, կամ էլ ակցիզային հարկի դրույքաչափերը վերադարձնեին նախկին շեմին, ինչը, բնականաբար, չեն անելու: Բացի այդ՝ հնարավորություն պետք է ստեղծել, ըստ որի՝ 30%–անոց աղքատության բեռը կփոքրանա: Այդ բեռը պետք է տեղափոխել հարուստ և ապահովված խավի վրա: Աշխարհում ընդունված մեխանիզմներ կան, որոնց շնորհիվ հարկային քաղաքականությունն այնպես է իրականացվում, որ նման դեպքերում ծանրությունն ընկնում է ապահովված խավի վրա: Օրինակ՝ ձևակերպվում է շքեղության հարկ»,–ասաց պատգամավորը և բերեց Ֆրանսիայի օրինակը, որտեղ այդ քաղաքականության շնորհիվ այս պահին միջին խավի ցուցանիշը 70% է:

«Պետությունը պետք է զսպաշապիկ կիրառի, որ օլիգոպոլիաներ չլինեն: Իսկ գործիքակազմերը տարբեր են: Շքեղության հարկ է կիրառվում, և շատ թանկարժեք մեքենաներից, առանձնատներից շատ մեծ հարկեր են վերցնում: Այսինքն՝ տարբեր գործիքակազմերով այդ ծանրությունը տեղափոխում են հարուստ խավի վրա, որպեսզի անապահով խավը կարողանա ապահովագրվել նման դեպքերում: Մեզ մոտ ևս պետք է կիրառել այդ հարկը: Գնաճն ո՞ւմ վրա է ազդում: Իհարկե՝ 29,4% աղքատների և այդ եզրագծի մեջ մտնող ևս 10% քաղաքացիների վրա: Բայց ինչպե՞ս մեկն ունենա 20 հատ թանկարժեք մեքենա և մի քանի առանձնատուն, նույն հարկը տա, ինչը տալիս է քաղաքացին, ում չորս հոգանոց ընտանիքն ապրում է մեկի թոշակով: Իսկ որտե՞ղ է սոցիալական արդարությունը»,– եզրափակեց Ս. Բագրատյանը:

Շարունակությունը՝ «Փաստ» օրաթերթի այսօրվա համարում