Մայիսյանում խնդիրների լուծումը հետաձգել են. «Փաստ»

«Փաստ» օրաթերթը գրում է.

Տարեվերջ է, սովորաբար, տարվա այս սեզոնին ամփոփում են արածը և ծրագրում հաջորդ տարվա անելիքները։ Արմավիրի մարզի Մայիսյան գյուղում խնդիրների շարքը սկսվում և չի ավարտվում։

Փողոցների լուսավորություն, ճանապարհների վերանորոգում, ոռոգման ջուր։ Սրանք բնակիչների կողմից ամենահաճախ բարձրացվող հարցերն են։

Ըստ մեր զրուցակիցների՝ խնդիրներն այսքանով չեն ավարտվում: Դրանք սկսվում են համայնքի սանիտարական մաքրման աշխատանքները ժամանակին կազմակերպելուց և ավարտվում մանկապարտեզի շենքի կառուցումից։ Այստեղ տեղացիները տարիներ շարունակ առաջնային խնդիրներից մեկը համարել են ճանապարհների անմխիթար վիճակը։

Բնակիչները «Փաստ» օրաթերթի թղթակցի հետ զրույցում պատմեցին, որ ճանապարհների պատճառով նույնիսկ տաքսիներն էին հրաժարվում Մայիսյան ուղևոր փոխադրել, իսկ սեփական ավտոմեքենաներ ունեցողներն էլ դժգոհում էին, որ ստիպված են լինում տարվա մեջ մի քանի անգամ մեքենան վերանորոգել: Մայիսյանի համայնքապետ Եսայի Մովսիսյանի քառամյա ծրագրի մի մասն է կազմում ճանապարհների վերանորոգումը: Այսօր վիճակը փոքր– ինչ բարելավվել է:

«Փոսալցման աշխատանքներ են կատարվել: Մարդիկ արդեն համայնքում կարողանում են տեղաշարժվել: Արդեն ամեն ինչ նորմալ է»,– հայտնեց նա:

Պետական մոտեցում է պահանջվում նաև մանկապարտեզի վերանորոգման հարցում։ Այստեղ մանկապարտեզի տարիքի 50–ից ավելի երեխա կա: Մանկապարտեզը չի գործում արդեն 21 տարի: Պատճառն էլ այն է, որ 90–ականներին համայնքի բազմաբնակարան շենքերից մեկը հրդեհվել էր, և այդ շենքի 4 ընտանիքները ժամանակավորապես տեղափոխվել էին մանկապարտեզի շենք։

Մայիսյանի համայնքապետն ասաց, որ պետական աջակցության կամ բարերարների օգնությամբ կարող են խնդրին լուծում տալ:

Այս հարցով դիմել է Արմավիրի մարզպետ Աշոտ Ղահրամանյանին` վերջինս էլ հարցը նաև կառավարությունում է բարձրացրել։ Մովսիսյանի հաշվարկով՝ մանկապարտեզի շենքի վերակառուցումը կարժենա 50–60 մլն դրամ:

«Դպրոցում նախակրթարան ունենք, որը երկու խմբից է բաղկացած, բայց բոլոր երեխաներն այդտեղ չեն կարող տեղափոխվել: Կան երեխաներ, որոնք հարևան համայնքների մանկապարտեզներն են հաճախում, կամ Մեծամոր ու Արմավիր են գնում»,– նշեց մեր զրուցակիցը:

Այստեղ թիվ մեկ խնդիրը շարունակում է ոռոգման ջրի հարցը մնալ: Դեռ 150 ընտանիքներ 30 հեկտար տնամերձ հողամասեր չեն կարողանում մշակել ոռոգման ջրի բացակայության պատճառով: Նրանք նաև փոխանցեցին, որ համայնքապետարանի և ջրամատակարարի կողմից տրամադրված ֆինանսական միջոցներով համայնքի որոշ հատվածներում ջրախողովակները վերանորոգվել են, բայց դեռ մնում են թաղամասեր, որտեղ ջուրը մատակարարվում է 17–ժամյա գրաֆիկով, և որտեղ հին խողովակաշարերը նորով փոխարինելու անհրաժեշտություն կա։

«Ոռոգման ջրի հարցը շատ սուղ է: Խորքային հոր է պետք: Եկող տարվա ծրագրում կա: Մարդիկ այս տարի ոռոգման ջրի խնդիր ունեցան, չկարողացան հող մշակել, դա է նրանց ապրուստի միակ միջոցը: Պետական ծրագրով նախատեսված է խորքային հորի կառուցումը: Ինքնահոս համակարգով ոռոգելն անհնար է»,– ասաց նա:

Չնայած ոռոգման ջրի սակավությանն՝ այստեղ բերքատվության բարձր ցուցանիշներ են արձանագրվել: Խաղողի բերքատվությունից գոհ են, բայց գներից են հիասթափված: Նախորդ տարվա 140 դրամի փոխարեն 120 դրամով են գործարաններին հանձնել:

Մայիսյանում 2018 թվականից ակնկալիքները մեծ են: Եկող տարվան են հետաձգել նաև համայնքի լուսավորության ծրագիրը:

«Գլխավոր ճանապարհների լուսավորությունն անցկացված է: Եկող տարի նախատեսում ենք մնացածներն էլ անցկացնել»,– անելիքները թվարկեց համայնքապետը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»