Հակակոռուպցիոն միջոցառումներ կոռումպացված համակարգի կողմից. «Փաստ»

«Փաստ» օրաթերթը գրում է.

«Փաստի» նախորդ համարներից մեկում ներկայացրել էինք կրթության և գիտության նախարարության նոր նախագիծը, որի նպատակներից մեկը կրթության ոլորտում հակակոռուպցիոն միջոցառումներ իրականացնելն է: Մասնավորապես, խոսք է գնում ՆՈՒՀ–երում ու դպրոցներում դասաժամեր հատկացնել հակակոռուպցիոն դասընթացներին, թեմատիկ հանդեսներ ու բեմական ներկայացումներ կազմակեպել:

Երևանի ավագանու «Ելք» խմբակցության անդամ Անահիտ Բախշյանը, սակայն, կարծում է, որ այդ փաստաթղթի հետ ծանոթանալն առաջին հերթին անհրաժեշտ է կառավարության ողջ կազմին: Ըստ Բախշյանի՝ փաստաթուղթը հերթական ձևական թուղթը կլինի, սակայն իրականությունն այն է, որ կառավարության գործելաոճում անգամ նշույլ չի երևում, որ այն իր գործողություններով ինչ–որ հակակոռուպցիոն քայլ է անում: Այդ փաստաթուղթը ոչ թե նախադպրոցականների կամ դպրոցականների համար պետք է կիրառել, այլ՝ կառավարության, գտնում է Անահիտ Բախշյանը՝ նշելով, որ կառավարության գործողությունները բոլորովին հակառակի մասին են խոսում:

Այդ տարիքի երեխաների համար նման դասընթացների կազմակերպումը արդյոք ճի՞շտ է, և նրանք կարո՞ղ են ըմբռնել ասվածը՝ զուգահեռելով այդ ամենը բոլորի համար գաղտնիք չհամարվող ու գրեթե բոլոր մանկապարտեզներում տարածված «շնորհակալությունների» հետ: Սրան Անահիտ Բախշյանը պատասխանեց, որ նախադպրոցական տարիքից երեխաներին սովորեցնում են լսել մի բան, սովորել մի բան, բայց անել ճիշտ հակառակը, որովհետև դա է տեսնում երեխան: Իսկ երեխաների համար մեծերի օրինակը ցանկացած դասագրքից, ծրագրից ու ասելիքից շատ ավելի ազդեցիկ է:

«Մանկապարտեզի երեխային ուզում են սովորեցնել, որ ինքը այդպես մեծանա, բայց իրենք հակառակ գործողությունների կենդանի օրինակն են: Երեխան այնտեղ սովորի, հետո տեսնի իր դաստիարակին ինչպես են «նվեր»՝ կաշառք տալիս կամ վերևներում ինչ է կատարվում: Իսկ երեխաները շատ լավ իրենց ձևով հասկանում են ամեն ինչ»,– ասաց նա:

Անահիտ Բախշյանի համար այս առումով վերջին վառ օրինակը կրթության և գիտության նախարարության տեսչության պետի տեղակալների ներկայացումն էր տեսչության կառավարման խորհրդին, որի անդամներից մեկն էլ հենց ինքն է: Նոր պետը ներկայացրեց իր տեղակալներին, որոնց հետո պետք է հաստատի վարչապետը: Անահիտ Բախշյանը, որպես կառավարման խորհրդի անդամ, երկուսին էլ դեմ է քվեարկել, որովհետև, ըստ նրա, երկուսի պարագայում էլ կոռուպցիան ակնհայտ է:

«Իրենք իրենց կենսագրությամբ, գործունեությամբ չեն տիրապետում մասնագիտական այն հմտություններին, որոնք անհրաժեշտ են կրթության ոլորտը իրավական դաշտ բերելու կամ ոլորտի խնդիրները լուծելու համար: Անհրաժեշտ իրավական գիտելիքներ չունեն, չգիտեն կրթությունը ներսից, մեկ օր անգամ չեն աշխատել հանրակրթության մեջ կամ միջին մասնագիտական ոլորտում, և այսօր նրանց ներկայացնում են որպես պետի տեղակալներ: Մասնագիտական հմտությունները չեն բավարարում: Նրանց միակ բարեմասնությունն այն է, որ մեկը դաշնակցական է, մյուսը՝ Կարեն Ավագյանի եղբայրը»,– ասաց նա:

Ի դեպ, Անահիտ Բախշյանը սրա կապակցությամբ նաև բաց նամակ է հղել վարչապետ Կարեն Կարապետյանին՝ հորդորելով նախադեպ ստեղծել և չհաստատել պետի ներկայացրած կադրերին, քանի որ նրանք ոչ թե սովորելու են գալիս, այլ՝ ոլորտի խնդիրները օրենքի դաշտում լուծելու, այնինչ ոլորտի իրավական դաշտը դեռ չգիտեն ու խոստացել են սովորել: Ըստ Բախշյանի՝ այստեղ կոռուպցիան ակնհայտ է, և կադրերի ընտրությունը մնացել է նույն սկզբունքների վրա՝ ԽԾԲ:

Ինչպես նա է նշում՝ հատկապես դաշնակցական Նաիրի Սաղաթելյանի գործունեությունը, ով տեսչությունում աշխատել է առաջին կարգի մասնագետից մինչև պետի տեղակալ, փաստել է, որ նա ոչ միայն անտեղյակ է, այլև հարցեր լուծելու գործիք:

«Այս նշանակումները խոսում են այն մասին, որ ՆՈՒՀ–երի ու դպրոցների համար գրված փաստաթուղթը հակակոռուպցիոն դասընթաց կազմակերպելու նպատակով առաջին հերթին իրենց է պետք, իրենք, կառավարության բոլոր անդամները, նախարարներն ու պաշտոնյաները պետք է ուշադիր կարդան»,– հավելեց նա:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»