Բաբկեն Պիպոյան. «Միջքաղաքային տրանսպորտի թանկացումը բարդ կլինի զսպել». «Փաստ»

«Փաստ» օրաթերթը գրում է.

Սեղմած գազի, դիզվառելիքի և բենզինի թանկացման ֆոնին սպառողներին հետաքրքրող հարցերի շարքում տրանսպորտի հնարավոր թանկացումն է:

«Իրազեկ և պաշտպանված սպառող» ՀԿ նախագահ Բաբկեն Պիպոյանը «Փաստ»–ի հետ զրույցում նշեց, որ հարցը պետք է քննարկել երկու հարթության մեջ՝ ինչ կարող է լինել տեսականորեն, և ինչ կարող է լինել գործնականում:

«Թվացյալ՝ հեղուկ գազի և դիզվառելիքի թանկացումը ամենաշատն ազդելու էր հենց տրանսպորտի վրա, որովհետև մատուցվող ծառայության ինքնարժեքի մեջ տեսակարար կշռով այն մեծ տեղ է զբաղեցնում: Տրամաբանություն կար, որ կթանկանար: Բայց առանձնացված ոլորտներում այն ազդեցություն չի ունենա: Սկսենք տաքսիներից: Այս ոլորտում անընդհատ խոսվում էր թանկացումների մասին, բայց որոշ օպերատորներ եկան Հայաստան ու գները որոշ դեպքերում անգամ նվազեցին: Այստեղ այլ գործոն էլ կա՝ հասարակությունը վճարունակ չէ և գումար աշխատելու խնդիր կա: Տաքսի վարելով հնարավոր է որոշ գումարներ աշխատել, ինչը այլ հարթություններում շատ ավելի բարդ է: Եթե տաքսիները թանկանան, դրանցից օգտվողների թիվը կնվազի, իսկ եթե նվազի, վարորդը չի կարողանա գումար աշխատել: Եթե անգամ թանկացման մեկ–երկու փորձ լինի, հին գնին կանցնեն, որովհետև որոշ ցանցեր չեն թանկացնի: Իսկ եթե բոլորն իրար հետ թանկացնեն, մարդիկ այլընտրանքային տրանսպորտի միջոց կփնտրեն: Տաքսու վարորդները, հասկանալով, որ հաճախորդների են կորցրել, հին գները կսահմանեն»,–ասաց նա:

Անդրադառնալով քաղաքային տրանսպորտին, մեր զրուցակիցը շեշտեց. «Ներքաղաքային տրանսպորտը չի թանկանա երկու պատճառով: Նախ՝ Երևանում կառուցվում է երթուղային ցանց, և այստեղ կյանքի կկոչվի ամբողջական բարեփոխումների փաթեթ: Ներքաղաքային տրանսպորտի ամբողջական մեխանիզմ է մշակվում, և այստեղ ոչ թե փուլային, այլ փաթեթային փոփոխություն կլինի: Չի բացառվում անգամ, որ մեկի համար գինը թանկանա, մյուսի համար՝ նվազի: Դա կախված է նրանից, թե վճարման համակարգում մենք ժամ, թե, օրինակ, կանգառ կֆիքսենք: Չի բացառվում, որ ինչ–որ մեկը երկու կանգառ կգնա 60 դրամով, մյուսը՝ հինգ կանգառ՝ 100–ով: Կարծում եմ, մյուս քաղաքներում ներքաղաքային տրանսպորտի գինը չի փոխվի, որովհետև հիմնականում նոր քաղաքային իշխանություններ են: Քաղաքական որոշմամբ կփորձեն զսպել գինը»:

Բաբկեն Պիպոյանի խոսքով՝ մի փոքր բարդ կլինի զսպել միջքաղաքային տրանսպորտի թանկացումը. «Երկու քաղաքները, մարզերն իրար կապող տրանսպորտային միջոցներում որոշակի թանկացում է կանխատեսվում: Նման դեպք արդեն գրանցվել է, կարծում եմ՝ էլի կլինեն թանկացումներ: Թերս, ամենաշատը պետք է այստեղ թանկացման սպասել»:

Հարցին, թե ի՞նչու է դժվար զսպել նշված ոլորտում կանխատեսվող թանկացումները, մեր զրուցակիցը պատասխանեց. «Ես թվարկեցի այն հանգամանքները, համաձայն որոնց մնացած ոլորտներում տրանսպորտային գները չեն թանկանա: Միջքաքաղաքային տրանսպորտի ոլորտում վերոնշյալ արգումենտներն այդքան ուժեղ չեն: Տեսեք՝ շարժակազմը շահագործվում է և Երևան է գալիս սահմանափակ քանակությամբ մարդկանցով: Նույնքան սահմանափակ քանակով քաղաքից մարզ է գնում: Ի դեպ՝ կան մարզեր, որ մինիմալով են աշխատում: Բացի այդ՝ այստեղ գնի կարգավորման մեխանիզմ են հանդիսանում նաև տաքսիները, որոնք մարզից մարզ, կամ մարզից քաղաք են տեղափոխում մարդկանց: Օրինակ, Գյումրիից Երևան եկող և՛ տրանսպորտ կա, և՛ տաքսիներ: Երբ տաքսիների գներն էժան են լինում, տրանսպորտը այդ գնին դիմանալու համար հնարավորինս մինիմալ գին է սահմանում: Իսկ հիմա չի բացառվում, որ տաքսու վարորդը մարզից Երևան գալու համար 100, 200 կամ 500 դրամով թանկացնի գինը: Ինչո՞ւ: Նախ միշտ չէ, որ ինքը գալիս է 4 հոգով: Բացի այդ՝ Երևան գնալ գալու համար նա թանկացումներից հետո 1000 դրամ ավելի գումար է ծախսում: Բնականաբար, նա փորձելու է այդ գումարը հետ բերել: Իսկ երբ տրանսպորտի պատասխանատուները տեսնեն, որ տաքսու վարորդը թանկացրել է գինը, թանկացնելու տեղ են ունենում նաև իրենք: Սրանք են այն պատճառները, որոնց համաձայն միջքաղաքային տրանսպորտի ոլորտում չեն գործում այն զսպող մեխանիզմները, որոնք կգործեն ներքաղաքային ու քաղաքային տաքսիների մասով»:

Հարցին, թե տրանսպորտի ոլորտում, այնուամենայնիվ, կամայական թանկացումները կանխատեսելի՞ են, Բ. Պիպոյանն ընդգծեց. «Իհարկե: Բերեմ ամենադիպուկ օրինակը: Հեղուկ գազի մեկ խորանարդ մետրը թանկացել է 17 դրամով: Եկեք տեսնենք, թե ո՞ր գազալցակայանն է 17 դրամով թանկացրել: Թանկացրել են 20, 25, 30 դրամով»:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»