Վարդևան Գրիգորյան. «Ծառուկյան» դաշինքը երբևէ պոպուլիզմով չի զբաղվել և դրա կարիքը չունի

Կառավարությունը հունվարի 18-ի նիստում մերժեց Ազգային ժողովի «Ծառուկյան» դաշինքի պատգամավորներ Միքայել Մելքումյանի, Նաիրա Զոհրաբյանի և Վարդևան Գրիգորյանի ներկայացրած «Գյուղատնտեսության պետական աջակցության մասին» ՀՀ օրենքի նախագիծը: Վարչապետ Կարեն Կարապետյանը նախաձեռնությունը որակել էր պոպուլիստական, ու հարցրել, թե արդյո՞ք նախաձեռնության մեջ կա ֆինանսական հաշվարկ: Գյուղատնտեսության փոխնախարար Ռոբերտ Մակարյանն էլ ասել էր, թե հաշվարկ չկա:

«Ծառուկյան» դաշինքի պատգամավոր, ԱԺ Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարդևան Գրիգորյանը Past.am-ի հետ զրույցում, անդրադառնալով վերոնշյալին, ընդգծեց, որ կառավարությունը մերժողական գործելաոճ է ընտրել:

«Սա առաջին դեպքը չէ, և մերժողական գործելաոճ է դրսևորվում հատկապես այն նախագծերի նկատմամբ, որոնք առնչվում են տնտեսությանը: Վարչապետի այն որակումը, թե նախագիծը պոպուլիստական է, անհիմն է: Տեսեք՝ երբ պատրաստ էր նախագծի, այսպես ասած, կմախքը, երկու ամիս առաջ Գյուղատնտեսության նախարարի հետ պայմանավորվածություն եղավ: Մենք ասացինք՝ Ձեր համապատասխան մասնագետներին ուղարկեք, որ միասին քննարկենք, պատրաստենք նախագիծը, շատ լավ իմանալով նաև կառավարության դիրքորոշումը նման այլ նախագծերի հանդեպ: Երկու վարչության պետեր մեզ հետ մասնակցել են քննարկմանը: Անձամբ ես, և մեր փորձագետները երկու անգամ հանդիպել ենք իրենց հետ: Գյուղատնտեսության փոխնախարարը պետք է համարձակություն ունենար ու ասեր, որ միասին ենք աշխատել: Իրենք պատճառաբանում են, թե Գյուղատնտեսության մասին օրենք են մշակում, և ուզում են այդ մայր օրենքում նույն դրույթները մտցնել: Այդ դեպքում ազնվորեն ասեք այդ մասին, ոչ թե նախագծի հեղինակներին, ընդդիմությանը պոպուլիստներ անվանեք: «Ծառուկյան» դաշինքը երբևէ պոպուլիզմով չի զբաղվել և դրա կարիքը չունի»,-ասաց պատգամավորը:

Վարդևան Գրիգորյանը շեշտեց՝ տնտեսությանն առնչվող ընդդիմության կողմից ներկայացված նախագծերը մերժվում են, բայց այն նախագծերը, որոնք ավելի շատ այս կամ այն օրենքի տեխնիկական մասն են աահովում, անցնում են. «Այն նախագծերը, որոնց ընդունման դեպքում բյուջեից պետք է գումար հատկացվի, մերժում են: ԱԺ անցած քառօրյայի ժամանակ մեր կողմից ներկայացված ևս երկու նախագծեր էին մերժվել»:

Ինչ վերաբերում է կառավարության ներկայացուցիչների կողմից մատնանշած հաշվարկներին, պատգամավորն ասաց. «Եթե իրենց հարկավոր էր այդ հաշվարկը, ապա այն կատարելու պահանջով պետք է դիմեին Ֆինանսների նախարարության իրենց գործընկերներին, որ նրանք էլ հաշվարկները կատարեին ու ներկայացնեին: Իսկ մեր առաջարկածի մեջ որևէ պոպոլիստական բան չկա: Կառավարությունն ամեն տարի որևէ բնական աղետի դեպքում փոխհատուցումներ է անում: Իսկ մենք օրենքով ուզում ենք ամրագրել այդ աջակցությունը: Այո, բնական աղետների դեպքում երբեմն կառավարությունը փոխհատուցման որոշում է կայացնում, բայց դա ինքնագործունեություն է: Իսկ այդ աջակցությունն օրենքով ամրագրելու դեպքում կառավարությունն արդեն պարտավոր է օրենքով այդ փոխհատուցումներն անել: Առանց ամրագրման մարզպետարանները շատ դեպքերում ում ուզում են՝ տալիս են այդ փոխհատուցումը, ում չեն ուզում՝ չեն տալիս: Ես շատ գյուղական համայնքներում եմ եղել, որտեղ պետական այրերը աջակցելու մասին խոստումներ են տվել: Օրինակ՝ խոստացել են սառեցնել այդ տարվա ոռոգման ջրի գումարները: Բայց նույն գյուղացիներն ասում են, որ ոչինչ այդ ուղղությամբ չի արվել: Այսինքն՝ մեկ բան է ինքնագործունեությունը, մեկ ուրիշ բան՝ օրենքով ամրագրված պարտավորությունը»:

Այս թեմայով Ռոզա Ծառուկյանը դրամական աջակցություն է ցուցաբերել Ոսկեպարում զոհված ոստիկանների ընտանիքներին Արամ Գրիգորյան. «Համատիրությունների ղեկավարներն ասում են` դռան վրայի «ժեկի» ցուցանակը փոխել են ու գրել «համատիրություն». «Փաստ» Ադրբեջանն այս անգամ չի բավարարվի միայն Ղարաբաղով. «Փաստ» Ինչ է հիշեցրել մարդկանց Դիանա Գրիգորյանի՝ «սեքսուալ» ձևով պաղպաղակ ուտելու տեսանյութը Դիանա Գրիգորյանի շքեղ տոնական սեղանը Սբ. Զատիկին (Photo)